Святоотеческое наследие
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Святоотеческое наслѣдiе
-
Гостевая книга
-
Новости
-
Написать письмо
-
Поискъ

Святые по вѣкамъ

Изслѣдованiя
-
I-III вѣкъ
-
IV вѣкъ
-
V вѣкъ
-
VI-X вѣкъ
-
XI-XV вѣкъ
-
Послѣ XV вѣка
-
Acta martyrum

Святые по алфавиту

Указатель
-
Свт. Іоаннъ Златоустъ
А | В | Г | Д | Е
-
З | И | І | К | Л
-
М | Н | О | П | Р
-
С | Т | Ф | Х | Э
-
Ю | Ѳ
Сборники

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 20 августа 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

XI-XV ВѢКЪ

Мѣсяца Сеп'теврія въ 25 день.
Слово похвал'но преподобному отцю нашему Сергію.
Сотворено бысть ученикомъ его, священноинокомъ Епифаніемъ.
Благослови отче.

Тайну цареву добро есть хранити, а дѣла Божіа проповѣдати преславно есть; еже бо не хранити царевы тайны пагубно есть и блазнено, а еже молчати дѣла Божіа преславная бѣду души наносить. Тѣм'же и азъ боюся мол'чати дѣла Божия, въспоминая мýку раба оного, пріимшаго Господень талантъ и вземли ск'рыв'шаго и прикупа имъ не сътворив'ша: никтоже бо достоинъ есть очищену имѣя мысль в'нутреняго человѣка; таковъ сый страстный азъ, пленицами многыми грѣховъ моихъ стягнутъ, таковымъ преславнымъ вещемъ нелѣпо бѣ мнѣ коснутися, но развѣ точію безаконіа моя възвѣщати и пещися о грѣсехъ моихъ. Но понеже желаніе привлачит' мя и недостоиньство мол'чати запрещают ми, грѣси мои ıaко бремя тяш'ко отяготѣша на мнѣ, и что сотворю? дерз'ну ли недостойнѣ к начинанію? что убо? рекý ли или запрещю в' себѣ? окаю ли свое окааньство? в'нимаю ли въсхо/л. 676 а./дящимъ на сердце мое блаженьствомь о преподобнѣмъ?

Но ты самъ, отче, содѣйствуй мнѣ, да не ıaко недостойному ми помрачится умъ мой, но самъ яже и не пишющу ми в' мысли моей да в'зыдуть отъ твоихъ похвалъ, сия и пишющю ми ты в'разуми и настави: множицею бо въспомянувъ и слезы о семъ испустихъ моего ради недостоиньства, да не како не получю искомаго, о нем'же начахъ, аще не ты руку прост'реши; нѣсмь бо доволенъ по достоанію похвалы тебѣ приносити, но мала нѣкая отъ великихъ провѣщяти. Но обаче сподоби мя принести похвалы тебѣ, приносящаго мол'бы о моей худости Христу Богу нашему; аще бо и вси достойни, но азъ недостоинъ есмь, в'лекомъ и жадая, да поне крупицамъ трапезы из'бранныхъ причастникъ буду: могуть бо и множество крупицъ насытити алчющихъ душа, наипаче же духовныхъ отецъ ученіа и душеполезная словеса не ток'мо телеса, но и самую душю могуть укрѣпити и окор'мляті и духовнымъ подвигомъ: понеже свѣтла и сладка и просвьщен'на намъ всечестныхъ /л. 676 б./ нашихъ отецъ возсіа память, пресвѣтлою бо зарею и славою просвѣщающеся и насъ осіаваютъ; свѣтла убо въ истин'ну и просвѣщена, всякоя почести отъ Бога и радости достойна, имьже вашихъ боголюбивыхъ душь, ıaко възлюблен'ныхъ чадъ отецъ къ духовному веселію нынѣ созвав'ши и ıaко любителя отець во свѣтлей сей церкви радостно пріемлюще и любовію веселящи, прежде же плотьскіа духовную вамъ предуготовляющи трапезу, исполнь сущи радости и веселіа духовнаго и исполни сладости божественыхъ словесъ, ангельскіа пища: пищу убо ангельскую писаніе духовная словеса нарицаютъ, имже душа наслаждаеть в'нимающи умомъ, и ıaко пищею тѣло, тако и словомъ укрѣпляема бываеть душа; сладость бо словесную Давыдъ в'кусивъ, удивляася къ Богу глаголеть: коль сладка гор'тани моему словеса Твоя, паче меда устомъ моимъ! от заповѣдей Твоихъ разумѣхъ, сего рáди възненавидѣхъ всякъ путь неправ'ды. Такоже и древніи отцы наши и прочіи вси, иже в' постѣ просіавша.

Сих' же стопамъ послѣдуя /л. 676 в./ и житію ихъ порев'нуя, всякъ путь неправ'ды възненавидѣхъ и истину възлюбихъ, егоже и прежде надписаніемъ слова в'мѣнихомъ и отъ насъ днесь нынѣ похваляемъ есть Сергіе блаженный, преподобный отецъ нашь. Сему убо в' правду подобаеть дивитися и достойно его ублажати: зане и отъ человѣкъ подобострастенъ намъ бывъ, но паче насъ Бога възлюби, и вся краснаа мира сего ıaко уметы в'мени и презри, и усер'дно Христу послѣдова, и Богъ възлюби его; и ıaко угодити ему искрен'но пот'щася, и удиви и прослави его: славящаа Мя бо, рече, Азъ прославлю, уничижающаа же Мя бес чести будуть. И егоже Богъ прослави, кто можеть похвалу его сокрыти? Лѣпо убо и намъ того в' правду достойно ублажити и похвалити: похвала бо еже его отъ насъ не оного что пол'зуеть, но намъ паче спасеніе духовное содѣваетъ; сего ради в' наше в наученіе полезно узаконися иже отъ Бога почести святыхъ послѣднему роду писаніемъ предавати, да не глубиною заб'венія покрыются святаго добродѣтели, но паче же разумно словесы сказающе, подобно симъ открывати, ıaко не /л. 676 г./ утаити пол'зы [слышащимъ].

Вѣсть бо добродѣтели словомъ многыхъ умилити, ıaкоже жаломъ душю уıaзвити и к Богу чистымъ житіемъ подвигнути: такоже и сей приведе къ Богу многихъ душа чистымъ своимъ и непорочнымъ житіемъ преподобный игуменъ отецъ нашь Сергіе святый, старець чюдный и добродѣтел'ми всякими украшенъ, тихый и кроткій нравъ имѣа, и смѣреный и доброн'равный, привѣтливый и благоувѣтливый, утѣшительный сладкогласный и благоподатливый, милостивый и добросер'дый, смиреномудрый и целомудреный, благоговѣйный и пищелюбный, стран'нолюбный и миролюб'ный и боголюбивый, иже есть отцемъ отецъ и учителемъ учитель, наказатель вождемъ, пастыремъ пастырь, игуменомъ настав'никъ, мнихомъ начал'никъ, манастыремъ строитель, пост'никомъ похвала, мол'чал'никомъ удобреніе, іереомъ красота, священникомъ благолѣпіе, сущій вождь и неложный учитель, добрый пастырь, правый учитель, нелестный настав'никъ, умный правитель, всеблагый наказа/л. 677 а./телю, истин'ный коръмникъ, богоподатный врачь, изящный предстатель, священный чиститель, начал'ный общежитель, милостынямъ податель, трудолюбный подвиж'никъ, молитвенникъ крѣпокъ, чистотѣ хранитель, цѣломудріа образъ, стол'пъ тер'пѣніа, иже поживе на земли ангельскимъ житіемъ и възсіа въ земли Рустѣй аки звѣзда пресвѣтлая, иже за промногую его добродѣтель людямъ на пользу бысть, многымъ на спасеніе, многымъ на успѣхъ душевный, многымъ на потребу, многымъ на устрой, иже бысть христолюбивымъ кназемъ великымъ Рускимъ учитель православію, вел'можамь же и тысущ'никомъ и прочимъ старѣйшинамъ и всему син'глиту и христолюбивому всему воиньству еже о благочестіи твер'дый поборникъ, архіепископом' же і епископомъ и прочимъ святителемъ и архимандритом' благоразумный и душеполезныхъ совоз'гласникъ и совопросникъ, честнымъ же игуменомъ и презвѵтеромъ прибѣжище, иноческому же чину аки лѣст'вица възводящіа /л. 677 б./ на высоту небесную, сиротамъ аки отецъ милосердъ, в'довицамъ ıaко заступникъ теплъ, печалнымъ утѣшеніе, скор'бящимъ и сетующимъ радостнотворець, ратующим'ся и гнѣвающимся миротворець, нищимъ же и маломощ'нымъ с'кровище нескудное, убогымъ неимущимъ повседневныя пища великое утѣшеніе, болящимъ во мнозѣхъ недузѣхъ посетитель и изнемогающимъ укрѣпленіе, малодушьнымъ утвер'женіе, без'времен'нымъ печал'никъ, обидимымъ помощ'никъ, насильствующимъ и хищьникомъ крѣпокъ обличитель, сущимъ во плененіи отпущеніе, в' работахъ сущимъ свобожденіе, в' темницахъ въ узахъ дер'жимыхъ избавленіе, дол'жнымъ искупленіе, всѣмъ просящимъ подааніе, пияницамъ истрезвеніе, гор'диливымъ целомудріе, чюжая грабящимъ въстягновеніе, лихоимцемъ возб'ранникъ, грѣшникомъ кающим'ся вѣрный поручитель и всѣмъ притекающимъ к' нему аки ко источнику благопотребну.

Бяше же видѣті его хоженіемъ и подобиемъ /л. 677 в./ ангелолѣпными сѣдинами честна, постомъ украшена, въздер'жаніемъ сіая и братолюбіемъ цвѣтый, кротокъ в'зоромъ, тихъ хоженіемъ, умиленъ видѣніемъ, смиренъ сердцемъ, высокъ житіемъ добродѣтел'нымъ, почтенъ Божіею благодатію: понеже Бога чтяше, и Богъ почте его и честь многу положи на немъ; онъ Бога прослави, и Богъ на земли прослави его, ıaкоже рече Господь въ святомъ Еѵангеліи: тако да просвѣтится свѣтъ вашь предъ человѣки, ıaко да видятъ дѣла ваша добрая и прославять Отца вашего, иже есть на небесехъ. И пакы рече: не укрыется градъ вер'ху горы стоя; ни в'жигають свѣтил'ника и поставляють его подъ спудомъ, но на свѣщ'ници, и прочая.

Сего же угодника своего, преподобнаго отца нашего Сергіа, тако Богъ почте ѝ, и тако прослави его, ıaко да молитвами его мнози отъ болѣзней здрави бываху и мнози отъ недугъ исцеленіе пріаша, мнози отъ бѣсовъ избавишася и отъ многоразличныхъ искушеній очистишася; толико бо Богъ прослави угодника своего не ток'мо в' той странѣ, в нейже святый живяше, но и во иныхъ градехъ и в' даль/л. 677 г./ныхъ странахъ и въ всѣхъ языцехъ от'ъ моря и даже до моря; не ток'мо въ цар'ствующемъ градѣ, но и въ Іеросалимѣ; не ток'мо едини православніи почюдишася добродѣтел'ному житію преподобнаго, но и невѣрніи мнози удивишася благопребывател'ніи жизни его: бяше бо Бога възлюби всѣмъ сердцемъ своимъ, и ближняго своего ıaко и сам' ся, равно бо любляше всѣхъ и всѣмъ добро творяше, и вси ему благотворяху; и ко всѣмъ любовь творяше, и вси к нему любовь имяху и добрѣ его почитаху; и мнози к нему прихождаху, не токмо ближніи, но издалеча и отъ далнихъ градовъ и странъ, хотяща видѣті ѝ, и слышати слово отъ него и велику пол'зу и душевное спасеніе пріемлюще отъ поученіа и дѣлъ его, учаше бо и творяше, ıaкоже бо в' Дѣаніяхъ святыхъ апостолъ речеся: понеже начатъ Ісусъ творити же и учити; иже убо словомъ учаше, тоже и самъ дѣломъ творяше.

И не ток'мо отъ поученіа пол'зовахуся, но и многажды нѣкыимъ зрящимъ на нь точію отъ зрѣніа его пріимати ползу многымъ; многыхъ научи душеполезными словесы и на покааніе къ Богу обрати, и многыхъ спасе во иноческий образъ облекъ, /л. 678 а./ паче же ангельскій, и честныя мощі ихъ своима рукама опрятавъ, погребенію предасть; и многыхъ душа къ Богу приведе, и мнозѣ поученіемъ его спасошася и до нынѣ спасаются, не точію иноци, но и простіи, поминающе душеполезная его словеса и ученіа; и упасе бо порученое ему отъ Бога стадо свое въ преподобіи и в' правдѣ, образъ во всемъ бывъ своимъ ученикомъ; поживе на земли житіе чисто и непорочно и благоугодно Господеви, еже наченъ отъ юности зѣло, тоже и совер'ши въ старости глубоцѣ, не изменивъ правила своего чернеческаго; въ в'ся дни живота своего никогдаже разлѣнися, ни унывъ, не инако нача и ипако кон'ча: но елико убо жестоко и свято нача, толико же изрядно и чюдно скон'ча; со благоволеніемъ убо нача, со святынею же соверши въ страсѣ Божіи: зачало бо премудрости страхъ Господень; занеже вѣру и упованіе и любовь преизлише приобрѣте, тѣмьже благочестивѣ нача и благочестно поживе і свято сверьши; рав'но теченіе скон'ча, вѣру соблюде, и вѣнець праведный получи и мзду вѣрну воспріатъ трудовъ ради исправленій своихъ, /л. 678 б./ имиже подвизася на земли, подвигъ многъ совер'шивъ, и трудъ великъ подъıaть, и тяготу вара дневнаго понесъ, и зной полуденьный доблественый въсприятъ, и студенъ зимную вел'ми пострада, и мразы лютыа и нестер'пимыя претер'пѣ имени ради Божіа; и того ради нынѣ воспріатъ мьзду совер'шену и велію милость.

Что же много глаголю и глаголя не престаю, умножая рѣчи, распростирая глаголы, и продол'жаю слово, не могый по достоанію написати житіа добраго господина и святаго стар'ца, не могый по подобію нарещи или похвалити достойно? Но обаче прочая его добродѣтели ин'де скажемъ и многая его исправленіа инде повѣмъ, и похвалу его изложимъ, аще Богъ вразумить и силу подасть молитвами святаго стар'ца; нынѣ же нѣсть в'ремя за оскудѣніе разума и за мѣдленіе ума моего.

Сіа же подробну писахъ не к' тѣмъ, иже извѣсто свѣдущимъ и добрѣ знающимъ благочестно житіе его: ти бо не требують сею възвѣщеніа; но понудих'ся възвѣстити сіа и въспомянути новорожен'нымъ людемъ и младоумнымъ /678 в./ отрочатемъ и дѣтьскій смыслъ имущимъ, да и ти нѣкогда възрастуть, и въз'можають, и преуспѣють, и достигнутъ в' мѣру вер'сты исполненіа мужьства, и достигнуть в' разумъ совершенъ, и другъ друга въспросять о семъ, и почет'ше разумѣють и инымъ воз'вѣстять, ıaкоже въ святѣмъ писаніи речеся: вопроси, рече, отца твоего, и възвѣстить тебѣ, стар'ца твоя, и рекуть тебѣ; елико видѣша и слышаша и разумѣша отци наши, повѣдаша намъ, да не утаится отъ чадъ ихъ в род' инъ сказаті а сыновомъ своимъ, да познаеть родъ инъ, сынове родящеися, да въстануть и повѣдять а сыновомъ своимъ, и не забудуть дѣлъ Божіихъ. Елицы бо ихъ быша великому тому и святому стар'цю самовидци же и слугы, ученици же и таибници, паче же и послушници, иже своима очима видѣвша его, и уши ихъ слышаша ѝ, и руци ихъ осязаста ѝ, ıaдоша же и пиша с нимъ, иже ученіа его насытишася и добродѣтелі его насладишася, то тіи не требують сего худаго нашего писмянѣ, довол'ни бо суще и иныхъ научити, паче же /л. 678 г./ и мене самого наказати и извѣстити и наставити на путь правый; а елицихъ еже быти нынѣ начинають, ıaкоже предиречеся, иже не видѣша ни разумѣша его, и всѣмъ сущимъ, наипаче же новоначалнымъ зило прилична и угодна суть, да незаб'вено будеть житие святаго, тихое и кроткое и незлобивое, да не заб'вено будеть житіе его чистое и непорочное и безмятеж'ное, да не заб'вено будеть житіе его добродѣтелное и чюдное и преизящное, да не забвены будуть добродѣтелі его многыя и великая исправленіа, да не заб'вены будуть благыя обычая и доброн'равныя образы, да не будуть бес памяти сладкая его словеса и любезныа его глаголы, да не останеть бес памяти таковое удивленіе, иже на немъ удиви Богъ милость свою и дарова намъ видѣти такова мужа свята, велика стар'ца, иже бысть во дни наша.

О възлюблен'ніи! въсхотѣхъ умол'чати многыя его добродѣтели, ıaкоже предрекохъ, но обаче в'нутрь желаніе нудит' мя глаголати, а недостоиньство мое запрещает ми мол'чати; помыслъ болѣзный предваряеть, /л. 679 а./ веля ми глаголати, скудость же ума заграждають ми уста, веляще ми умолк'нути. И понеже бо обдер'жимъ есмь и побѣждаемъ обѣма нуждома, но обаче лучше ми есть глаголати, да пріиму поне малу нѣкую ослабу и почію отъ многыхъ помыслъ, смущающихъ мя, въсхотѣвь нѣчто отъ житіа святаго повѣдати, сирѣчь отъ многа мало; и в'земъ, написахъ и положихъ здѣ в' худѣмъ нашемъ гранесьсловіи, на славу и честь Святѣй и Живоначал'нѣй Троицы и Пречистѣй Его Матери, и на похвалу преподобному отцю нашему Сергію, худымъ своимъ разумомъ и растлѣн'нымъ умомъ; наипаче же усумних'ся дерьзая, но надѣахъся на молитву блажен'наго, понеже житіе его добродѣтельно есть и свер'шено и отъ Бога прославленъ бысть; азъ же убоıaхся, ıaко немощенъ есмь, грубъ же и умовреденъ сый; но обаче подробну глаголю, невъз'мож'но бо есть постигнути до конечнаго исповѣданіа, ıaкоже бы кто моглъ исповѣдати доволно о преподобнемъ семъ и отцы нашемъ и великомъ стар'ци, иже бысть во дни наша и времена и лѣта, и въ странѣ и въ ıaзыцѣ /л. 679 б./ нашемь поживе на земли ангельскимъ житіемъ, стяжа тер'пѣніе крѣп'ко и въздер'жаніе твер'до, и въ дѣвьствѣ и чистотѣ и целомудріи, свер'шивъ святыню во страсѣ Божіи, и сподобленъ бысть Божественыя благодати: понеже отъ юности очистися церкви быти Святаго Духа и преуготова себѣ сосудъ святъ і избранъ, да вселится Богъ в онь, по апостолу глаголющю: братіе, вы есте церкви Бога живаго, ıaкоже рече Богъ: вселюся в' ня и похожу.

Сій убо преподобный отецъ нашь Сергіе из дѣтьска възраста и отъ юны вер'сты и отъ младыхъ ноготь предасться Богу, и отъ самыхъ пеленъ Богу освятися, и из'млада церкви вел'ми предстояше, и часто в' ню ходя, поучаяся въ святыхъ книгахъ, навыкъ Божественая писаніа и сладостно ихъ послушая и в нихъ всегда поучашеся, ıaкоже пророкъ Давыдъ рече: поучится день и нощь, и будеть ıaко древо сажденно прі исходищихъ водъ, иже плодъ свой дасть во в'ремя свое; изылада бо възлюби мнишескій чинъ и в онь обол'къся, из'млада во в'сякой добродѣтели прилѣж'но постив'ся и всяку добродѣтель иноческаго житіа исправи, и свѣтъ благодатный /л. 679 в./ възсіа в' сердци его, и просвѣтися помыслъ его благодатію духовною, еюже предспѣаше в' житіи добродѣтельнемъ.

И въздер'жаніе веліе стяжа в' себѣ, смиреномудріе, целомудріе и ко всѣмъ любовь нелицемѣр'ну. Слава же и слышаніе пронесеся о немъ пов'сюду, и вси слышащеі издалеча притекааху к нему, и великъ успѣхъ и многу пользу и спасение пріимаху отъ него: дасть бо ему Господь разумъ о всемъ и слово утѣшеніа даровася ему, могый утѣшити печал'ныя. Сице же бѣ т'щаніе его, да не прил'петь умъ его никацѣх'же вещехъ земныхъ и житійскыхъ печалехъ, и ничтоже не стяжа себѣ притяжаніа на земли, ни имѣніа отъ тлѣн'наго богатьства, ни злата, ни среб'ра, ни с'кровища, ни храмовъ свѣтлыхъ и превысокихъ, ни домовъ, ни селъ красныхъ, ни ризъ многоцен'ныхъ, но сице стяжа себѣ паче всѣхъ истин'ное нестяжаніе и безъимѣньство, и богатьство нищету духовную, смиреніе без'мѣрное и любовъ нелицемѣр'ную, равну ко всѣмъ человѣкомъ, и всѣхъ в'купѣ равно люб'ляше и равно чтяше, не избирая, ни судя, ни зря на /л. 679 г./ лица человѣкомъ и ни на когоже възносяся, ни осужаа, ни клевеща, ни гнѣвомъ, ни ıaростію, ни жестостію, ни лютостію, ниже злобы дер'жа на кого; но бяше слово его благодати солію растворено, со сладостію и с любовію.

К'то бо слыша добрый его и сладкый отвѣтъ, не насладися когда отъ сладости словесъ его? или кто зря на лице его, не веселяшеся? или кто видя святое его житіе, не покаася? или кто видя кротость его и незлобіе, и не умилися? или кто сребролюбецъ бысть, видя его нищету духовную, и не подивися? или к'то похищникъ и гор'достію превъзносяйся, видя его высокое смиреніе, и не почюдися? или кто блуд'никъ бысть, видя чистоту его, и не пременися отъ блуда? или кто гнѣвливь и напрасенъ бесѣдуяй с нимъ на кротость не преложися? Нѣсмь бо азъ видѣлъ во дни сіа и в нынѣшняа времена и в наша лѣта сицева мужа свята и совер'шена во всяко дѣло благо и украшена всякою добродѣтелію всячески, ıaкоже отъ прочихъ святыхъ, иже кто възлюбленъ есть отъ Бога, ıaкоже сей преподобный Сергіе?

Сей ми есть и пръвый и послѣдній в' нынешняа /л. 680 а./ в'ремена; сего Богъ проıaвилъ есть в' послѣдняа времена на скон'чание вѣка и послѣднему роду нашему; сего Богъ прославилъ есть в' Руской земли на скон'чаніе седмыя тысяща; сей убо преподобный отецъ нашь провъсіалъ есть во странѣ Рустѣй, ıaко свѣтило пресвѣтлое възсіа посреди т'мы и мрака, и ıaко цвѣтъ прекрасный посреди терніа и вол'чецъ, і ıaко звѣзда незаходимая, и ıaко луча тайно сіающа и блистающи, и ıaко кринъ въ юдоліи мир'скыихъ, и ıaко кадило благоюханное, ıaко ıaблоко добровонное, ıaко шипокъ благоухан'ный, и ıaко злато посреди бръніа, и ıaко сребро раждежено і искушено и очищено седморицею, и ıaко камень честный, ıaко бисеръ многоцѣнный, ıaко измараг'дъ и сам'фиръ пресвѣтлый, ıaко финиксъ процвѣте и ıaко кипарисъ при водахъ, ıaко кедръ иже в Ливанѣ, ıaко маслина плодовита, ıaко раматы благоюханіа, ıaко миро изліанное, ıaко садъ благоцвѣтущь, и ıaко виноградъ плодоносенъ, и ıaко гроздъ многоплоденъ, и ıaко оградъ заключенъ, и ıaко вертоградъ затворенъ, ıaко сладкый запечатлѣн'ный источникъ, /л. 680 б./ ıaко сосудъ изб'ранъ, ıaко алавастръ мѵра многоцѣн'наго, ıaко градъ нерушимъ, и ıaко стѣна неподвижима, и ıaко забрала твер'да, и ıaко сынъ крѣпокъ и вѣренъ, и ıaко основаніе церковное, ıaко столпъ непоколѣбимъ, ıaко вѣнець пресвѣтлый, ıaко корабль і исполнь богатьства духовнаго, ıaко земный ангелъ, ıaко небесный человѣкъ.

Успе же старець о Господѣ въ старости глубоцѣ, добрѣ поживъ, въ преподобіи и прав'дѣ и целомудріи, въ смиреномудріи, въ всякой чистотѣ и святыни, исполнь дній духовныхъ; и преставися отъ житіа сего лѣтъ седмидесять, чер'нечествова же лѣтъ 50, съ всякимъ прилежаніемъ и въздер'жаниемъ, не лѣностію когда с'дер'жимъ, но с бодростію и со мнозѣмъ трезвѣніемъ, и всѣхъ инокъ предуспѣ в' родѣ нашемъ труды своими и терпѣніемъ, и многыхъ прев'зыде добродѣтел'ми і исправленіи своими.

Что же наше житіе или что наше пребываніе противу святаго подвигомъ и прочимъ добродѣтелемъ? ничтоже есть наше чернечество, и наша молитва ıaко стѣнь есть; и колико растоаніе имать востокъ отъ западъ, сице намъ есть /л. 680 в./ неудобь постигнути житіа блаженнаго и предивьнаго мужа. Се ти есть житіе его и сицевы труды его и исправленіа и подвизи и пóтове и мнози болѣзни, еже отъ многа нѣчто понудихом'ся, аще и не по чину положихомъ, ни по достоанію написахомъ.

Егда же приспѣ время преставления его, заповѣда ученикомъ своимъ и не повелѣ имъ в' церкви положитися, но в' новѣ церкви тако просто повелѣ погребьстися с' прочими братіами. Братіа же слышавъше сіа отъ святаго, зѣло скор'бни быша и о семъ въспросиша пресвятѣйшаго архіепископа. Тогда же бѣ въ преславнемъ и преславущемъ гради великомъ Моск'вѣ украшаай престолъ Пресвятыа и Преславныя Владычица наша и Богородица преосвященный Кипріянъ митрополитъ; поразсмотривъ и порас'судивъ в' себѣ, како и гдѣ погребется блаженый, и благослові и повелѣ имъ положити его въ церкви на правой странѣ, еже и бысть: положено бысть тѣло преподобнаго въ церкви, юже самъ созда, и възд'виже, и устрои, и соверши, и украсі ю всякою подобною красотою; и нарече сію быти во имя Святыя и Живоначал'ныя и Нераздѣли/л. 680 г./мыя и Единосущныа Троица, во честнѣмъ его монастыри и пресловущей лав'рѣ и велицей оградѣ и въ слав'нѣй обители, юже самъ согради, и совокупи и устрои; идѣже братію собра, словесное стадо Христово; и спасеную паству упасе я в незлобіи сердца своего, и вразуми, и настави; идѣже и самъ одѣанъ бысть во иноческый образъ, паче же ангельскый, и многы т'мами темъ труды положи, и неисчетныя подвигы показа; идѣже непрестан'ныя молитвы сотвори; идеже повседнев'ныа и нощныя пѣніа и благодареніа славослов'ляше и Бога воспѣваше; идеже многолѣтное и многострадал'ное теченіе свое препроводи и укрѣпи, не исходя отнудъ отъ мѣста своего въ иныя предѣлы, развѣ нужда нѣкыя.

Не в'зыска царствующаго града, ни Святыя горы или Іеросалима, ıaкоже азъ окаанный и лишеный разума; у, лютѣ м'нѣ, увы мнѣ! пользая сѣмо и овамо, и преплываа сюду и овоюду, и отъ мѣста на мѣсто преходя; но не хождаше тако преподобный, но в' мол'чаніи добрѣ сѣдяше и себѣ внимаше; ни по многимъ мѣстомъ, ни по дал'нимъ странамъ хождааше, но /л. 681 а./ во единомъ мѣстѣ живяше и Бога воспѣваше: не искаше бо суетныхъ спротив'ныхъ вещей, еже нетребѣ ему бысть, но паче всего в'зыска единаго истин'наго Бога, иже чимъ есть душа спасти, еже и бысть: ищете бо, рече, и обрящете, тол'кущему отверьзается. Кто бо нынѣ тако в'зыска Бога всѣмъ сердцемъ и отъ всея душа възлюби, ıaкоже сей преподобный отьцъ нашь, ıaкоже пророкъ рече: всѣмъ сердцемъ моимъ в'зыска Тебе; и паки: в'зыскахъ Господа, и услыша мя.

Въ время же преставленіа его собрася множество народа отъ градъ и отъ странъ многыхъ, койждо желаше со многымъ желаніемъ приближитися и прикоснутися честнѣмъ телесѣ его, или что в'зяти отъ ризъ его на благословление себѣ. Поболѣвь убо старець нѣколико в'ремя, и тако преставися ко Господу, к' вѣчнымъ обителемъ, из'сушивъ тѣло свое постомъ и молитвами, истончивъ тѣло; и умертвивъ уды сущая на земли, страсти телесныя покори духови, побѣдивь в'реды душевныа, поправь сласти житейскіа, отвер'гъ зем'наго попеченіа, одолѣвь страстнымъ стремленіемъ, презрѣвъ ми/л. 681 б./рьскую красоту, злато и сребро и прочая имѣнія прелестная свѣта сего ıaко худая в'мѣнивь и презрѣвъ, и лег'цѣ преплувъ многомутное житейское море и безъ вреда препроводи душевный корабль, исполнь богатьства духовьнаго, беспакостно дойде в' тихое пристанище, и достиже, и крилома духов'ныма воск'рилися на высоту разумную, и венцемъ бестрастіа украсися, преставися къ Господу и пріиде отъ смерти в' животъ, отъ труда в' покой и отъ печали в радость, отъ подвига въ утѣшеніе, отъ скор'би в' веселіе, отъ суетнаго житіа в' вѣчную жизнь, отъ малов'ремен'наго вѣка в' вѣки бесконечныя, отъ тля в' нетлѣніе, отъ силы в' силу, отъ славы въ славу. И вси обрѣт'шеися пришедшеи ту плакахуся его.

Князи и боляре и прочіи вел'можи, и честнѣи игумени, попы же и діяконы, і инокъ множество и прочіи народи, со свѣщами и кандилы проводиша честно священныя его и страстотерп'ческыя мощи, пѣвше надъ нимъ обычная пѣніа, и благодарив'ше надгробныя пѣсни, и довол'но молитво/л. 681 в./вав'ше, опрятав'ше и благочиннѣ положиша ѝ въ гробѣ, ıaкоже прежде речеся; и на многъ часъ плакав'ше над' нимъ довол'но, едва разыдошася въ своя, многа плача и печали напол'нишася. Наипаче непрестан'ныхъ слезъ, иже ему бѣша присніи ученици и любиміи послушници в' паствѣ его живущеи зило вси скорб'ни быша и хождаху сѣтующе, и въздыхающе, и рыдающе, стенюще, смирени, слезни, дряхли, печал'ни, умилени, поникли, не имуще утѣшеніа; и другь друга сретающе и въпрашающе и со многими слезами умилено глаголаху: прости, отче, и благослови, възлюблен'ный о Христѣ брате! се добрый и блаженый нашь старець отъ насъ ко Господу отъиде, и насъ сирыхъ оставивъ, изыде тамо, идеже есть мзда веліа и възданіе по дѣломъ его и многымъ трудомъ его; изыде с миромъ ко Господу, Его же възлюби измлада; ýспе сномъ вѣчнымъ и дол'жнымъ и ночи о Господи в покой вѣчный, ток'мо насъ сирыхъ оставль; тѣмь нынѣ и мы по немь жадаемь и плачемся, ıaко остахомъ его и обнищахомъ зѣло, ıaко осирѣхомъ и умалихом'ся, ıaко сми/л. 681 г./рихомся и уничижихом'ся, ıaко оскор'бихомся и оубожихом'ся, изумлени быхомъ ıaко стадо бес пастыря и корабль бес кор'мника, ıaко виноградъ многоплодный бес стража и болящій без в'рача; быхомъ смущени и отвер'жени. Сіа таковая и подобная симъ, по немъ скор'бяще и плачюще, глаголаху. Мнози же убо елици к нему вѣру и любовь имуще не ток'мо в' животѣ, но и по смерти, ко гробу его присно приходяще, и со страхомъ притекающе, и вѣрою приступающе, и любовію припадающе, и съ умиленіемъ приничюще, и рукамя обьемлюще, святолѣпно и благоговѣйно осязающе, очима и главами своими прикасающеся, и любезно целующе мощі его, и устнами чистыми лабызающе, и вѣрою теплою и горящимъ желаніемъ и многою любовію бесѣдующе к нему, аки живу, по истинѣ и по успеніи живому, и со слезами глаголюще к нему:

О святче Божій и угодниче Спасовъ! о преподобниче и избран'ниче Христовъ! о священная главо, преблажен'ный ав'ва Сергіе великій! не забуди насъ, твоихъ рабъ убогыхъ, не забуди насъ нищихъ /л. 682 а./ своихъ до кон'ца; но поминай насъ всегда во святыхъ своихъ и благопріатныхъ молитвахъ ко Господу; помяни стадо свое, ıaже самъ паствилъ еси, и не забуди присѣщати чадъ своихъ; моли за ны, отче священ'ный, за дѣти своя духовныя, ıaко имѣя дерьзновеніе къ небесному Царю, и не премол'чи въпіа за ны къ Господу, и не презри вѣрою и любовію чтущихъ тя; помяни насъ недостойныхъ у престола Вседер'жителева; не престай моляся о насъ къ Христу Богу, тебѣ бо дана бысть благодать за ны молится; не мнимъ бо тя мертва суща, аще и тѣломъ преставися отъ насъ, но не отступи отъ насъ духомъ, пастуше нашь добрый; се бо мощей твоихъ гробъ предъ очима нашима видимъ есть всегда, но святая твоя душа невидимо со ангельскыми воиньствы, со бесплотними лики, со небесными силами у престола Вседер'жителева и в лѣпоту достойно веселится.

Намъ бо суще свѣдущимъ тя, ıaко живу ти и по смерти сущю, тако бо писано есть пророкомъ: душа праведныхъ в руцѣ Божіи и не прикоснется ихъ мука; упованіе ихъ исполнь бесмертіа, ıaко Богъ искусі а, и обрѣте ихъ достойны себѣ; ıaко злато искусі а, и ıaко /л. 682 б./ всесож'женіа пріать ıa; ıaко благодать и милость во избранныхъ Его и посѣщеніе на преподобныхъ Его. Праведници бо, рече, въ вѣки живутъ, мьзда ихъ отъ Господа и строеніе ихъ отъ Вышняго; сего ради пріимуть царствіе красоты и вѣнець доброты отъ руки Господня. Память праведнаго с пох'валами бываеть и благословеніе Господне надъ главою праведнаго; аще и преставится праведный, в' покои будеть; старость бо честна не многолѣтна, ни в' числѣ лѣтъ изочтена суть; сѣдины же суть разумъ человѣкомъ, лѣта же старости житіе неск'вернено. Угоденъ Богу бывъ и възлюбленъ бывъ, живый посреди грѣшникъ преставленъ бысть, да не злоба измѣнить разума его и лесть да не помрачить душю его; скон'чався в' малѣ, исполни лѣта многа: угодна бо бѣ Господеви душа его. Того ради любить Господь праведника, сохранить ѝ, живить ѝ, и ублажить его на земли, и не дасть въ вѣки смятеніа праведнику, ниже дасть видѣти истлѣніа преподобному своему; ıaко высокъ Господь на смиреныя призираеть, и приемля кроткыя Господь, и близъ есть всѣмъ призы/л. 682 в./вающимъ Его истин'ною; волю боıaщихся Его сотворить и молитву ихъ услышить и спасеть я; хранить Господь вся любящая Его; любить Господь преподобныхъ сердца, пріати же Ему вси непорочніи в' путь; хранить Господь вся кості ихъ и ні едина отъ нихъ не сокрушится; похваляему убо праведнику възвеселятся людіе. Се тако благословится человѣкъ боıaйся Господа, и иже живый в' помощи Вышняго въ кровѣ Бога небеснаго въдворится; насажденъ в' дому Господни, въ дворѣхъ дому Бога нашего процвѣтеть и ıaко кедръ, иже в Ливанѣ, умножится. Си есть слава церковьная, слава си есть всѣмъ преподобнымъ Его.

Радуйтеся праведніи о Господѣ, праведнымъ подобаеть похвала. В' память вѣчную будеть праведникъ и родъ праведнымъ благословится. Мнѣ же зѣло честни быша друзи Твои Боже, зило утвер'дишася владычествіа ихъ, ıaкоже рече Павелъ апостолъ: братіе, радуйтеся о Господѣ, и паки, рече, радуйтеся. И рече праведникъ: понеже убо смирихся и спасе мя Господь; сего ради обратися душа моя в' покой Твой, ıaко добро створи тебѣ Господь, ıaко изять душю мою отъ смерти, очи мои /л. 682 г./ отъ слезъ, нозѣ мои отъ въспопол'зновеніа; угодихъ предъ Господемь въ странѣ живущихъ. Се покой мой въ вѣкъ вѣка, з'де вселюся; изволихъ преметатися в дому Бога моего паче, неже жити ми в селехъ грѣшничихъ. Ког'да пріиду и ıaвлюся лицю Божію, въ гласѣ радованіа и исповѣданіа шума празнующаго? Тѣмже не умру, но живъ буду и исповѣмъ дѣла Господня; показуя наказа мя Господь, смерти же не предасть мене: Отвер'зете мнѣ врата правды, и вшедъ в' ня исповѣмся Господеви, глаголя: Господи Боже силъ! коль възлюблен'на села твоя, Господи; желаеть душа моя скончатися въ дворы Твоя, ıaко луч'ши есть день единъ въ дворѣхъ, паче тысящь; и ıaко тысяща лѣтъ предъ очима Твоима, Господи, ıaко день в'черашній, иже мимоидеть; и ıaко желаеть елень на источники водныя, тако въжада душа моя к тебѣ, Боже; ıaко всѣмъ есть веселящим'ся жилище у Тебе и источникъ животу. Блажени живущеи в' дому Твоемъ, въ вѣкъ вѣка въсхвалят' Тя. Блажени кротци, ıaко тіи наслѣдять землю и обладають ею. IЯвѣ, ıaко праведници и кротці и сми/л. 683 а./реніи сердцемъ, тѣ наслѣдятъ землю тиху и безъмлъвну, веселящю всегда и наслажающу не ток'мо телеса, но и самую душю неизречен'наго веселіа непрестан'но исполняюще, и на ней вселятся въ вѣкъ вѣка.

Тако и сей преподобный отецъ нашь Сергіе того ради вся красная мира сего презри и сіа въжделѣ и сию прилѣж'но възыска, землю кротку н безмолъвну, землю тиху и безмятежну, землю красну и всякого исполнь утѣшеніа, ıaкоже сама истин'на рече въ святомъ еѵангеліи: толцай отвер'зеть себѣ, і ищай обрѣте безъцѣн'ный бисеръ, рекше Господа нашего Ісуса Христа и Царьство Небесное отъ Него въспріатъ, егоже буди всѣмъ намъ получити благодатію Господа нашего Ісуса Христа, Емуже подобаеть всяка слава, честь и поклоняніе съ безначал'нымъ Его Отцемъ и Пресвятымъ и Благымъ и Животворящимъ Его Духомъ, нынѣ и присно и в вѣки вѣкомъ. Аминь.

Печатается по изданiю: Великiя Минеи Четiи, собранныя всероссiйскимъ Митрополитомъ Макарiемъ. [Выпускъ третiй:] Сентябрь, дни 25-30. / Подъ редакцiей П. Савваитова. – Изданiе Археографической Коммиссiи. – СПб: Типографiя Императорской Академiи наукъ, 1883. – стлб. 1563-1578.

Наверхъ / Къ титульной страницѣ

0