Святоотеческое наследие
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Святоотеческое наслѣдiе
-
Гостевая книга
-
Новости
-
Написать письмо
-
Поискъ

Святые по вѣкамъ

Изслѣдованiя
-
I-III вѣкъ
-
IV вѣкъ
-
V вѣкъ
-
VI-X вѣкъ
-
XI-XV вѣкъ
-
Послѣ XV вѣка
-
Acta martyrum

Святые по алфавиту

Указатель
-
Свт. Іоаннъ Златоустъ
А | В | Г | Д | Е
-
З | И | І | К | Л
-
М | Н | О | П | Р
-
С | Т | Ф | Х | Э
-
Ю | Ѳ
Сборники

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 23 марта 2017 г. Сейчасъ на порталѣ посѣтителей - 19.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

VI-X ВѢКЪ

Преп. Романъ Сладкопѣвецъ († ок. 556 г.)
Кондакъ на недѣлю Ваій.

Егоже краестрочіе: На ваія Романа, гласъ 6-й [1].

1. Съ вѣтвьми воспѣвшіи пéрвѣе, пóслѣжде яша съ дрекольми неблагодарніи жѝдове Бога Христа. Мы же Того непреложною вѣрою чтуще всегда, яко благоподáтеля, возопіемъ Ему: Благословенъ еси Грядый Адама воззвати!

2. На Престолѣ на Небеси, на жребяти на земли носимый, Христе Боже, Ангеловъ хвалéніе и дѣтей воспѣваніе пріялъ еси, зовущихъ Ти: Благословенъ еси Грядый Адама воззвати!

3. Понéже ада связалъ еси и смерть умертвилъ еси, и міръ возставилъ еси, съ ваіями Тя, Христе, воспѣваху младенцы, яко побѣдителя, днесь вопіюще Тебѣ: Осанна Сыну Давидову! Уже бо (рекутъ) закалаеми не будутъ младенцы Младенца ради Маріина; но за вся младенцы и старцы, Единъ распинаешися. Уже не прострéтся на насъ мечь, ибо Твоя ребра копіемъ прободýтся. Тѣмже веселящеся глаголемъ: Благословенъ еси Грядый Адама воззвати!

4. Се Царь нашъ, кроткiй и тихій, на жребяти сѣдяй, скоро прихóдитъ пострадати и страсти посѣщѝ; Слово на безсловеснѣмъ, словесныя хотя избавити. И видѣнъ бяше тамо – на хребтѣ осли Сый на Херувимѣхъ, подъемый древле Илiю на огненнѣй колесницѣ, обнищаваяй волею Иже естествомъ богатъ есть немощствýяй хотѣніемъ, Иже всѣхъ укрѣпляетъ, зовущихъ Ему: Благословенъ еси Грядый Адама воззвати!

5. Сіонъ потрясéся весь, якоже прежде Египетъ. Тамо убо бездушная, здѣ же одушевлéнніи поколебáшася, пришедшу Ти, Спáсе – не якоже Тебѣ мятежну быти, насадитель бо еси мира, но яко все врага прельщенiе разрушаеши, Сый всѣхъ Творецъ, того изгоняя отвсюду, яко царствуяй на всякомъ мѣстѣ. Идоли языкъ падóша тогда, нынѣ же языческая мудрствующіи потрясаются, слышаще гласъ младенцевъ: Благословенъ еси Грядый Адама воззвати!

6. Кто бо Сей? глагóлаху невѣдѣвшiи вóлею [2], Кто бяше Сынъ Давидовъ, избáвивый ихъ отъ тли. Еще нынѣ разрѣшаютъ Лазаря [3] невѣдущiи, Кто возбуди его? Еще нынѣ стрáждутъ раменá понесшихъ руками Того мертва, и уже не вѣдятъ, кто есть, исхитивый Его отъ смерти? Отъ двора Iаѝрова едва изыде, и – кто есть, ожививый дщерь его – отрищаются! Вѣдятъ, не хотятъ же рещѝ: Благословенъ еси Грядый Адама воззвати!

7. Неблагодáрніи и беззакóнніи притворяхуся невѣденіемъ, яко быша не вѣдѣли Егоже хотятъ убити. Не разумѣваху сынове лжи, яко не нóвая глаголютъ, но прéжде бывшая обновляютъ. Моисея, иже изведé изъ Египта, абіе отвергóшася, и Христа, избáвльшаго ихъ отъ смерти, нынѣ не познáша. Не познáша Моисея познáвшіи тельца, отвергóшася Христа дрýзи веліара. Тогда рекутъ: что есть? [4] нынѣ же: кто есть? [5] Благословенъ еси Грядый Адама воззвати!

8. Съ вáіями дѣти воспѣваютъ Тя, зовýще Тя Сына Давидова: Осáнна, Господи! [6] Ты бо убилъ еси поносѝтеля, Голиáѳа мысленнаго! Давиду воспѣваху дѣвы, ликующыя о побѣдѣ: «Побѣди [7] Саулъ съ тысящами, Давидъ же со тьмами»! еже есть: законъ, и по немъ благодать Твоя, Іисусе мой: законъ убо Саулъ, завѝдяй и гоняй, благодать же пріемлетъ изгнáнный Давидъ, егоже Ты еси Сынъ и Господь. Благословенъ еси Грядый Адама воззвати!

9. Колесница свѣта, солнце сіе рабóтно есть Тебѣ, сіе носѝло сіяющее Твоему повинýется веленію, яко Создателя и Бога. Аще же Тебѣ угóдно бысть осля, поклоняюся благосéрдію Твоему. Мене бо рáди прежде возлеглъ еси во яслехъ у безсловéсныхъ, нынѣ же, Спáсе, возшéлъ еси на жребя, имѣяй небо престолъ Твой. Тамо ангели окружáху ясли, здѣ же ученицы осля ведяху. Тогда славу слышалъ еси, нынѣ же: Благословенъ еси Грядый Адама воззвати!

10. Крѣпость Твою показалъ еси, подъéмый скýдость, нищеты бо образъ бяше возсѣсти на жребя. Но, яко Преслáвенъ, потряслъ еси Сіонъ. Простотý являху ризы ученикъ, но бяше преслáвна пѣснь дѣтей и нарóдовъ стечéніе, вопіющихъ: Осáнна! еже есть: спасѝ, Сый на высóкихъ! спасѝ уничижéнныя, Высóкій! Помилуй ны, внимáя вѣтвемъ, воззрѝ на ны, Тебѣ зовýщыя: Благословенъ еси Грядый Адама воззвати!

11. Адамъ, снѣдъ еже не дóлженъ бѣ, дóлгъ сотворѝ намъ, имже дóлжни есмы, и даже доднéсь истязýеми есмы мы, сýщіи отъ него. Не довлѣетъ же заимодáвцу истязати дóлжное, но и чáдомъ предстоѝтъ, требуя отчій долгъ, и домъ должника своего расхищáетъ, дóндеже дастся ему все. Тѣмже яко мóщно вси глагóлемъ: вѣдый, яко обнищáхомъ зѣло, Ты Самъ, Спáсе, воздáждь имже дóлжни есмы, яко Благословенъ еси Грядый Адама воззвати!

12. Избáвити всѣхъ пришелъ еси, – свидѣтель пророкъ Твой Захарія, дрéвле предвозвѣстѝвый Тя крóтка и прáведна, и спасáюща. Изнемогóхомъ, лишéни есмы, изгнáни отвсюду. Мнѣхомъ законъ имѣти избáвителя, и той поработѝ насъ, пророки пáки, но сíи остáвиша ны на уповáніи. Тѣмже со младéнцы преклоняемъ колѣна: помѝлуй ны, внемлѝ симъ вѣтвіемъ, вóлею распнися и растерзай рукописаніе: Благословенъ еси Грядый Адама воззвати!

13. О, созданіе рукъ Моихъ! – Создатель отвѣщаваше сія вопіющымъ, – вѣдый, яко законъ не возмóже спасти тя, Азъ пріидóхъ. Не въ законѣ написáся спасеніе, понéже законъ не возмóже. Нижé во прорóцѣхъ, яко и сíи созданіе Мое, якоже и ты. Мое есть еже разрѣшити тя отъ дóлга тягчáйшаго. Прóданъ буду тебе рáди и освобожу тя, и ты не ýмреши, умирáю, и научаю тя вопити: Благословенъ еси Грядый Адама воззвати!

14. Не ангелы ли Азъ избрахъ? но тебе нѝща возлюбихъ. Славу Мою утаѝхъ и, богатъ сый, нищъ являюся вóлею. Много тя возлюбивъ, взалкáхся, возжадáхся, и страждáхъ тебе рáди. Въ горахъ и стремнѝнахъ и во юдóлехъ проидóхъ, тя взыскýя, заблýдшее овчá. Пастырь быхъ, да тя приведу, глáсомъ моимъ взывая. И за тя дýшу Мою хощý положѝти, да тя отъ рукѝ вóлка исхищý. Вся терплю, хощý бо, да взывáеши: Благословенъ еси Грядый Адама воззвати!

15. Но по словесѣхъ дѣлá являются. До града бо достѝже и всѣхъ враговъ Его воспалѝ младенецъ пѣніе. Возведъ же очи Свои воззрѣ къ Сіону, и плачь о немъ составляя, возопи: воздохни, Іерусалиме, яко дѣти обрѣлъ еси учѝтели отцéмъ, яко чада твоя на зло и лукáвствіе возвращаеши, на блáго же нижé старцы подвизáеши? Лучше тебе суть вопіющіи: Благословенъ еси Грядый Адама воззвати!

16. Нынѣ пріиду къ тебѣ и вéргнувъ отрину тя, не яко возненавѝдѣвый, но яко обрѣтóхъ тя ненавидяща Мя и Моя. За что Крестъ Ми обѣщаютъ чада твоя? за сіе ли, яко древле имъ море жезломъ разверзохъ Азъ? Изсѣкáютъ Ми гробъ за сіе ли, яко облакъ подáхъ имъ осѣнéніе? И Азъ рáдуюся, яко сихъ рáди пріидóхъ, и страдáти хощý, возлюбивъ падшаго, да любящіи рекутъ Ми и возопіютъ: Благословенъ еси Грядый Адама воззвати!

17. Тако обличивъ лѣниваго, зряй помышленія сердечная, яко Архіерей, входитъ со всѣми дѣтьми во святый храмъ. Въ домъ Отца своего Сынъ пріиде и вонъ изгна продающыя и купýющыя вкýпе, глаголя: ничто здѣ да не остáнетъ, прехóдимъ бо отсюду, Азъ и Отецъ Мой, и мѣста и сѣни уготóваемъ благочéстнаго любовію и крѣпкою вѣрою взывающымъ: Благословенъ еси Грядый Адама воззвати!

18. Сыне Божій, Всесвятый, къ воспѣвающымъ Тя и насъ сопричти и пріими моленіе рабъ Твоихъ, якоже дѣтей древле. Помилуй ихже создáлъ еси, ихже любяй пришелъ еси. Миръ дáруй Твоимъ церквамъ, обуреваемымъ отъ враговъ, и мнѣ разрѣшеніе низпосли моихъ прегрѣшеній. Подаждь ми глаголати, яже хóщеши, Боже мой. Да не содѣлается умъ мой лѣнивъ печали рáди. Покажи мя доброплóдна, понéже Благословенъ еси Грядый Адама воззвати!

Примѣчанія:
[1] Три начальныя пѣсни этого творенія св. Романа вошли въ наше богослужебное чинопослѣдованіе утрени на недѣлю Ваій. Первая поется (читается) послѣ третьей пѣсни канона подъ именемъ ѵпакои; вторая и третья – послѣ 6-й пѣсни, подъ именемъ кондака (самогласна) и икоса.
[2] речетъ бо: не вѣдятъ (Лук. 23, 34). – Примѣч. св. Романа.
[3] Іоан. 11, 44.
[4] Исх. 16, 15: рѣша другъ ко другу: что есть (о маннѣ).
[5] Матѳ. 21, 10: потрясеся весь градъ глаголя: кто есть сей?
[6] 1 Цар. 17, 26.
[7] 1 Цар. 18, 7.

Печатается по изданію: Преподобнаго Романа Сладкопѣвца, Кондакъ на недѣлю Ваій. / Пер. съ греч. П. Мироносицскаго. // «Приходское чтеніе». – СПб. – 1914 г. – № 50. – С. 1493-1497. (Безплатное приложеніе къ № 12 неоффиціальной части «Церковныхъ Вѣдомостей».)

Наверхъ / Къ титульной страницѣ

0