Святоотеческое наследие
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Святоотеческое наслѣдiе
-
Гостевая книга
-
Новости
-
Написать письмо
-
Поискъ

Святые по вѣкамъ

Изслѣдованiя
-
I-III вѣкъ
-
IV вѣкъ
-
V вѣкъ
-
VI-X вѣкъ
-
XI-XV вѣкъ
-
Послѣ XV вѣка
-
Acta martyrum

Святые по алфавиту

Указатель
-
Свт. Іоаннъ Златоустъ
А | В | Г | Д | Е
-
З | И | І | К | Л
-
М | Н | О | П | Р
-
С | Т | Ф | Х | Э
-
Ю | Ѳ
Сборники

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 23 мая 2017 г. Сейчасъ на порталѣ посѣтителей - 10.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

СБОРНИКИ И ПРОИЗВЕДЕНIЯ НЕИЗВѢСТНЫХЪ АВТОРОВЪ

Послѣдованіе въ недѣлю Православія

По скончаніи чтенія часовъ стоящу Архіерею на обычнѣмъ мѣстѣ въ облаченіи, отъ олтаря изходятъ Архимандрити, Игумени, Священницы, Діакони: Священницы же износятъ икону Спасителеву и Богородичну, и полагаютъ посредѣ церкве на аналогіи.

Протодіаконъ начинаетъ: Благослови, Владыко.

Архіерей: Благословенъ Богъ нашъ:

Ликъ: Аминь. И поютъ: Царю Небесный:

Чтецъ: Трисвятое: Господи помилуй (12). Пріидите поклонимся:

И псаломъ 74.

Исповѣмыся Тебѣ, Боже, исповѣмыся Тебѣ, и призовемъ имя Твое, повѣмъ вся чудеса Твоя. Егда пріиму время, азъ правоты возсужду. Растаяся земля и вси живущіи на ней, азъ утвердихъ столпы ея. Рѣхъ беззаконнующимъ, не беззаконнуйте, и согрѣшающымъ, не возносите рóга. Не воздвизайте на высоту рóга вашего, и не глаголите на Бога неправду: яко нижé отъ исходъ, нижé отъ западъ, нижé отъ пустыхъ горъ. Яко Богъ Судія есть: сего смиряетъ, и сего возноситъ. Яко чаша въ руцѣ Господни, віна нерастворена исполнь растворенія, и уклони отъ сея въ сію: обаче дрождіе Его не истощися, испіютъ вси грѣшніи земли. Азъ же возрадуюся въ вѣкъ, воспою Богу Іаковлю, и вся рóги грѣшныхъ сломлю, и вознесется рогъ праведнаго.

Слава и нынѣ: Аллилуіа (трижды).

Діаконъ чтетъ ектенію обычную даже до О плавающихъ: и абіе прилагаетъ сію:

О еже милостивымъ окомъ призрѣти на Святую Свою Церковь и соблюсти ю невридиму и непреобориму отъ ересей и суевѣрій и миромъ Своимъ оградити, Господу помолимся.

О еже утишѝти раздираніе Ея, и силою Святаго Духа обратити всѣхъ отступльшихъ къ познанію истины, и сопричести къ избранному Своему стаду, Господу помолимся.

О еже просвѣтити мысли, невѣріемъ помраченнымъ, свѣтомъ Своего Богоразумія: вѣрныхъ же Своихъ укрѣпити и непоколебимыхъ въ правовѣріи соблюсти, Господу помолимся.

О избавитися намъ: и дальше.

Посемъ: Богъ Господь и явися намъ: гласъ 4.

Благодарни суще недостойніи рабы Твои, Господи, о Твоихъ великихъ благодѣяніяхъ на насъ бывшихъ, славяще Тя хвалимъ, благословимъ, поемъ, и величаемъ Твое благоутробіе, и рабски любовію поемъ Ти: Благодѣтелю, Спáсе нашъ, слава Тебѣ.

Слава: гласъ 3.

Твоихъ благодѣяній и даровъ туне, яко раби непотребни сподóблшеся, Владыко, къ Тебѣ усердно притекающе, благодареніе по силѣ приносимъ и Тебѣ, яко Благодѣтеля и Творца слáвяще, вопіемъ: слава Тебѣ, Боже прещедрый.

И нынѣ: гласъ 4.

Якоже вышнія тверди благолѣпіе, и нижнюю споказалъ еси красоту святаго селенія славы Твоея, Господи, утверди сіе во вѣкъ вѣка, и пріими наша въ немъ непрестанно приносимая Тебѣ моленія Богородицею, всѣхъ Животе и Воскресеніе.

Протодіаконъ: Вонмемъ.

Архіерей: Миръ всѣмъ.

Чтецъ: И духови твоему.

Протодіаконъ: Премудрость, вонмемъ.

Чтецъ: Прокименъ, гласъ 4:

Насаждени въ дому Господни, во дворѣхъ Бога нашего процвѣтутъ.

Стихъ: Возвеселится праведникъ о Господѣ, и уповаетъ на Него.

Апостолъ къ Римляномъ, зачало 121 [гл. 16].

Братіе, молю вы, блюдитеся отъ творящихъ распри и раздоры, кромѣ ученія, емуже вы научистеся, и уклонитеся отъ нихъ. Таковіи бо Господеви нашему Іисусу Христу не работаютъ, но своему чреву: иже благими словесы благословеніемъ прельщаютъ сердца незлобивыхъ. Ваше бо послушаніе ко всѣмъ достиже: радуюся же еже о васъ, хощу же васъ мудрыхъ быти во благое, простыхъ же въ злое. Богъ же мира да сокрушитъ сатану подъ ноги ваша вскорѣ. Благодать Господа нашего Іисуса Христа съ вами, аминь.

Евангеліе отъ Матѳея, гл. 18, зачало 75.

Рече Господь: блюдите, да не прéзрите единаго (отъ) малыхъ сихъ: глаголю бо вамъ, яко Ангели ихъ на небесѣхъ выну видятъ лице Отца Моего небеснаго. Пріиде бо Сынъ Человѣческій взыскати и спасти погибшаго. Что вамъ мнится? аще будетъ нѣкоему человѣку сто овецъ, и заблýдитъ едина отъ нихъ, не оставитъ ли девятьдесятъ и девять въ горахъ, и шедъ ищетъ заблуждшія? И аще будетъ обрѣсти ю, аминь глаголю вамъ, яко радуется о ней паче, неже о девятьдесятихъ и девяти незаблуждшихъ. Тако нѣсть воля предъ Отцемъ вашимъ небеснымъ, да погибнетъ единъ отъ малыхъ сихъ. Аще же согрѣшитъ къ тебѣ братъ твой, иди и обличи его между тобою и тѣмъ единѣмъ: аще тебе послушаетъ, приобрѣлъ еси брата твоего. Аще ли тебе не послушаетъ, поими съ собою паки единаго или два, да при устѣхъ двою или тріехъ свидѣтелей станетъ всякъ глаголъ. Аще же не послушаетъ ихъ, повѣждь Церкви, аще же и Церковь преслýшаетъ, буди тебѣ якоже язычникъ и мытáрь. Аминь бо глаголю вамъ, елика аще свяжете на земли, будутъ связана на небеси, и елика аще разрѣшитé на земли, будутъ разрѣшéна на небесѣхъ.

Посемъ:

Помилуй насъ, Боже, по велицей милости Твоей, молимся Ти, услыши и помилуй.

По: Еще молимся о Святѣйшемъ Правительствующемъ Сѵнодѣ:

Не хотяй смерти грѣшныхъ, но ожидаяй обращенія и покаянія, обрати всѣхъ отстýпльшихъ, къ святѣй Твоей Церкви, молимтися, милосердный Господи, услыши и помилуй.

Устроивый міръ сей въ славу Твою, сотвори да и противящіися Твоему слову обратятся, и вкупѣ со всѣми вѣрными истинною вѣрою, и благочестіемъ Тебе Бога нашего прославятъ, молимтися, всемилосердный Творче, услыши и помилуй.

Давый заповѣдь Твою намъ, еже любити Тебе Бога нашего и ближняго своего, сотвори, да ненависти, вражды, обиды, мздоимства, клятвопреступства, и протчая беззаконія прекратятся, истинная же любовь да царствуетъ въ сердцахъ нашихъ, молимтися, Спасителю нашъ, услыши и милостивно помилуй.

Архіерей, возгласъ: Услыши ны, Боже Спасителю нашъ:

Ликъ: Аминь.

Протодіаконъ: Господу помолимся.

Ликъ: Господи помилуй.

Молитва:

Всевышній Боже, Владыко и Содѣтелю всея твари, наполняяй вся величествомъ Твоимъ, и содержай силою Твоею! Тебѣ вседаровитому Господу нашему мы недостойніи благодареніе приносимъ, яко не отвращаешися насъ беззаконій ради нашихъ: но паче предваряеши ны щедротами Твоими. Ты ко избавленію нашему послалъ еси единороднаго Твоего Сына, и благовѣстилъ безмѣрное Твое къ роду человѣческому снизхожденіе: яко хотѣніемъ хощеши, и ожидаеши, еже обратитися намъ къ Тебѣ, и спасенными быти: Ты снизходя къ слабости и немощи нашего естества, укрѣпляеши насъ всесилною Святаго Твоего Духа благодатію, утѣшаеши спасителною вѣрою, и совершенною надеждою вѣчныхъ благъ, и руководствуя избранныхъ Твоихъ въ горній Сіонъ, соблюдаеши яко зѣницу ока. Исповѣдуемъ, Господи, великое Твое и безприкладное человѣколюбіе и милосердіе. Но видя многихъ поползновенія, прилежно Тя, всеблагій Господи, молимъ: призри на Церковь Твою, и виждь: яко Твое спасителное благовѣстіе аще и радостно пріяхомъ, но терніе суеты и страстей творитъ оное въ нѣкіихъ малоплодно, въ нѣкіихъ же и безплодно, и по умноженію беззаконій овіи ересьми, овіи расколомъ противяся евангельской Твоей истинѣ, отступаютъ отъ достоянія Твоего, отрѣваютъ Твою благодать, и повергаютъ себя суду Твоего Пресвятаго Слова. Премилосердный и всесильный, не до конца гнѣваяйся Господи, буди милостивъ, молитъ Тя Твоя Церковь, представляя Тебѣ Началника и Совершителя спасенія нашего, Іисуса Христа. Буди милостивъ имъ, укрѣпи ихъ въ правовѣріи силою Твоею, просвѣти имъ разумныя очи свѣтомъ Твоимъ божественнымъ, да уразумѣютъ Твою истину, умягчи ихъ ожесточеніе, отверзи слухи, да познаютъ гласъ Твой и обратятся къ Тебѣ Спасителю нашему. Исправи, Господи, оныхъ развращеніе и жизнь несогласную христіанскому благочестію: сотвори, да вси свято и непорочно поживемъ: и тако спасителная вѣра укоренится, и плодоносна въ сердцахъ нашихъ пребудетъ. Не отврати лица Твоего отъ насъ, Господи, воздаждь намъ радость спасенія Твоего, подаждь, Господи, и пастыремъ Церкви Твоея святую ревность, и попеченіе объ ихъ спасеніи, и обращеніи заблуждающихъ, духомъ евангельскимъ раствори: да тако вси руководими достигнемъ, идеже совершеніе вѣры, исполненіе надежды, и истинная любовь: и тамо съ лики чистѣйшихъ небесныхъ Силъ прославимъ Тебе Господа нашего, Отца, и Сына, и Святаго Духа, во вѣки вѣковъ, аминь.

Посемъ протодіаконъ, ставъ на уготованнѣмъ мѣстѣ, возглашаетъ:

Кто Богъ велій яко Богъ нашъ, Ты еси Богъ творяй чудеса единъ.

Таже повысшимъ гласомъ: Кто Богъ велій яко Богъ нашъ:

И паки высочайшимъ гласомъ: Кто Богъ велій яко Богъ нашъ:

Православія день празднующе, православніи людіе, наипаче прославимъ Виновника всѣхъ благъ Бога, иже Сый благословенъ во вѣки. Сей Богъ нашъ, промышляя и утверждая возлюбленное Свое достояніе, святую Церковь, праотцевъ, преступленіемъ отпадшихъ, утѣшая неложнымъ Своимъ словомъ, еще въ Раи основаніе Ей положи: Сей Богъ нашъ, руководствуя ко оному спасительному обѣтованію, не несвидѣтельствована Себе остави, но хотящее быти спасеніе провозвѣстилъ первѣе чрезъ праотцевъ и пророковъ, живописалъ различными образы: Сей Богъ нашъ многочастнѣ и многообразнѣ древлѣ глаголавый отцемъ во пророцѣхъ, въ послѣдокъ дній сихъ глагола намъ въ Сынѣ, Имже и вѣки сотвори, Иже возвѣсти Отчее о насъ благоволеніе, откры таинства небесная, увѣри силою Святаго Духа о Истинѣ благовѣстія, посла Апостолы во весь міръ проповѣдати Евангеліе Царствія, утверди оное различными силами и чудесами.

Сему спасительному Откровенію послѣдующе, сего Благовѣстія держащеся, вѣруемъ во Единаго Бога Отца Вседержителя, Творца небу и земли, видимымъ же всѣмъ и невидимымъ. И во Единаго Господа Іисуса Христа, Сына Божія, Единороднаго, Иже отъ Отца рожденнаго прежде всѣхъ вѣкъ: Свѣта отъ Свѣта, Бога истинна отъ Бога истинна, рожденна, несотворенна, единосущна Отцу, Имже вся быша. Насъ ради человѣкъ и нашего ради спасенія сшедшаго съ небесъ и воплотившагося отъ Духа Свята и Маріи Дѣвы, и вочеловѣчшася. Распятаго же за ны при Понтійстѣмъ Пилатѣ, и страдавша, и погребенна. И воскресшаго въ третій день по Писаніемъ. И возшедшаго на небеса, и сѣдяща одесную Отца. И паки грядущаго со славою судити живыхъ и мертвыхъ, Егоже Царствію не будетъ конца. И въ Духа Святаго, Господа, животворящаго, Иже отъ Отца исходящаго, Иже со Отцемъ и Сыномъ споклоняема и сславима, глаголавшаго пророки. Во едину святую, соборную и Апостольскую Церковь. Исповѣдую едино крещеніе во оставленіе грѣховъ. Чаю воскресенія мертвыхъ. И жизни будущаго вѣка. Аминь.

Сія Вѣра Апостольская, сія Вѣра Отеческая, сія Вѣра Православная, сія Вѣра вселенную утверди.

Еще же соборы святыхъ Отецъ, и ихъ преданія и писанія Божественному Откровенію согласная, пріемлемъ и утверждаемъ.

Аще сему Господню о насъ промышленію и откровенію спасителному врази Православія и противишася, но помяну Господь поношенія рабъ Своихъ: хульники бо славы Своея поруга, и продерзатели и враги Православія боязненны и бѣжатели яви.

Якоже убо плѣняющихъ разумъ свой въ послушаніе Божественному Откровенію и подвизавшихся за Оное ублажаемъ и восхваляемъ: тако противящихся сей Истинѣ, аще ожидавшему ихъ обращенія и раскаянія Господу не покаяшася, Священному Писанію послѣдующе и первенствующія Церкве преданій держащеся, отлучаемъ и анаѳематствуемъ.

Отрицающымъ бытіе Божіе и утверждающымъ, яко міръ сей есть самобытенъ и вся въ немъ безъ промысла Божія и по случаю бываютъ, Анаѳема! (трижды).

Глаголющымъ Бога не быти духъ, но плоть; или не быти Его праведна, милосерда, премудра, всевѣдуща, и подобная хуленія произносящымъ, Анаѳема! (трижды).

Дерзающымъ глаголати, яко Сынъ Божій не единосущный и не равночестный Отцу, такожде и Духъ Святый, и исповѣдающымъ Отца, и Сына, и Святаго Духа не единаго быти Бога, Анаѳема! (трижды).

Безумнѣ глаголющымъ, яко не нужно быти ко спасенію нашему и ко очищенію грѣховъ пришествіе въ міръ Сына Божія во плоти, и Его вольное страданіе, смерть и воскресеніе, Анаѳема! (трижды).

Не пріемлющымъ благодати искупленія Евангеліемъ проповѣданнаго, яко единственнаго нашего ко оправданію предъ Богомъ средства, Анаѳема! (трижды).

Дерзающымъ глаголати, яко Пречистая Дѣва Марія не бысть прежде рождества, въ рождествѣ и по рождествѣ Дѣва, Анаѳема! (трижды).

Не вѣрующымъ, яко Духъ Святый умудри пророковъ и апостоловъ и чрезъ нихъ возвѣсти намъ истинный путь къ вѣчному спасенію, и утверди сіе чудесами, и нынѣ въ сердцахъ вѣрныхъ и истинныхъ христіанъ обитаетъ и наставляетъ ихъ на всякую истину, Анаѳема! (трижды).

Отмещущымъ безсмертіе души, кончину вѣка, судъ будущій и воздаяніе вѣчное за добродѣтели на небесѣхъ, а за грѣхи осужденіе, Анаѳема! (трижды).

Отмещущымъ вся таинства святая, Церковію Христовою содержимая, Анаѳема! (трижды).

Отвергающымъ соборы святыхъ Отецъ и ихъ преданія, Божественному Откровенію согласная, и Православно-Каѳолическою Церковію благочестно хранимая, Анаѳема! (трижды).

Помышляющымъ, яко православніи Государи возводятся на престолы не по особливому о нихъ Божію благоволенію и при помазаніи на царство дарованія Духа Святаго къ прохожденію великаго сего званія на нихъ не изливаются: и тако дерзающымъ противу ихъ на бунтъ и измѣну, Анаѳема! (трижды).

Ругающымъ и хулящымъ святыя иконы, ихже Святая Церковь къ воспоминанію дѣлъ Божіихъ и угодниковъ Его, ради возбужденія взирающихъ на оныя ко благочестію, и ко оныхъ подражанію пріемлетъ, и глаголющымъ оныя быти идолы, Анаѳема! (трижды).

Всѣмъ же о Православіи подвизавшымся словесы, писаніи, ученіи, страданіи и богоугоднымъ житіемъ, яко защитникомъ и пособникомъ онаго, Христова Церковь воспоминаніе творя, восклицаетъ:

Святому Благовѣрному и Равноапостольному Царю Константину и матери его Еленѣ, православнымъ греческимъ Царемъ: Великому Ѳеодосію, Ѳеодосію Юнѣйшему, Іустиніану и прочимъ православнымъ Царемъ и Царицамъ греческимъ, Вѣчная память (трижды).

Благовѣрному и Равноапостольному Великому Князю Владиміру, благовѣрнѣй велицѣй Княгинѣ Ользѣ, и прочимъ Благовѣрнымъ Царемъ и Великимъ Княземъ, Царицамъ и великимъ Княгинямъ, и всѣмъ отъ рода Царей и Великихъ Князей Россійскихъ преставльшымся, Вѣчная память (трижды).

Благочестивѣйшымъ Государемъ Императоромъ: Петру Первому, Петру Второму, Петру Третіему, Павлу Первому, Александру Первому, Николаю Первому, Александру Второму и Александру Третіему, и благочестивѣйшымъ Государынямъ Императрицамъ: Екатеринѣ Первой, Аннѣ Іанновнѣ, Елисаветѣ Петровнѣ, Екатеринѣ Вторѣй, Елисаветѣ Алексіевнѣ, Маріи Ѳеодоровнѣ, Александрѣ Ѳеодоровнѣ, и Маріи Александровнѣ, Вѣчная память (трижды).

Святѣйшымъ Патріархомъ Константинопóльскимъ, Александрійскимъ, Антіохійскимъ, Іерусалимскимъ и Всероссійскимъ, и преосвященнымъ Митрополитомъ, Архіепископомъ и Епископомъ православнымъ, Вѣчная память (трижды).

Пострадавшымъ и убіеннымъ въ различныхъ походѣхъ за Православную Вѣру и Отечество княземъ, боляромъ, христоименитому воинству и всѣмъ православнымъ христіаномъ въ истиннѣй Вѣрѣ и благочестіи и надежди воскресенія скончавшымся, Вѣчная память (трижды).

Православная Христова Церковь, торжественно воспоминая подвизавшихся во благочестіи, и сіе всѣмъ Своимъ христоименитымъ чадомъ къ подражанію представляя, имѣетъ такождѣ долгъ восхвалять подвиги, иже нынѣ спасителною Вѣрою и добродѣтелно пріуготовляя себе къ вѣчному блаженству утверждаютъ Православіе.

Посемъ возглашаетъ:

Христіанскаго благочестія ревнителю, защитнику и покровителю Христовы Церкве, благочестивѣйшему, самодержавнѣйшему, Великому Государю нашему Императору Николаю Александровичу, Самодержцу Всероссійскому, и иныхъ странъ Государю и обладателю, подаждь, Господи, благоденственное и мирное житіе, здравіе же и спасеніе и во всемъ благое поспѣшеніе, на враги же побѣду и одоленіе, и сохрани его на многа лѣта. Многая лѣта (9-жды).

И супругѣ его, благочестивѣйшей Государынѣ Императрицѣ Александрѣ Ѳеодоровнѣ, матери его, благочастивѣйшей Государынѣ Императрицѣ Маріи Ѳеодоровнѣ, благовѣрному Государю Наслѣднику и Великому Князю Михаилу Александровичу, и всему Царствующему Дому, Многая лѣта (трижды).

Святѣйшему Правительствующему Всероссійскому Сѵноду, Многая лѣта (трижды).

Святѣйшимъ патріархомъ православнымъ: Константинопóльскому, Александрійскому, Антіохійскому и Іерусалимскому, Многая лѣта (трижды).

Преосвященному, (имярекъ), Многая лѣта (трижды).

Преосвященнымъ православнымъ Митрополитомъ, Архіепископомъ и Епископомъ и всему освященному Причту, Многая лѣта (трижды).

Благовѣрнымъ, правительствующему Сѵнклиту, военачальникомъ, градоначальникомъ, христолюбивому воинству и всѣмъ православнымъ христіаномъ, право содержащымъ спасительную Вѣру и повинующымся Христовѣй Церкви, подаждь, Господи, миръ, тишину, благоденствіе, изобиліе плодовъ земныхъ и Многая лѣта (трижды).

Святая Троице, сихъ прослави и утверди даже до конца въ Правовѣріи: развратники же и хульники Православныя Вѣры и Христовы Церкве, и не повинующымся Онѣй, обрати, и сотвори, да пріидутъ въ познаніе вѣчныя Твоея Истины, молитвами Пресвятыя Владычицы нашея Богородицы, и Приснодѣвы Маріи, и всѣхъ Святыхъ. Аминь.

И по молитвѣ сей абіе Архіерей глаголетъ:

Слава Тебѣ Богу, Благодáтелю нашему, во вѣки вѣковъ.

Ликъ: Аминь. И поетъ слѣдующую пѣснь святаго Амвросія: во время же пѣнія тоя Архіерее, Архимандрити, и все священное собраніе цѣлуютъ святыя иконы на аналогіахъ.

Тебе Бога хвалимъ: Тебе Господа исповѣдуемъ: Тебе превѣчнаго Отца вся земля величаетъ: Тебѣ вси ангели, Тебѣ небеса и вся силы, Тебѣ херувими и серафими непрестанными гласы взываютъ: святъ, святъ, святъ, Господь Богъ Саваоѳъ, полны суть небеса и земля величества славы Твоея. Тебѣ преславный апостольскій ликъ: Тебѣ пророческое хвалебное число: Тебе хвалитъ пресвѣтлое мученическое воинство, Тебе по всей вселенней исповѣдуетъ Святая Церковь, Отца непостижимаго величества: покланяемаго Твоего истиннаго и единороднаго Сына: и Святаго Утѣшителя Духа. Ты Царю славы, Христе: Ты Отца присносущный Сынъ еси, Ты ко избавленію пріемля человѣка, не возгнушался еси дѣвическаго чрева, Ты одолѣвъ смерти жало, отверзъ еси вѣрующимъ Царство Небесное, Ты одесную Бога сѣдиши во славѣ Отчей, Судія пріити вѣришися. Тебе убо просимъ: помози рабомъ Твоимъ: ихже честною Твоею кровію искупилъ еси. Сподоби со святыми Твоими въ вѣчной славѣ Твоей царствовати. Спаси люди Твоя, Господи, и благослови достояніе Твое: исправи я, и вознеси ихъ во вѣки: во вся дни благословимъ Тебе, и восхвалимъ имя Твое во вѣкъ, и во вѣкъ вѣка. Сподоби, Господи, въ день сей безъ грѣха сохранитися намъ: помилуй насъ, Господи, помилуй насъ, буди милость Твоя, Господи, на насъ, якоже уповахомъ на Тя. На Тя, Господи, уповахомъ, да не постыдимся во вѣки, аминь.

Таже бываетъ обыкновенный отпýстъ, и áбіе начинается литургія: аще же извóлитъ Архіерей, послѣдованіе сіе бываетъ и предъ окончаніемъ литургіи предписаннымъ же образомъ.

Печатается по изданію: Послѣдованіе въ недѣлю Православія. — СПб.: Сѵнодальная Тѵпографія, 1904. — 43 с.

Наверхъ / Къ титульной страницѣ

0