Святоотеческое наследие
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Святоотеческое наслѣдiе
-
Гостевая книга
-
Новости
-
Написать письмо
-
Поискъ

Святые по вѣкамъ

Изслѣдованiя
-
I-III вѣкъ
-
IV вѣкъ
-
V вѣкъ
-
VI-X вѣкъ
-
XI-XV вѣкъ
-
Послѣ XV вѣка
-
Acta martyrum

Святые по алфавиту

Указатель
-
Свт. Іоаннъ Златоустъ
А | В | Г | Д | Е
-
З | И | І | К | Л
-
М | Н | О | П | Р
-
С | Т | Ф | Х | Э
-
Ю | Ѳ
Сборники

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 15 декабря 2017 г. Сейчасъ на порталѣ посѣтителей - 7.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

VI-X ВѢКЪ

Преп. Романъ Сладкопѣвецъ († ок. 556 г.)
Кондакъ на Святую Пятидесятницу, гласъ 8.

1. Егда снизшéдъ языки слія, раздѣляше языки Вышній [1]. Егда же óгненныя языки раздаяше, въ соединéніе вся призва, и согласно славимъ Всесвятаго Духа.

2. Скорое и извѣстное [2] даждь утѣшéніе рабомъ Твоимъ, Іисусе, внегда унывáти духóмъ нашимъ. Не разлучайся отъ душъ нашихъ въ скóрбехъ, не удаляйся отъ мыслей нашихъ во обстояніихъ, но присно насъ предвари, приблѝжися вездѣ Сый. Якоже со Апостолы всегда былъ еси, сице и Тебе желающимъ соедини Себе, Щедре, да совокýпльшеся Тебѣ, поемъ и славимъ Всесвятаго Духа.

3. Не разлучился еси, Спасе, отъ ученикъ Твоихъ тогда возшедъ на небеса, ибо въ гóрняя достигнувъ, дóльняя содержѝши. Ни едино бо мѣсто есть безъ Тебе, Невмѣстимый: аще бо и будетъ, погибнетъ и упразднится, и яко Содóмъ явится. Ты бо всяческая уставляеши вся держай. Тя убо и Апостоли имѣяху въ душáхъ: тѣмже отъ Елеóна Тебѣ вознéсшуся, въ той часъ схождаху, ликующе и глаголюще: скоро намъ послѝ Всесвятаго Духа.

4. Возвратишася въ радости отъ Елеóна единіинáдесять ученицы. Лука же сіе пишетъ священнотаѝнникъ: яко во Іерусалимъ возвратишася, въ гóрницу же взыдóша идѣже пребывáху и вшéдше сѣдоша, Петръ и прóчіи ученицы, отъ нихже Кифа, яко начинáяй, рече къ нимъ: рачѝтеліе Царствія, горѣ имѣимъ сердцá къ Обѣщáвшему и Глагóлавшему: Азъ вамъ послю Всесвятаго Духа.

5. Сія рекъ Петръ тогда Апостоломъ, на молитву собра и ставъ посредѣ ихъ возопи глаголя: помóлимся, просяще, колѣна преклóнимъ, сію обитель церковь сотворимъ, есть бо и мóжетъ. Восплáчимъ и воззовéмъ къ Богу: послѝ намъ Духа Твоего Всеблагáго, да настáвитъ всѣхъ на землю Твою прáвую, юже еси уготóвалъ чтýщимъ и славослóвящимъ Всесвятаго Духа.

6. Слышавше же абіе сýщіи съ нимъ, звáнніи, собрашася вкýпѣ, яко къ пáстырю áгнцы, словомъ привлечéни, молчаще, подглашáху о нихже моляхуся, и Вседержителю возсылаху молéнія яко сія: Ангеловъ Владыцѣ и Цареви человѣкъ Повелителю и Содѣтелю сущая на земли и въ мóри. Единымъ мановеніемъ держащему дрýзи и раби Твои вопіютъ Тебѣ: скоро намъ послѝ Всесвятаго Духа.

7. Скончавше убо áбіе прошенія своя подписáша я, запечатлѣвше вѣрою, и горѣ послáша [3]. Прочтé же сія Учитель и глагóлаше: Дýше самовлáстный, не яко повелѣвáемый, но яко хóщеши, снѝди. Тя бо уже ожидаютъ ученицы, ихже Азъ собрахъ и наказáхъ глагóля: научѝте языки, Отца возвѣщающе, и Сына чтуще, и воспѣвающе Всесвятаго Духа.

8. Услыша, яко Богъ, Утѣшитель тогда просящихъ Его и се постигáетъ я молящыяся, ни откýдуже отступáяй, Несказáнный, схождéніе бо сіе не прехождéніе бысть, и не остави умалéнія: горѣ бо бѣ, и бѣ дóлу, и повсюду. Божественное естество Сый, неизреченный и неосязный, очесы не зрится, вѣрою же разумѣвáется, рукáми не удержавáется, сердцáмъ же вѣрнымъ прикасáется Всесвятый Духъ.

9. Испóлнившейся Пятидесятницѣ, бяху сóбрани вкупѣ, пребывáюще въ молитвахъ единіинáдесять ученицы, и якоже глагóлетъ Дѣяній чтеніе: внезáпу, яко гласъ дыханія бýрна, шумъ бысть съ небесé и испóлни весь домъ [4], пáче же и устрашѝ возлюбленныя ученики. Тѣмже видяще домъ, якоже корабль колéблемь, вопіяху: о Господи! укроти бýрю и послѝ Всесвятаго Духа.

10. Мняще мýдріи, яко гóрница вся разрушѝся дыхáніемъ, вси въ стрáсѣ затвориша óчи своя, и се бысть иное ужáснѣйшее, и къ страху пéрвому вторый трéпетъ наведóша послѣдующая чудесá: языцы бо óгненніи въ той часъ явишася и на главахъ держáхуся возлюбленныхъ ученикъ, и не опаляхуся власы, но просвѣщáхуся мысли ихъ, ко очищéнію бо и ко обновлéнію послá языки сія Всесвятый Духъ.

11. Видевъ вся бывшая Петръ возопѝ: братіе, почтѝмъ яже зримъ! Да не испытýимъ сія, нижé да речетъ кто: что есть зримое? Превосхóдитъ бо мысль и побѣждáетъ умъ сіе совершáемое – духъ и огнь сопрягóшася – о вѣрнаго чудесé! Дохновéніе и плáмя соединѝшася – о страшнаго видѣнія! Посредѣ вѣтръ – свѣтильницы, посредѣ же росы – искры! Кто видѣ? кто слыша? кто можетъ изрещѝ, еже подаетъ Всесвятый Духъ.

12. Вы убо возлюбленніи, стóйте, дóбрѣ вѝдите огнь, егоже съ высоты посла Сущій на высóкихъ. Не бóйтеся, ибо угліе сіе не опаляетъ! Не страшѝтеся, ибо огнь сей не сожигáетъ! Но яко мýдри помянѝте, кáко дрéвле огнь пріятъ три óтроки, кáко не опалишася тѣлеса ихъ, нижé власъ единый: кáко пещь, тріехъ пріявшая четыри показа я, съ лѝхвою отдадé яже пріятъ, яко убояся Всесвятаго Духа.

13. Да отрѝнетъ убо кíйждо въ насъ, братіе, нынѣ страхъ изъ душѝ, и любовь да явѝтъ къ Вознесшемуся, яко тако возлюби ихже призва, вся бо, яже всѣмъ предречé, нынѣ исполни и якоже рече сотвори. Что убо устрашáемся неопáльнаго плáмене? Рóзы огнь сей да мнимъ, еже и есть: на главы бо наша, яко цвѣти, возложѝшася, имиже увѣнчá насъ и украсѝ и озарѝ Всесвятый Духъ.

14. Яко глагóла сія Кифа всѣмъ Апостоломъ, пребысть въ молчáніи, и купно съ ними пріéмлетъ Святаго Духа. Посемъ бо пріиде, якоже напѝсано, употребивъ, яко предтéчи своя два чýда, сíесть огня и дýха [5], подобáше бо прéжде Дýха чýду предъитѝ, подобáше прéжде крещéнія дýху предтещѝ и провѣщати мíрови, якоже трубóю гласящею, яко хотѣніемъ и волею пріиде на землю Всесвятый Духъ.

15. Вéлія быша и ужáсна вся бывшая, и мысли всѣхъ изумѝша: внезáпу бо испóлнившіися Духа бесѣдоваху къ слышашимъ, и слышани бяху: Римляномъ не яко Вáрвари, Пáрѳяномъ, яко подóбни, и Мѝдяномъ, яко своѝ, Еламѝтомъ явишася, яко благоглагóливи, Арáвляномъ быша, яко разумѣвáеми зѣлó, Асíаномъ же и Фригíаномъ благоглáсни и яснорѣчѝви и всѣмъ языкомъ вѣщáху, якоже имъ подобáше Всесвятый Духъ.

16. Но егдá вѝдѣша я, языки глагóлющыя всѣми вси бывшіи тáмо удивишася вопіюще: что сіе хóщетъ быти? Галилéане суть Апостоли сíи, и кáко же видимъ, яко всѣмъ языкомъ срóдницы являются? Когда сей Кифа-Петръ живяше во Египтѣ? когда же Андрей видѣ Месопотамію? сынове Зеведéовы кáко узрѣша Памфилíю? Кáко вся сія уразумѣемъ, кáко изречéмъ? Убо тáко бысть, якоже хóщетъ Всесвятый Духъ.

17. Вчера рыбаріе, нынѣ мудрецы явишася, прéжде при брéзѣхъ морскихъ стоящіи, нынѣ вѣтíя и краснорѣчиви, прежде завязующіи мрéжи своя, нынѣ разрѣшáютъ рѝторская плетéнія. Тѣмже прихóдятъ съ глагóломъ простѣйшимъ, едино бо слово глагóлютъ вмѣсто многихъ, Единаго Бога проповѣдуютъ не со мнóгими бóги, Единому, яко единому, покланяются непостижѝмому Отцу, единосýщному Сыну, нераздѣльному и соестéственному Всесвятому Духу.

18. Воспоѝмъ, братіе, языки ученикъ яко не слóвомъ украшéннымъ, но силою Божественною уловиша [6] вся. Крестъ бо Его яко трóсть пріяша, глаголы же яко нити употребиша и весь міръ привлекóша. Слово имяху, яко удѝцу острý, плоть же всѣхъ Господа пріяша, яко уловлéніе, не къ смерти уловляющее, но къ жизни влекýщее почитающихъ и славословящихъ Всесвятаго Духа.

Примѣчанія:
[1] Быт. 11, 9: Сего ради наречеся имя его смѣшеніе (Вавилонъ) яко тамо смѣси Господь устна всея земли и оттуду разсѣя ихъ по лицу всея земли.
[2] Извѣстное, т. е. твердое, надежное.
[3] Образъ взятъ изъ области юридической: молитвы, призыванія Святаго Духа, представлены какъ прошенія, написанныя и подписанныя молящимися, запечатанныя печатью вѣры и посланныя Владыкѣ и Царю, Который пріемля, читаетъ ихъ и отвѣтствуетъ.
[4] Дѣян. 2, 1-2.
[5] Т. е. дуновенія вѣтра.
[6] Здѣсь и въ дальнѣйшемъ пѣснопѣвецъ пользуется образами рыболовства: трость (удилище), нить (леска), удица (удочка) и уловленіе (призваніе).

Печатается по изданію: Преподобнаго Романа Сладкопѣвца, Кондакъ на Святую Пятидесятницу. / Пер. съ греч. П. Мироносицскаго. // «Приходское чтеніе». – СПб. – 1914 г. – № 3. – С. 81-86. (Безплатное приложеніе къ № 21 неоффиціальной части «Церковныхъ Вѣдомостей».)

Наверхъ / Къ титульной страницѣ

0