Святоотеческое наследие
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Святоотеческое наслѣдiе
-
Гостевая книга
-
Новости
-
Написать письмо
-
Поискъ

Святые по вѣкамъ

Изслѣдованiя
-
I-III вѣкъ
-
IV вѣкъ
-
V вѣкъ
-
VI-X вѣкъ
-
XI-XV вѣкъ
-
Послѣ XV вѣка
-
Acta martyrum

Святые по алфавиту

Указатель
-
Свт. Іоаннъ Златоустъ
А | В | Г | Д | Е
-
З | И | І | К | Л
-
М | Н | О | П | Р
-
С | Т | Ф | Х | Э
-
Ю | Ѳ
Сборники

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 28 апрѣля 2017 г. Сейчасъ на порталѣ посѣтителей - 19.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

XI-XV ВѢКЪ

Мѣсяца Июля въ 15 день.
Память и похвала князю рускому Володимеру, како крестися Володимерь, и дѣти своя крести и всю землю Рускую отъ коньца и до коньца, и како крестися баба Володимерова Ольга прежде Володимера.
Списано Ияковомъ мнихомъ. Господи, благослови, отче.
[1]

Паулъ (Павелъ) святый Апостолъ, церковный учитель и свѣтило всего мира (міра), посылая к Тимофію писаніе, глаголаше: чадо, Тимофію, еже слыша отъ мене многы послухы, тоже предажь и вѣрнымь человѣкомъ, иже довольнѣ будуть и ины научити [2]. И блаженный Апостолъ Лука Евангелистъ глаголеть, к Феоѳилу писаше, глаголя: понеже мнози начяша повѣсти дѣяти о извѣстныхъ вещехъ, бывшихъ въ нась, изволися и мнѣ ходившю исперва и по всѣхъ писати тебе, державныи Феофиле, да разумѣеши о нихже начя Ісусъ творити же и учити [3]. К тому Феофилу написа Дѣяніа Апостольска и Евангеліе святый Апостолъ Лука. Потомъ многыхъ Святыхъ писати начяша житіа и мученiя. Такоже и азъ, худый мнихъ Ияковъ, слышавъ отъ многихъ о благовѣрнемъ князѣ Володимери всея Рускыа земля, о сыну Святославлѣ, и мало събравъ оть многыхъ я добродѣтели его написахъ, и о сыну его, реку же святую и славную мученика Бориса и Глѣба, — како просвѣти благодать Божіа сердце князю рускому Володимеру, сыну Святославлю и внуку Игореву, и възлюбивый [4] человѣколюбивый Богъ, хотяй спасти всякого человѣка и в разумъ истинный пріити, и вжада святого крещеніа. Якоже жадаеть елень на источникы водныя: [5] тако вжада благовѣрный князь Володимеръ святого крещеніа, и Богъ сътвори хотѣніе его. Пишетъ бо: вълю (волю) боящихся его сътворить, и молитву ихъ услышить, и спасеть я; [6] и самъ рече Господь: просите и приимете, ищете и обрящете, толцѣте и отверзется вамъ; всякъ просяй приметь, ищай обрящеть, толкущему отверзается; [7] и пакы рече: иже вѣру иметь, крестится, и спасенъ будеть, а иже вѣры не имать, не крестится, уже осуженъ будеть [8]. Взыска спасеніа, и прія отъ бабѣ [9] своей Олзѣ, како шедши ко царю городу, и прияла бяше святое крещеніе, и пожи добрѣ предъ Богомь, всѣми добрыми дѣлы украсившися, и почи с миромъ о Христѣ Ісусѣ и въ вѣрѣ блазѣ. То все слышавъ князь Владимеръ отъ бабѣ своей Олзѣ, нареченнѣй въ святомъ крещеньи Елена, — тоя и житіе подража, святыя царица Елены, блаженыя княгыни Олги, — то слышавъ Владимеръ, разгарашется Святымъ Духомъ сердце его, хотя святого крещеніа. Видя ж Богъ хотѣніе сердца его, провидя доброту его и призри съ небесѣ милостію своею и щедротами; и въ Троици славимый, князя Володимера [10], испытая сердца и утробы, Богъ праведенъ, вся прежде вѣдый, и просвѣти сердце князю Рускыя земли Володимеру прiати святое крещенiе.

Крестижеся самъ Володимеръ, и чяда своя и весь домъ свои святымъ крещенiемъ просвѣти, и свободи всяку душю, мужескъ полкъ (полъ) и женескъ, святого ради крещенiа. И възрадовася, и възвеселися о Бозѣ давидьскый князь Володимеръ, и, акы святы (святый) пророкъ дивный Аввакумъ, о Бозѣ Спасѣ веселяся и радуяся о Бозѣ Спасѣ своемъ. О, блаженное время и день добрый, исполненъ всего блага, в оньже крестися Володимеръ князь! И нареченъ бысть во святомъ крещенiи Василей, и даръ Божiй осѣни его, благодать Святаго Духа освѣти сердце его, и навыче по заповѣди Божiи ходити и житии до [11] Бозѣ, и вѣру тверду удержа неподвижиму. Крести же и всю землю Рускую отъ коньца и до коньца, и поганьскыя богы, пачежъ и бѣсы, Перуна и Хроса (Хороса) и ины многы, попра, и съкруши идолы, и отверже всю безбожную лесть. И церковь созда камену во имя Пресвятыя Богородица, прибѣжище и спасенiе душамъ вѣрнымъ, и десятину ей вда, тѣмъ попы набдѣти, и сироты, и вдовица, и нищая. И потомъ всю землю Рускую и грады вся украси святыми церквами, и отвержеся всея дьяволя льсти, и прiиде оть тмы дьяволя на свѣтъ, с чады своими прiиде къ Богу, крещенiе прiимъ, и всю землю Рускую исторже из устъ дьяволь и къ Богу приведе, и къ свѣту истинному. Рече бо Господь пророкомъ: изводяй отъ нечестия нечестиваго, акы уста моя еси [12], и бысть князь Володимеръ, акы уста Божiа, и человѣкы отъ лести дьяволя къ Богу приведе [13]. О, колика радость и веселiе бысть на земли! И Ангели възвеселишася, и Архангели, и Святыхъ дуси възыграшася. Самъ рече Господь, колика радость бываетъ на небесѣхъ о единѣмъ грѣшницѣ кающимся [14]. Толико бещисла (безъ числа) душь по всей земли Руской приведены къ Богу святымъ крещенiемъ! Похвалы всякыя дѣло то достойно сътвори, и радости духовныя полно.

О, блаженный и треблаженный княже Володимере, благовѣрне, и Христолюбиве, и страннолюбче! Мьзда твоя многа зѣло предъ Богомъ. Тоже блаженый Давыдъ глаголаше: блаженъ человѣкъ, егоже Ты накажеши, Господи, отъ закона твоего научиши, и да укротиши отъ днiй людъ [15]. Блаженый князь Володимеръ, уклонився отъ службы дьяволя, и прiиде къ Христу Богу Владыцѣ своему, и люди своя приведе, и научи я служити Богу. Самъ бо Господь рече: иже сътворить и научить, сей великъ наречется въ царствiи небеснемь [16]. А ты, о блаженый княже Володимерю, бысть Апостолъ въ князехъ, всю землю Рускую приведъ къ Богу святымъ крещенiемъ, и научи люди своя кланятися Богу, славити и пѣти Отца и Сына и Святаго Духа. И вси людие Рускыя земля познаша Бога тобою, божественный княже Володимере! Възрадовашажеся Ангельстiи чини, агници чистiи; нынѣ радуються вѣрнiи, и воспѣша, и въсхвалиша. Акы младенци иеврѣйстiи с вѣтвьми усрѣтоша Христа, вопiюще: осанна Христу Богу, побѣдителю смерти: тако и новоизбраннiи людiе Рускыя земля, но въсхвалиша [17] Владыку Христа съ Отцемъ и съ Святымъ Духомъ, къ Богу приближившеся крещенiемъ, и дьявола отвергъшеся, и службы его поругашася, и поплеваша бѣсы, и познаша Бога истиннаго. Творца и Съдѣтеля всей твари, и поютъ по вся дни живота и на всякъ часъ пѣснь чюдную, хвалу Архангельскую: слава въ вышнихъ Богу, и на земли миръ, въ человѣцехъ благоволенiе [18]. И ты, блаженный княже Володимерю, подобно Констянтину великому, сътвори. Якоже онъ вѣрою великою и любовiю Божiею подвихся, утверди всю вселенную любовiю и вѣрою, и святымъ крещенiемъ просвѣти весь миръ, и законъ Божiй по всей вселеннѣй заповѣда; и раздруши (разруши) храмы идольскыя со лжеименными быти [19], и святыя же Церкви во всей вселеннѣй постави на хвалу Богу, въ Троици славимому, Отцю и Сыну и Святому Духу; крестъ обрете всего мира (мiра) и спасенiе съ божественою и богомудрую матерью своею святою Оленою; и с чяды многы приведе къ Богу святымъ крещенiемъ бесщисленное (безчисленное) множество, и требища бѣсовьская потреби, и храмы идольскыя раздруши, и церквами украси всю вселенную и градъ, и заповѣда въ церквахъ памяти святыхъ творити, пѣнiи и молитвами и праздникы праздновати на славу и на хвалу Богу: такоже и блажены(й) князь Володимеръ сътвори с бабой своею Олгою.

Похвала княгинѣ Ольгѣ, како крестися и добрѣ поживе по заповѣди Господни. [20]

Та бо блаженая княгыни руская Олга, по смерти мужа своего Игоря, князя рускаго, освящена бывши Божiею благодатiю и въ сердци прiимши Божiю благодать. О, како похвалю блаженную княгыню Олгу, братiе. Не вѣдѣ. Тѣломъ жена сущи, мужеску мудрость имѣющи, просвѣщена Святымъ Духомъ, разумѣвши Бога истиннаго, Творца небу и земли, въставьши иде в землю Грѣческую, въ Царьградъ, идѣже цари крестьяны и крестьяньство утвердися, и пришедши проси крещенiа, и прiимши святое крещенiе възвратися в землю Рускую, в домъ свой, к людемъ своимъ, с радостию великою, освящена духомъ и тѣломъ, несущи знаменiе честнаго креста. И потомъ требища бѣсовьская съкруши, и начя жити о Христѣ Iсусѣ, възлюбивши Бога всѣмъ сердцемъ и всею душею, и пойде въ слѣдъ Господа Бога, всими (всѣми) добрыми дѣлы освѣтившися, и милостынею украшьшися, нагыя одѣвающи, жадныя напаяющи, и странныя упокоющи, нищая и вдовица и сироты – вся милующи, и потребу дающи всяку с тихостiю и любовiю сердца, и молящи Бога день и нощь о спасенiи своемъ. И тако поживши, и добрѣ славящи Бога въ Троици, Отца и Сына и Святаго духа, почи въ блазѣ вѣрѣ, скончя житiе свое с миромъ о Христѣ Iсусѣ, Господѣ нашемъ. И Богъ прослави тѣло своея си Олены, ейже имя въ святомъ крещенiи наречено блаженыя княгыни Олги, и есть въ гробѣ тѣло ея честное, и нераздрушимо пребываетъ и до сихъ дней. Богъ бо своя рабы славитъ; рече бо пророкъ: славящая мя прославлю и укоряяй бесщести (безъ чести) будетъ (1 Цар. 2, 30). Блаженная бо княгыни Олга прослави Бога всѣми дѣлы своими добрыми, и Богъ прослави ю. Ино чюдо [21] слышите о ней: въ гробѣ, идѣже лежитъ блаженное и честное тѣло блаженныя княгынѣ Олгы [22]; гробъ каменъ малъ въ церкви святыя Богородица, – ту церковь създа блажены князь Володимеръ каменую в честь святѣй Богородици, и есть гробъ блаженыя Олги, и на верху гроба оконце сътворено, и туда видѣти тѣло блаженыя Олгы, лежаше цѣло, да иже с вѣрою придеть, отворится оконце, и видѣть честное тѣло лежаще цѣло, и дивятся чюду таковому, толико лѣтъ въ гробѣ лежащю тѣлу неразрушимуся. И человѣци же вѣрнiи видѣвше чюдо толико славять Бога, дивящеся милости Божiей, юже имать на Святыхъ своихъ. О, дивное и страшное чюдо, братiе, и преславно! Достойно и похвалы всякоя тѣло то честное: въ гробѣ цѣло, акы спя, почиваетъ! Поистинѣ, дивенъ Богъ во святыхъ своихъ, Богъ Израилевъ [23]. То вѣдяще, вѣрнiи человѣцѣ прославять Бога, прославляющаго рабы своя. А другымъ, иже не с вѣрою приходять, не отворится оконце гробное, и не видять тѣла того честнаго, но токмо гробъ. Тако Богъ прослави рабу свою Олгу, рускую княгыню, нареченую въ святомъ крещенiи Елена! По святомъ же крещенiи си блаженная княгыни Олга живе лѣтъ 15, и угодивъ Богу добрыми дѣлы своими, и успе Мѣсяца Июля въ 11 день въ лѣто 6477-е, душю свою честную предавши в руцѣ Владыцѣ Христу Богу. Послушайте, възлюбленiи!

О, [24] блаженый же князь [25] Володимеръ внукъ Овжинъ (Ольгинъ) крестився самъ, и чяда своя и всю землю Рускую крести отъ конца и до конца; храмы идольскыя и требища всюду раскопа, и посѣче, и идолы съкруши; и всю землю Рускую, и грады, и честными иконами Церкви, украси; и памяти Святыхъ въ церквахъ творяще пѣнiемъ и молитвами; и праздноваше свѣтло праздникы Господьскыя, три трапезы поставляше: первую митрополиту съ епископы и съ черноризьцѣ и с попы, вторую нищимъ и убогымъ, третьюю собѣ и бояромъ своимъ и всѣмъ мужемъ своимъ. Подобяся царемъ святымъ, блаженый князь Володимеръ, Пророку Давиду, царю Езекѣю, и треблаженному Иосѣю, и великому Констянтину, иже избраша и изволиша Божiй законъ боле всего, и послужиша Богу всѣмъ сердцемъ, и получиша милость Божiю, и наслѣдиша рай, и прiаша царство небесное, и почиша съ всѣми Святыми, угожьшими (угодившими) Богу: такоже блаженый князь Володимеръ, послуживъ Богу всѣмъ сердцемъ и всею душею [26]. Не дивимся, възлюбленѣи, аще чюдесъ не творить по смерти: мнозѣ бо Святѣи, праведнѣи, не сътвориша чудесъ, но святи суть. Рече бо нѣгдѣ о томъ святый Iоаннъ Златоустъ: отъ чего познаемъ и разумѣемъ свята человѣка? Отъ чудесъ ли, или отъ дѣлъ? И рече: отъ дѣлъ познати, а не отъ чюдесъ. Много бо и волъсви чюдесъ сътвориша бѣсовьскымъ мечтанiемъ; и бяху святѣи Апостолѣ, и бяху лжии (лживые) Апостолѣ; бѣша святѣи пророцѣ, и бяху лжии пророцѣ, слугы дьяволя; ино чюдо, и самъ сотона преображается въ ангелъ свѣтелъ. Но отъ дѣлъ разумѣти Святаго, якоже Апостолъ рече: плодъ духовный есть любы, терпѣние, благовѣрѣе, благость, кротость, и въздержанiи, на таковыхъ нѣсть закона [27]. Блаженый же князь Володимеръ всѣмъ сердцемъ и всею душею Бога възлюби, и заповѣди Его взыска и съхрани. И вся страны бояхуся его, и дары приношаху ему. И възвеселися, и възрадовася о Бозѣ и о святѣмъ крещеньи, и хваляше, и славяше Бога о всемъ томъ князь Володимеръ, и сице в радости смирениемъ сердца глаголаше: «Господи, Владыко благый! Помянул мя еси, и привел мя еси на свѣтъ, и познах Тя, всея твари Творца. Слава Ти, Боже всѣхъ, Отче Господа Бога нашего Iсуса Христа! Слава Ти съ Сыномъ и Святымъ Духомь! Сице мя помиловавъ! Во тмѣ бяхъ, дьяволу служай и бѣсомъ; но тымъ [28] святымъ крещенiемь просвѣти. Акы звѣрь бяхъ, много зла творяхъ въ поганьствѣ, и живяхъ, акы скоти, нàго: Ты мя укроти и наказа своею благодатью. Слава Ти, Боже, въ Троици славимый, Отце и Сыне и Святый Душе! Троице Святая! Помилуй мя, настави мя на путь твой и научи мя творити волю твою: яко ты еси Богъ мой» [29]. Князь же Володимеръ поревьнова святыхъ мужь дѣлу и житiю ихъ, и възлюби Авраамово житiе, и подража страннолюбие его, Ияковлю истину, Моисѣеву кротость, Давидово безлобие, Костянтина царя великаго, перваго царя крестьянскаго, того подражая правовѣрие [30]. Боле же всего бяше милостыню творя князь Володимеръ: иже немощнiи и старѣи не можаху доити княже двора и потребу взяти, то въ дворъ имъ посылаше; немощнымъ и старымъ всяку потребу блаженый князь Володимеръ даяше. И не могу сказати многыя его милостыня: не токмо въ дому своемъ милостыню творяше, но и по всему граду; не въ Киеви единомъ, но и по всей земли руской, и въ градехъ, и в селѣхъ, вездѣ милостыню творяше, нагыя одѣвая, алчьныя кормя и жадныя напаяя, странныя покояя милостiю, и церковникы чтя и любя и милуя, подавая имъ требованiе; нищая, и сироты, и вдовица, и слѣпыя, и хромыя, и трудоватыя, вся милуя, и одѣвая, и накорьмя, и напаяя. Такоже пребывающ князю Володимерю в добрыхъ дѣлехъ, благодать Божiа просвѣщаше сердце его, и рука Господня помогаше ему, и побѣжаше вся врагы своя, и бояхутся его всѣ. Идѣже идяше, одолѣваше: Радимицѣ (Радимичи) побѣди и дань на нихъ положи, Вятичи побѣди и дань на нихъ положи на обоихъ, и Ятъвягы взя, и сребреныя Болгары побѣди, и на Казары шедъ побѣди я и дань на нихъ положи. Умысли же и на грѣчьскый градъ Корсунь, и сице моляшеся князь Володимиръ Богу: «Господи Боже, Владыко всѣхъ! Сего у Тебе прошю, даси ми градъ, да прiиму и да приведу люди крестьяны и попы на свою землю, и да научять люди закону крестьяньскому» [31]. И послуша Богъ молитвы его, и прия градъ Корсунь. И взя съсуды церковныя, и иконы, и мощи святаго священномученика Климента и иныхъ Святыхъ. Въ ты дни бѣяста царя два въ Цариградѣ: Констянтинъ и Василей. И посла к нимъ Володимеръ, прося у нихъ сестры оженитися, да ся бы болма (болѣе) на крестьяньскый законъ направилъ. И даста ему сестру свою, и дары многы присласта к нему, и помощи [32] Святыхъ даста ему: положi и. Тако добрѣ поживе благовѣрный князь Володимеръ, и скончя житiе свое въ правовѣрнѣй вѣрѣ о Христѣ Iсусѣ Господѣ нашемъ, и съ благовѣрною Олгою: и та бо, шедши Царюграду, прияла бяше святое крещение, и много сътворивъ добра въ житiи семь предъ Богомъ, и сконча житiе свое въ добрѣй вѣри, и почи с миромъ, в руцѣ Божiи душю предавши. И еще живу сущю Володимеру князю, рать бяше отъ Печенѣгъ. Володимеръ же бяше болестiю одержимъ; въ той же болезни предастъ душю свою в руцѣ Божiи.

Молитва Князя Володимера. [33]

Володимеръ князь, отходя свѣта сего, сице моляшеся, глаголя: «Господи Боже мой! Не позналъ Тебе бѣхъ; но помиловалъ мя еси, и святымъ крещенiемъ просвѣтилъ мя еси; и познах Тя, Боже всѣхъ, святый Творче всея твари, Отець Господа нашего Iсуса Христа! Слава Ти съ Сыномъ и Святымъ Духомъ. Владыко Боже! Не помяни моей злобы: не позналъ есмь Тебе въ поганьстве, нынѣ же Тя знаю и видѣ. Господи Боже мой! Помилуй мя: аще мя хощеши казнити и мучити за грѣхы моя, казни Самъ мя, Господи, бѣсомъ не предай же мене». И сице глаголя и моляся Богу, преда душю свою с миромъ Ангеломъ Господнимъ, и ýспе. Праведныхъ бо душа вруцѣ Божiи суть, и мъзда имъ отъ Бога, и строенiе имь отъ Вышняго; того ради прiимуть венѣць красоты отъ рукы Господня. По святом же крещеньи поживе блаженный князь Володимерь 28 лѣтъ [34]. На другое лѣто по крещенiи къ порогомъ ходи, на третьее лѣто Корсунь городъ взя [35], на четвертое лѣто церковь камену святыя Богородица заложи, а на пятое лѣто Переяславль заложи, в девятое лѣто десятину блаженый Христолюбивый князь Володимеръ вда церкви святѣй Богородици и отъ имѣнiа своего. О томъ бо и самъ Господь рече: идѣже есть съкровище ваше, ту и сердце ваше будеть [36]. Блаженный князь Володимеръ имяше съкровище свое на небесѣхъ, съкрывъ милостынею и добрыми своима дѣлы: тамо и сердце его бѣ, въ царствiи небесномъ. И Богъ поможе ему, и сѣде въ Киевѣ на мѣстѣ отца своего Святъслава и дѣда своего Игоря. А Святослава князя печенѣзѣ убиша; а Ярополъкъ сѣдяше в Кыевѣ на мѣстѣ отца своего Святослава. И Олегъ идый с вои у Вручя гада [37], мостъ ся обломи с вои, и удавиша Олга (Олега) въ гребли; а Ярополка убиша въ Кыевѣ мужи Володимеровѣ. И сѣде въ Кыевѣ князь Володимеръ въ смое (осьмое) лѣто по смерьти отца своего Святослава, мѣсяца Июня въ 11 день, въ лѣто 6486. Крестижеся князь Володимеръ въ десятое лѣто по убиенiи брата своего Ярополка. Кляшется (клялъ себя) и плачетца (плакался) блаженный князь Володимеръ всего того, елико сътвори въ поганьствѣ, не зная Бога. Познавъ же Бога истиннаго, Творца небесѣ и земли, покаявся всего, и отвержеся дьявола, и бѣсовъ, и бѣсовъ, и всея службы его, и послужи Богу добрыми дѣлы своими и милостынею. Успе с миромъ мѣсяца iюля въ 15 день, въ лѣто 6523 о Христѣ Iсусѣ Господѣ.

Примѣчанiя:
[1] Печатается по рукописному сборнику XVI в., принадлежавшему И. П. Сахарову.
[2] 2 Тим. 2, 1-2. Вообще тексты въ этомъ сочиненіи приведены по какому-то другому, древнему, неизвѣстному намъ, переводу.
[3] Лук. 1, 1-4.
[4] Не описка ли, вмѣсто: възлюби и, т. е. возлюбилъ его?
[5] Псал. 41, 2.
[6] Псал. 144, 19.
[7] Матѳ. 7, 7-8; Лук. 11, 9-10.
[8] Марк. 16, 16.
[9] Можно понимать двояко: или отъ бабы, или — о бабѣ. Послѣднее вѣроятнѣе, по ходу послѣдующей рѣчи.
[10] Здѣсь или что либо опущено, или слова: князя Володимера внесены по неосмотрительности переводчика. Отъ того и рѣчь темна.
[11] Вѣроятно, надобно читать: по.
[12] Iер. 15, 19.
[13] Снес. Степ. Кн. 1, стр. 162.
[14] Лук. 15, 7. 10.
[15] Псал. 93, 12. Людъ, очевидно, описка вмѣсто: лютъ или лютыхъ.
[16] Матѳ. 5, 19.
[17] Кажется, надобно понимать: вновь восхвалиши.
[18] Лук. 2, 14.
[19] Вѣроятно: со лжеименными боги.
[20] Здѣсь въ подлинникѣ стоитъ сiе особое надписанiе, хотя далѣе, безъ новаго оглавленiя, опять продолжается рѣчь о Великомъ Князѣ Владимiрѣ.
[21] Снес. Степ. Кн. 1, стр. 40.
[22] И здѣсь едвали не пропущено какое либо слово, недостающее для полноты смысла.
[23] Псал. 67, 37.
[24] Эта большая буква: О, стоящая въ началѣ новаго отдѣла, написана въ подлинникѣ киноварью и очевидно не имѣетъ никакой связи съ послѣдующими словами.
[25] Съ этихъ словъ начинается настоящее сочиненiе въ спискѣ Румянцевскаго Музеума. См. Описанiе этого Музеума, стр. 677.
[26] Снес. Степ. Кн. 1, стр. 162.
[27] Гал. 5, 23.
[28] Вѣроятно: ты мя.
[29] Снес. Степ. Кн. 1, стр. 173.
[30] Снес. Тамъ же, стр. 167.
[31] Снес. Тамъ же, стр. 122.
[32] Вѣроятно: мощи.
[33] Въ подлинникѣ стоитъ сiе надписанiе, хотя, кромѣ молитвы, здѣсь изложено и многое другое.
[34] Снес. Степ. Кн. 1, стр. 174-175.
[35] У преподобнаго Лѣтописца нѣтъ этого извѣстiя.
[36] Матѳ. 6, 21.
[37] Т. е. у Овруча града.

Печатается по изданiю: Три памятника Русской Духовной литературы XI вѣка: 1) Мѣсяца Июля въ 15 день. Память и похвала князю рускому Володимеру, како крестися Володимерь, и дѣти своя крести и всю землю Рускую отъ коньца и до коньца, и како крестися баба Володимерова Ольга прежде Володимера. Списано Ияковомъ мнихомъ. Господи, благослови, отче! 2) Житiе блаженаго Володимера; 3) Мѣсяца Июля въ 24 день. Сказанiе страстей и похвала о убьенiи святую мученику Бориса и Глѣба. Господи, благослови, отче! // Журналъ «Христiанское чтенiе, издаваемое при Санктпетербургской Духовной Академiи». – 1849 г. – Часть II. – с. 316-328.

Наверхъ / Къ титульной страницѣ

0