Святоотеческое наследие
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Святоотеческое наслѣдiе
-
Гостевая книга
-
Новости
-
Написать письмо
-
Поискъ

Святые по вѣкамъ

Изслѣдованiя
-
I-III вѣкъ
-
IV вѣкъ
-
V вѣкъ
-
VI-X вѣкъ
-
XI-XV вѣкъ
-
Послѣ XV вѣка
-
Acta martyrum

Святые по алфавиту

Указатель
-
Свт. Іоаннъ Златоустъ
А | В | Г | Д | Е
-
З | И | І | К | Л
-
М | Н | О | П | Р
-
С | Т | Ф | Х | Э
-
Ю | Ѳ
Сборники

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 23 октября 2017 г. Сейчасъ на порталѣ посѣтителей - 9.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

VI-X ВѢКЪ

Преп. Романъ Сладкопѣвецъ († ок. 556 г.)
Кондакъ на Вознесенiе Господне.

1.

Еже о насъ исполнивъ смотрѣнiе [1], и яже на земли соединивъ небеснымъ, вознеслся еси во славѣ, Христе Боже нашъ, никакоже отлучаяся, но пребывая неотступный, и вопiя любящимъ Тя: Азъ есмь съ вами, и никтоже на вы [2].

2.

На горѣ Елеонстѣй освятивъ ученики [3], на небеса вознеслся еси, Господи, обѣтовавъ имъ наученiе [4] и вопiя имъ: не разлучаюся отъ васъ, Азъ есмь съ вами, и никтоже на вы.

3.

Земная на земли оставльше и сущая отъ персти праху уступающе, прiидите, воспрянемъ, и на высоту возвысимъ очеса и мысли, вперимъ взоры и чувствiя вкупѣ къ небеснымъ вратóмъ, смертнiи. Помыслимъ быти на горѣ Елеонстѣй и взирати на Избавителя на облацѣ носима [5]. Отсюду бо Господь на небеса востече. Отсюду Любодаровитый дáры раздаяше апостоломъ Своимъ, утѣшивъ [6], яко отецъ, и утвердивъ я, наставивъ, яко сыны и глаголавъ имъ: не разлучаюся отъ васъ, Азъ есмь съ вами, и никтоже на вы.

4.

На землю Сшедый, якоже единъ вѣсть, восходя отъ земли паки, имже образомъ вѣсть, поятъ ихже возлюбилъ есть, и на гору высокую возведе ихже собра, да горѣ имѣюще главы и мысли, отъ всѣхъ дольнихъ укрыются. Тѣмже возшедше на гору Елеонскую, (якоже таинникъ Лука повѣствуетъ [7]) окружиша Благодѣтеля. Подъемь же Господь руцѣ якоже орелъ крилѣ, покры гнѣздо, еже согрѣ [8], и глаголетъ птенцемъ Своимъ: Азъ осѣнихъ васъ отъ всѣхъ золъ. Яко убо Азъ возлюбихъ васъ, Мене возлюбите. Не разлучаюся отъ васъ, Азъ есмь съ вами, и никтоже на вы.

5.

Свыше на вы, ученицы Мои, яко Богъ и Творецъ міра всего простираю длани Своя, яже беззаконнiи простроша, и связаша и пригвоздиша. Вы же подклоньше рукамъ Моимъ главы своя, уразумѣйте, познайте вся, яже совершаю Азъ. Яко бо крестя васъ, рукополагаю вы нынѣ, и благословивъ посылаю просвѣщенныя и умудренныя. На главахъ вашихъ благолѣпiе и хвала, въ душахъ же вашихъ просвѣщенiе, якоже написано: отъ Духа бо Моего излiю на васъ [9], и будете прiятни, научени и избранни, вѣрни и свои Мнѣ. Не разлучаюся отъ васъ, Азъ есмь съ вами, и никтоже на вы.

6.

Сiя рекъ, печаль довольну и многу нанесе Спасъ апостоломъ. И восплакашася скоро и изъ глубины воздыхающе, глаголаху ко Учителю: оставляеши ны, Щедре, разлучаешися отъ любящихъ, сiя бо вся, яко въ путь шествуяй, провѣщалъ еси намъ, глаголы бо сіи отшествiе знаменуютъ, и сего ради тýжимъ нынѣ. Понеже бо съ Тобою быти ищемъ, лица Твоего желаемъ, услаждаетъ бо души наша. Уязвихомся, плѣнихомся сладчайшимъ Твоимъ лицезрѣнiемъ, никтоже бо Богъ, развѣ Тебе, не удалися отъ любящихъ Тя, пребуди съ нами и глаголи намъ: не разлучаюся отъ васъ, Азъ есмь съ вами, и никтоже на вы.

7.

Оставихомъ вся житейская [10] и отъ сихъ убѣжахомъ якоже нýждею, да Тя прiобрящемъ. На земли яко странни и пришельцы явихомся; отъ насъ первый Петръ, другъ Твой бывъ, отъ всѣхъ отчуждися, яже имяше нѣкогда. Андрей же паки, братъ его, егда Тя обрѣте, áбiе отъ сущихъ въ мірѣ удалися и крестъ Твой на рáму взятъ. Таковое убо раченiе оставити хощеши, Господи, и тщишися презрѣти ны и не помянути ктому. Да не будетъ, Царю, да не посмѣются намъ ненавидящiи ны, да не возопiютъ къ намъ: гдѣ есть глаголавый: не разлучаюся отъ васъ, Азъ есмь съ вами, и никтоже на вы.

8.

Не брежеши ли, Избавителю, и не помышляеши ли любве сыновъ Зеведеовыхъ? Помяни, Человѣколюбче, како послушаша божественнаго Твоего глагола и не преслушаша, не рѣкоша въ сердцы своемъ: Кто есть сей повелѣвый? но паче родителя своего предсудиша Тя [11]. Матѳей же паки мытницы прибытокъ яко скудость велiю вмѣняше, егда богатство Твое возлюби [12]; Ѳома же Близнецъ и жизнь свою возненавидѣ [13]. И вси мы единою рѣхомъ: яко паче всѣхъ любимъ Тя. Не лиши убо насъ, пребуди съ нами, вся исполняяй, объими насъ и возопій намъ: не разлучаюся отъ васъ, Азъ есмь съ вами, и никтоже на вы.

9.

Слышавъ же Христосъ апостоловъ и видѣвъ рыданiе возлюбленныхъ, абiе воспрiятъ я, и яко отецъ сыны своя ущедри и возопи къ нимъ: не плачите, о друзи! се не время есть слезъ, ни день рыданiя, но часъ радованiя, ко Отцу бо Моему вземлю крилѣ Мои и въ скинiи Моей упокоюся, твердь бо небесную сотворихъ Азъ скинiю, скинiю, не описующую, но обходящую Мя якоже рече Исаiя: постави Богъ небо яко камáру и яко скинiю обитати [14]. Не разлучаюся отъ васъ, Азъ есмь съ вами, и никтоже на вы.

10.

Бýдите убо свѣтли и радующеся нынѣ, и веселiя зракъ вземше, пѣснь нову воспойте; ибо вся, яже бываютъ, васъ ради бываютъ, васъ ради снидохъ, и вся претерпѣхъ, да вамъ угождý, и стяжáсте Мя. Васъ ради паки на небеса восхожду, да уготовлю вамъ мѣсто, идѣже подобаетъ Ми съ вами быти, у Отца бо Моего обители многи суть [15]: овы убо имущи прáотцевъ, другія же исполнены праведныхъ, иныя же пророкъ. Едину же, яже вамъ, никтоже вѣсть доселѣ: сiю убо вамъ уготоваю и васъ прiиму: не разлучаюся отъ васъ, Азъ есмь съ вами, и никтоже на вы.

11.

Нынѣ востаните прóсти, станите крѣпцы и непорочнымъ окомъ воззрите на сiе вознесенiе, еже видяще, о тѣлѣ (Моемъ) мыслите, не о Божестве: плоть бо, юже зрите, сiя достизáетъ въ горняя, Божества же Моего исполнь всяко мѣсто. Но купно съ плотiю возносимою, видимою, и невидимое Мое возносится, Азъ бо соединихся видимому. Единъ есмь невидимый вкупѣ и зримый; Азъ есмь, егоже видите, и воистину не измѣняюся, якоже рече Писанiе [16]; и безсмертенъ есмь, и подобенъ вамъ, превыше васъ, и посредѣ васъ. Не разлучаюся отъ васъ, Азъ есмь съ вами, и никтоже на вы.

12.

Егда сiя Христосъ глагола другóмъ, мáнiемъ повелѣваетъ Архангеломъ Своимъ, да уготоваютъ пречистымъ стопамъ Его восходъ не проходенъ доселѣ. И сіи повелѣнiе прiемше, яко первiи Ангели, всѣмъ сущимъ на высотѣ вопiяху началомъ: возьмите врата, расширите небесныя и преславныя двери, Господь бо Славы грядетъ! [17] облацы прострите плещы Восходящему! еѳире (воздýше), благоуготови себе предъ Грядущимъ тобою, отверзитеся небеса, и небеса небесъ, прiимите Сего, яко грядетъ къ вамъ, глаголяй сущымъ съ Нимъ: не разлучаюся отъ васъ, Азъ есмь съ вами, и никтоже на вы.

13.

Повинувшеся абiе сущiи на высотѣ и отверзше вкупѣ вся высоты, Престоли, Господствiя, съ Началы и Властьми, текоша въ срѣтенiе и уготовивше скоро облакъ, яко колесницу, на Елеонъ послаша его. Пришедъ же сѣмо, прiемлетъ яко на лоно восходящаго облаки и творящаго я дождеточити. Прiемь же Его, носитъ, паче же носится, самъ бо носимый носяще носящаго, яко Марію прежде, и сiю бо Писанiе Облакъ именуетъ [18], егоже соблюде Обитаяй, рекій другомъ: не разлучаюся отъ васъ, Азъ есмь съ вами, и никтоже на вы.

14.

Уже не унываетъ отъ апостолъ ни единый, но вкупѣ вси помышляютъ о сихъ, яже совершишася. Вси бо устремиша на высоту лѝца своя, видяще вознесенiе. Абiе убо облакъ подъемшiй, яко на лоно, бысть яко носило нозѣ непорочнѣй. И яко риза небо растерзася, и Иже отъ Маріи прóйде верхý, ликóмъ огненнымъ предъидущымъ, поющымъ: потщися, Господи, готовъ престолъ Твой [19], взыде, подъемлися на крилý вѣтреню [20] и на лоно Отца гряди. Престолъ бо Твой, явѣ тойжде есть, на немже живеши, егоже не оставляеши, аще и сущымъ нѝзу вопiеши: не разлучаюся отъ васъ, Азъ есмь съ вами, и никтоже на вы.

15.

Яко видѣша вѣрнiи вся бывшая, въ той часъ, Давидски воспѣвше рѣша: воистину взыде Богъ въ воскликновенiи, Господь во гласѣ трýбнѣ [21]. Поющимъ же имъ и горѣ зрящимъ вкупѣ, се двóица ангелъ прiиде къ нимъ, имже образомъ учѝтъ и книга Дѣянiй: яко Содѣтелю вознесшуся и святымъ зрящимъ, предстаста яко мужа два бѣлá видомъ вопiюща: что стоитé? что зрѝте? что хóщете видѣти? се сѣдитъ Богъ на престолѣ Своемъ, воцарися надъ нами вопiяй вамъ: не разлучаюся отъ васъ, Азъ есмь съ вами, и никтоже на вы.

16.

Не ужасайтеся ктому, о! галилéане, Iисусъ бо Христосъ, Иже вознесеся, такожде прiидетъ, яко видѣсте Его горѣ восходяща. Явѣ бо вознесеся, не преложися, не яко Енохъ древле [22]. Енохъ бо, той преставися отъ земныхъ, не сподобися же небесныхъ, но въ селенiихъ праведныхъ, тамо приложися. Илiя же, сѣдяй на огненнѣй колесницѣ взыде, яко на небо [23], якоже пишется, но не достиже небесé. Богъ же Еноховъ, и Богъ Илiинъ, возшедъ на небеса, возвѣсти вамъ: не разлучаюся отъ васъ, Азъ есмь съ вами, и никтоже на вы.

17.

Егда же слышаху глаголы сiя, ученицы Избáвителевы, другъ другу рѣша: воистину свидѣтелiе вѣрнiи Христова вознесенiя сіи суть, яко небеснiи! Аще бо не видѣли быша Сего на престолѣ сѣдяща, не пришли быша возвѣстити намъ. Надъ ангелы господствуетъ, и ангелы Своими творитъ человѣколюбная смотрѣнiя: возсiявый отъ Маріи родися, и рожденiе Его ангели возвѣстиша; воскрéсе, и воскресéнiе Его ангели благовѣстистиша; вознесеся на небеса, и божественное и честнóе вознесенiе Свое, ангелы благими яви намъ Рекій: не разлучаюся отъ васъ, Азъ есмь съ вами, и никтоже на вы.

18.

Укрѣпимся убо мы на льстивыя, вооружимся вкупѣ на обидящия, вси потрудимся поборающе крѣпцѣ, дондеже тыя сокрушимъ. Рцѣмъ дéрзностно къ сынóмъ погибельнымъ: гдѣ есть, Егоже во гробѣ имѣли естé мертва? гдѣ есть Сей, Егоже воини соблюдаху и Егоже стрежаху ваша печати? кáмо преложися? кáмо вознесеся? кто Сего украдé? кто же Сего унесé? похищенъ ли есть изъ гроба? Како нынѣ отъ тверди послá возвѣстити намъ: не бойтеся ихъ, не побѣдятъ бо васъ сіи, яко бо глаголахъ вамъ, не разлучаюся отъ васъ, Азъ есмь съ вами, и никтоже на вы.

19.

Ученицы Избáвителевы, тако помышляюще, Господу и Богу вознесшуся, тогда снидоша съ горы, радующеся купно и веселящеся и достигше дóлу, якоже глаголетъ Писанiе, падше поклонишася Вышнему Богу, и исполнишася хваленiй, гласы возсылаху горѣ, восхваляюще Елеóнъ-гóру, яко сихъ сподобися: гору Синайскую превзошелъ еси славою, тá бо прiятъ словеса Моисеова, ты же Самого Бога; на той законъ бѣ, на тебѣ благодать, Моисея же создавшая и рекшая намъ: не разлучаюся отъ васъ, Азъ есмь съ вами, и никтоже на вы.

20.

Коль превыше еси Ливана! Ѳаворъ и Ермонъ умаляются предъ тобою, яко не содѣла имъ Человѣколюбецъ, яже на тебѣ сотвори. Сiя убо рекше ученицы Избавителевы, возведше горѣ очеса и руки своя, умоляху Царя небесныхъ и земныхъ, вопiюще сице: Едине безгрѣшне, миръ даждь намъ, и Твоему мірови нами, не терпѝтъ бо врагъ видѣти яже о насъ бываемая благая. Сего убо отъ насъ Ты отжени, рекій намъ: не разлучаюся отъ васъ, Азъ есмь съ вами, и никтоже на вы.

Примѣчанія:
[1] Т.е. исполнивъ все дѣло нашего искупленiя.
[2] Послѣднiе два стиха, являющiеся припѣвомъ ко всѣмъ остальнымъ икосамъ, очевидно, написаны св. Романомъ подъ влiянiемъ словъ ап. Павла, Рим. 8, 31: аще Богъ по насъ, кто на ны (Срав. Матѳ. 28, 20: Азъ съ вами есмь во вся дни…).
[3] Т. е. предъ самымъ Вознесенiемъ освятивъ учениковъ Своихъ благословенiемъ (Лук. 24, 50).
[4] Срав. Iоан. 14, 26: Утѣшитель Духъ Святый, Той вы научитъ всему.
[5] Срав. Дѣян. 1, 9: Зрящымъ имъ взятся, и облакъ подъятъ Его отъ очiю ихъ.
[6] Κολαϰεύσας – букв. «ласково говорить».
[7] Пѣснопѣвецъ имѣетъ въ виду книгу Дѣянiй (1, 9-12), а не Евангелiе отъ Луки, гдѣ нѣтъ упоминанiя о горѣ Елеонской.
[8] Срав. Втор. 32.11: Яко орелъ покры гнѣздо свое и на птенцы своя возжелѣ, простерлъ крилѣ свои и прiятъ ихъ.
[9] См. Дѣян. 2, 17-18; Iоил. 2, 27-28.
[10] Матѳ. 19, 27: се мы оставихомъ вся и вслѣдъ Тебе идохомъ.
[11] Матѳ. 6, 22: абiе оставльша корабль и отца своего, по Немъ идоста.
[12] Матѳ. 9, 9.
[13] Iоан. 11, 16.
[14] Ис. 40, 22.
[15] Iоан. 14, 2.
[16] Мал. 3, 6; Числ. 23, 19.
[17] Здѣсь пѣснопѣвецъ относитъ къ величественному событiю Вознесенiя Господа слова Пс. 23, 7. 9.
[18] Ис. 19, 1: Сѣдитъ Господь на облацѣ легцѣ. Чудный пророческiй образъ, преднаписавшiй Дѣву Богоматерь, какъ легкое облачко, неоднократно примѣненъ церковными пѣснотворцами въ Богородичныхъ пѣснопѣнiяхъ. Такъ, въ первомъ тропарѣ 5-ой пѣсни канона на Успенiе Божiей Матери читаемъ: …апостольскiй ликъ служити Тебѣ, Облаку легкому, собирашеся. Полнѣе и величественнѣе пророческiй образъ использованъ въ извѣстномъ ирмосѣ: Сѣдяй въ славѣ… во (на) Облацѣ легцѣ прiиде Iисусъ пребожественный.
[19] Псал. 92, 2.
[20] Псал. 17, 11; 103, 3.
[21] Псал. 46, 6.
[22] Быт. 5, 24: И угоди Енохъ Богу, и не обрѣтошеся, зане преложи Его Богъ.
[23] 4 Цар. 2, 11: И взятъ бысть Илiя вихромъ яко на небо.

Печатается по изданію: Преподобнаго Романа Сладкопѣвца, Кондакъ на Вознесеніе Господне. / Пер. съ греч. П. Мироносицскаго. // «Приходское чтеніе». – СПб. – 1914 г. – № 2. – С. 49-56. (Безплатное приложеніе къ № 17 неоффиціальной части «Церковныхъ Вѣдомостей».)

Наверхъ / Къ титульной страницѣ

0