Святоотеческое наследие
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Святоотеческое наслѣдiе
-
Гостевая книга
-
Новости
-
Написать письмо
-
Поискъ

Святые по вѣкамъ

Изслѣдованiя
-
I-III вѣкъ
-
IV вѣкъ
-
V вѣкъ
-
VI-X вѣкъ
-
XI-XV вѣкъ
-
Послѣ XV вѣка
-
Acta martyrum

Святые по алфавиту

Указатель
-
Свт. Іоаннъ Златоустъ
А | В | Г | Д | Е
-
З | И | І | К | Л
-
М | Н | О | П | Р
-
С | Т | Ф | Х | Э
-
Ю | Ѳ
Сборники

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 18 октября 2017 г. Сейчасъ на порталѣ посѣтителей - 9.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

XI-XV ВѢКЪ

Молитвы на всю седмицу св. Кирилла, епископа Туровскаго († 1183 г.)

МОЛИТВЫ ВО ВТОРНИКЪ.

Молитва во вторникъ по Утрени преподобнаго Кирила. [1]

Крестителю Христовъ, покаянія проповѣдниче! Кающася не презри мене, но, совокупяся съ небесными Силами, помолися Владыцѣ за мя недостойнаго раба твоего (имя рекъ) дряхла и немощна [2], въ многыа бѣды впадающа, утружена бурными помыслы ума моего. Се бо предстою, имѣя на обличеніе мое черность дѣлъ моихъ: мнозѣми обложенъ бремены [3] грѣховными, порѣваемь страстьми житейскими и лежю въ тимѣніи [4] дѣлъ моихъ, нечаяніемъ одержимъ, отнудъ не имѣя въсклоненіа, крыя струпы душа моея студными вретищи грѣховными, заблудивъ праваго пути, ведущаго въ жизнь, уклонився въ стезя беззаконныя, отвсюду утѣсняемъ помыслы ума моего; възвратихся на страсть, егда унзе ми тернъ грѣховный, отъ совѣсти своеа осужаюся и всѣми человѣкы окаанъ быхъ, уныніемъ сконцавъ вся дни живота моего, ослѣплени имѣя сердечніи очи, окаляхъ душевную ми ризу и всю плоть мою злобою осквервихъ; неподобному блуду чювьственныа двери отверзохъ; не встягновенно [5] отъ юности и донынѣ вся злая сътворихъ, и боюся посѣченіа, яко неплоднаа смоковница, егда пріидетъ смертьная секира и предасть мя въ истлѣніе огня негасимаго, егоже и самъ сотана трепещетъ, отъ негоже нѣсть изяти могущаго. Увы мвѣ! Душе разумѣй и вижь долготерпѣніе Божіе, яко не волитъ смерти грѣшници. Горе мнѣ! Что приобрѣтохъ въ минувшее время живота моего. Ибо нѣсть, отъ начала миру и донынѣ, ни единого же грѣшника, егоже не преспѣхъ съгрѣшая: азъ бо есмь вертепъ всѣмъ злымъ деломъ, отнудь не имѣа конца грѣховному обычаю; пригвожденъ есть умъ земнымъ вещемъ, да что сътворю, невѣдѣ, къ кому ся приближу, да спасена ми будетъ душа, токмо къ Тебѣ, Іоанне Предотече, яко свѣмъ Тя больша всѣхъ. Ибо Ты сподобися пріяти за верхъ пречистыи Агньца Божія [6], вземлющаго грѣхы всего мира, Его же моли за убогую и смиреную мою душю: да поне отънынѣ въ единонадесятый часъ понесу яремь, благый и прииму наимъ отъ рукы Господня: даже непостигнеть вечерь, даже незайдеть солнце, даже не обыметь мене нощь страшная и трепетная и глубокая тма; да не остану внѣуду дверій святого чертога, толкый безъ успѣха, имѣя свѣтильникъ угашенъ уныніемъ и лѣностію, и тогда ократится [7] суетная моя надежа. Егда же вся тварь предъ страшнымъ предстанеть судищемъ Христовымъ, идѣже явятся когождо дѣла безъ испытанія [8], тогда Ангели предстоять со страхомъ, громи боятся, молнія трепещетъ [9], земля колеблется, огнь свирѣпый потечеть, потребляя беззаконники, отъ нихже първый есмь азъ. Тогда праведници возрадуются, преподобнiи веселятся, дѣвственници величаются [10], мученици вѣнцаются, Апостоли въ облацѣхъ восхыщаются, пророци прославляются, и вси святіи почивають отъ трудовъ, имиже пострадаша Христа ради въ вѣцѣ семъ. Чтоже сътворю окаянный азъ, яко въ глумленіи сконцавъ вся дни живота моего и въ поученіихъ сквернавыхъ преидохъ лѣта моа. Смерти убо чаю, о грѣсѣхъ же николиже болѣвъ, вѣчную муку приобрѣтохъ [11] и царствомъ небеснымъ непопекохся. Не презри мене, проповѣдниче Христовъ, честный Предтече, послѣдній пророче, первый мучениче [12], постникомъ [13] наставниче и чистотѣ учителю [14], присный друже, южикъ Христовъ. Тя молю и къ тебѣ припадаю: не отрини мене отъ твоего заступленіа, по въстави мя убогаго, многыми падшася грѣхы. Обнови душю мою покаяніемъ, еже есть второе крещеніе, яко обоему начятокъ [15] ты еси: крещеніемъ омываеши прародительныя грѣхы и покаяніемь очищаеши душевную скверну. Очисти мя грѣшника: уста недостойна вопіютъ къ тебѣ, и душа сквернава молится, сердце нечисто изъ глубины въздыхаеть. Простри пречистую твою десницу; исторгни мя отъ врагъ моихъ, да не, по разлученіи, душу удержатъ ми лукавіи бѣси, да не рекутъ: се день, егоже чаяхомъ. Ей Господи мой Ісусе Христе! Молитвами святого Іоанна Крестителя Твоего, недажь мя бѣсомъ въ радость, да непохвалятся, глаголюще: въ руцѣ наши пришелъ еси. Человѣколюбце, Царю всесильне! Угаси прещеніа ихъ и низложи възнесенную гордыню ихъ. Вѣдѣ бо Господи множество грѣховъ моихъ, яко убо числа не имутъ; но надѣюся на пучину Твоихъ щедротъ, возвращаюся, яко блудный сынъ, прiими мя, яко единого отъ наемникъ Твоихъ. Молю Тя, яко Хананѣя, да и азъ насыщуся, аки песъ, крупиць, падающихъ отъ святыя трапезы Твоея, Господа нашего Ісуса Христа. Вопію, яко прокаженный онъ: аще хощеши, можеши мя очистити. Не глаголю, яко разслабленый: Господи, человѣка не имамъ; Ты бо еси Сынъ человѣческый [16], мене ради плотію обложися и немощь естества нашего понесе, иже сына вдовича на погребеніе несома въскреси, четверодневнаго Лазаря изъ гроба възгласи, слѣпцемъ словомъ очи отверзе, и кровоточивую прикосновеніемъ ризъ очисти, иже и разбойника, въ единъ часъ исповѣдавшася, пріялъ еси и раю причястника сътворилъ еси. Ты нынѣ, Господи Боже мой, пріими мое исповѣданіе, подайже ми, любовь Си [17], послѣдній сій день угодно Тебѣ прейти [18]. Нѣстъ во мнѣ части цѣлы, ни мѣста чиста: ибо впадохъ, яко въ разбойнича рукы, въ чресъестественныа грѣхы, иже, совлекше мя божественыа Твоеа заповѣди, яко раны наложиша, свѣдѣніе студныхъ ми дѣлъ, и исполумертва оставиша мя, нечаяніемь одержима. Самъ же, Господи мой Ісусе Христе, яко Самарянинъ, возьми мя на свой скотъ и принеси мя въ гостинницу, въ Святую Ти Церковь, въ ней же дасться исцѣленіе болящимъ грѣхы. Ты, якоже гостинникъ и врачь, прилежи мнѣ, възлій на мя Твою милость, и истреби нечистоту многихъ ми грѣховъ и дай же исцѣленіе души моей и тѣлу, да и на мнѣ явится Твоя милость. Приими молящагося за ны честнаго Предотечю Крестителя Твоего Іоанна и Пречистую Ти Матерь Владычицу нашю Богородицу. Спаси мя грѣшнаго раба Твоего (имя рекъ), кающася о грѣсѣхъ своихъ. Ты бо еси Богъ кающихся и на Тя, Спасителя нашего, възложихомъ надежю, славяще пресвятое имя Твое, Отца, и Сына, и Святаго Духа, нынѣ и присно, и въ вѣкы вѣкомъ. Аминь.

Молитва во вторникъ по часѣхъ святаго Кирила.

Боже естествомъ, Отче милостію, родителю и творче всей твари, надежа всѣхъ конець земли! Нищь и убогъ азъ есмь: призываю чюдное и святое имя Твое и прошю милости отъ Тебе, Отче, Сыне, и Святый Душе! Ты еси Богъ [19] безгрѣшенъ, животу и смерти имеа власть: избави мя отъ всякыя стрѣлы, летящiя въ день, и отъ сряща, бѣса полуденнаго [20]. Зане сташа и усмотриша мя и нападоша на мя безъ милости; помыслиша отринути мя отъ спасенія моего; подстрѣкаша мя вся дни жаломь нечистоты, дондеже ощутихъ смертоносный ядъ въ окаяннѣй ми души. Деніе [21] мои, яко сѣнь, преидоша отъ множества беззаконій моихъ, уклонихся отъ пути праведнаго; лишенъ быхъ отъ плода духовнаго дѣланіа; ниву сердца моего терніемъ порастихъ; лѣностнымъ сномъ безъ памяти въздремахся; совлеченъ быхъ одежа духовныя; врази мои съвѣщаша на мя совѣтъ золъ. И въ скорби моей, призвахъ Тебе, яко рабъ, бояся господина своего; отъ утра помолихся, яко наимникъ, чяя мъзды своея. Услыши мя, Господи Боже мой, въ день печали моея, и приими гласъ молитвы моеа, егда помолюся къ Тебѣ: се бо съ страхомъ предстою Ти и, по моленіи, исповѣданiе приношю Ти. Не можетъ бо ми престати душа, требующи питатися Твоими словесы, яко сладка гортани моему словеса Твоя, паче меда устомъ моимъ. Но не омерзи моего въздыханіа: понеже нечистъ и скверненъ дерзаю призывати Святое имя Твое, Егоже вся тварь трепещетъ, [22] земли ни на чемъ же держится, море пескомъ оградися, путь рѣкамъ простреся, вода на воздусѣ виситъ, небо, яко лукъ, преклонися, солнце, не престаа горитъ, и луна съ страхомъ сіаетъ, звѣзды хытростію текуть, и никтоже отъ женъ роженыхъ безгрѣшенъ, вся же правда человѣча, яко тина, злосмрадна. Но надѣяся на человѣколюбіе Твое спасенія прошю: Боже, очисти мя грѣшнаго, отреби гнилость душа моеа, рассыпли бремя грѣховное и избави мя части лукаваго и причястника сътвори Твоего царствіа: Христе, истинный Боже нашь, молитвами Пречистыя Ти Матере, Владычица нашея Богородица и Святаго Пророка и Предотечя, Крестителя Іоанна, и всѣхъ святыхъ Твоихъ; яко благословенъ еси съ Отцемъ и съ Святымъ Духомъ, нынѣ и присно и въ вѣки вѣкомъ. Аминь.

Молитва во вторникъ по Вечерни, святаго Кирила, преподобнаго священноинока.

Въ Твое заступленіе и крѣпкую помощь нынѣ прибѣгохъ, Пречистая Госпоже, Богородице! Иного бо, развѣе Тебе, прибѣжища не имѣю, окаанный азъ рабъ твой (имя рекъ). Весь есмь скверненъ: несохранихъ заповѣди Сына Твоего и Бога моего, да тѣмъ ни на небо очима возрѣти несмѣю: ибо тѣло злобою уязвихъ, ни руку въздѣти на высоту: полнѣ бо еста лихоимьства; ни устну отверзсти на молитву: яко злогласованіемъ слѣпистася [23]; въздыханія во мнѣ нѣсть отъ величанія [24]; сердце отягчихъ многояденіемъ; душю омрачихъ немилосердіемь, тѣло ослабихъ [25] лѣностію; нозѣ преткнухъ о камень сластолюбіа; уши отверзохъ на слышаніе маловременныя похвалы; лице мое бестудіемъ повлекохъ; смрадъ дѣлъ моихъ обоняста ноздрѣ мои; и весъ быхъ, яко древо неплодно, или яко храмъ пустъ, емуже на разореніе вси поучаются; тать же душа моея крыется въ гнѣздѣ сердца моего, ждый подобна [26] времени, видить бо мя неогражена молитвою и тщится малое имѣніе вѣры моеа въсхитити. Не имамъ бо постнаго оружія и сего ради ратникъ діаволъ, аки плѣнника, грѣховными ужи связавъ, къ своему хотѣнію прочее нудить мя. Да что сътворю невѣдѣ: самовластенъ Богомъ сътворенъ быхъ, и волею поработихся похотному бѣсу; умножишася грѣси мои [27] наипаче песка морскаго. Да како могу умолити Творца моего и Господа, или како надѣюся помилованъ быти: волею вдався на оскверненіе плоти и по вся чясы приближаюся къ грѣховнымъ сластемъ; плоть убо моя осквернися чрезъ естество блудомъ, языкъ же срамословіемъ распростреся; внутреняя же моа исполнихъ смрадныхъ помыслъ и отнудь весь мой разумъ попустихъ въ сопротивная Божію закону. И того ради тужю и скорблю и печалуюся, по вся часы припадаю къ щедротамь Твоимъ Госпоже Богородице! Не прогнѣвайся на мя грѣшнаго, да не всуе жизнь моя скратится; но призри, Владычице, на мя унылаго, умоли рожшагося отъ Тебе! да не преданъ буду въ жребiй грѣшныхъ. Ты бо еси Божiа Мати, и азъ рабъ Твой всегда на Тя надѣюся: за мене, Своего раба, умоли Сына Твоего и Бога моего, Емуже слава съ Отцемъ и съ Святымъ Духомъ, нынѣ и присно, и въ вѣкы вѣкомъ. Аминь.

Молитва во вторникъ по Вечерни. [28]

Благаго Царя благая Мати! Призри на раба Си милостивно и помощную ми руку простри, и страстнаго мя отъ страстей возведи. Рыдая со слезами, вопію Ти, человѣколюбивая: вонми и спаси мя. Возвести очію не смѣю, яко весь есмь во грѣсѣхъ. Милостивая Госпоже, Мати сущи Богу, Живодавца родьшя мертвымъ, отъ мертвости мя злыя въстави: владѣеши бо всѣмъ избавленіемъ. Мучительства мя злыхъ свободи: щитъ ми подаждь твоея силы; стрѣла устрѣли мя вражья: да улучу оставленіе грѣховъ злыхъ. Прибѣгаю къ благости твоей: лежаща мя, яко мертва окаянна, отъ страсти возведи. Благая словеса презрѣхъ Сына Твоего, иже мирови нисходи. Да не одолѣетъ множество золъ моихъ благыхъ Твоихъ множество, Благая! Нощь объятъ мя глубокая страстей; но Ты освѣти свѣтомъ Твоимъ; чужа мя сътвори отъ страсти, Дѣво, и приближи единому Твоему Сыну. Ни уповахъ инде, Препѣтая развѣ Тебе, упованіе державное. Обиде мя вода до душа моеа и запяхся скверными помышленіи; леняся взираю своихъ золъ. Радуюся и уповаю къ Тебѣ Чистая: Тя бо заступницу имамъ и очищеніе. Къ Тебѣ прибѣгаю Мати Божіа! Нищь и убогъ есмь азъ: сохрани мя множествомъ щедротъ Си. Гордаго сътвори [29] врага, хотящаго присно пожрети мя; просвѣти ми разумніи очи, со всемъ умомъ, пѣти Тебѣ согласно. Радуйся, зову Ти гласомъ Гавріиловымъ. Радость Твою обнови на мнѣ: пою и воспою Тя помощницу Богородицю и стѣну неразрушиму, яко исходатаицю благопріятну Богу: молитвы пріими и Тому донеси. Емуже лѣпо есть поклоненіе, Отцу, и Сыну, и Святому Духу и нынѣ и присно и въ вѣкы вѣкомъ. Аминь.

Примѣчанiя:
При изданіи молитвъ св. Кирилла, были использованы:

Три рукописи Соловецкой библіотеки
а)
сборникъ подъ № 802, состоящій изъ статей разнаго содержанія, написанныхъ въ XV и XVI в., въ 4-ю долю, на 202 стр; здѣсь помѣщены 21 молитва св. Кирилла на л. 171-201: всѣ молитвы названы именемъ Кирилла Туровскаго, или Кирилла преподобнаго, Кирилла священноинока;
б)
Большой Требникъ дачи Новгор. Митроп. Макарія подъ № 1085, написаный въ 1505 г., въ листъ, на 712 листахъ: молитвы св. Кирилла, въ числѣ 21, занимаютъ здѣсь 684-712 стр;
в)
Слѣдованная Псалтырь, принадлежавшая св. Филиппу Митрополиту, написанная въ XVI в. въ 4 долю на 547 стр: здѣсь помѣщены четыре молитвы св. Кирилла: по одной молитвѣ послѣ каждаго молебнаго канона Святой Троицѣ, св. Крестителю, св. Апостоламъ и всѣмъ Святымъ;

Двѣ рукописи Волоколамскаго Монастыря
г)
Сборникъ подъ № 109, состоящій изъ разныхъ молитвъ и написанный въ концѣ XV или началѣ XVI в., въ 4 долю, на 258 стр: здѣсь, на стр. 46-138, находится 50 молитвъ, которыя названы именемъ Кирилла грѣшнаго, мниха недостойнаго, кромѣ 8 молитвъ, не означенныхъ ни чьимъ именемъ;
д)
Сборникъ подъ № 413, написанный въ XVI в, въ 4-ю долю, на 788 стр: здѣсь помѣщено 12 молитвъ съ именемъ преподобнаго Кирилла или Кирилла священноинока, на стр. 648-686. За основанiе текста молитвъ мы принимаемъ списокъ ихъ въ сборн. Солов. № 802, какъ болѣе исправный сравнительно съ другими списками и будемъ указывать на замѣчательныя разности, заключающіяся какъ въ этихъ спискахъ, такъ и въ печатномъ изданіи (см. статью «Отъ издателя»). Молитвы же, не находящіяся въ этомъ спискѣ, будутъ напечатаны по рукописи Волокол. № 109.

[1]
Въ печатномъ изданіи и рукоп. Волок. № 109 эта молитва озаглавлена такъ: Молитва Святому Іоанну Крестителю.
[2]
Въ печатномъ изданіи послѣ этого прибавлено: и печальнаго.
[3]
Въ печатномъ изданіи: дѣяніи и бремены.
[4]
Въ печатномъ изданіи: въ тинѣ.
[5]
Не въстягновенно — неудержимо, необузданно.
[6]
Въ печатномъ изданіи: Царя Христа Пресвятаго Агнца Божія.
[7]
Въ печатномъ изданіи: обратится.
[8]
Т. е. дѣла каждаго будутъ явны безъ изслѣдованія.
[9]
Въ печатномъ изданiи словъ: громи боятса, молнія трепещетъ, нѣтъ.
[10]
Въ печатномъ изданіи послѣ этихъ словъ прибавлено: черноризици утѣшаются...
[11]
Въ печатномъ изданіи словъ: вѣчную муку приобрѣтохъ, нѣтъ.
[12]
Въ печатномъ изданіи: мучениче и поклонниче.
[13]
Въ печатномъ изданіи: постникомъ и пустынникомъ.
[14]
Въ рукоп. Солов. № 1085 послѣ этого прибавлено: проповѣданный Ангеле.
[15]
Въ печатномъ изданіи: начальникъ.
[16]
Въ печатн. и рукоп. Солов. № 1085: сынъ Дѣвичь.
[17]
Такъ въ печатномъ изданіи и ркп. Волок. № 109 и 413.
[18]
Въ печатномъ изданіи: въ послѣдній день угодно предъ Тобою стати.
[19]
Въ печатномъ изданіи прибавлено: единъ...
[20]
Псал. 90, 6.
[21]
Т. е. дни.
[22]
Слѣдующихъ словъ: земля ни начемъ же держится… звѣзды хитростію текутъ, въ печатномъ изданіи нѣтъ. Въ рукописи Соловецкой № 1085 это мѣсто распространено еще болѣе. Послѣ словъ: звѣзды хитростію текутъ, тамъ слѣдуетъ прибавленіе: облаци маніемь носятся, тучи дождь проливаютъ, вѣтри шюмъ творятъ, буря древа съкрушаетъ, мгла землю повиваетъ, роса въ число (?) падаеть, горы и пустыни прозябаютъ, въздѣланія растятъ, животная плодятся.
[23]
Въ печатномъ изданіи: злословіемъ слѣпостася...
[24]
Въ печатномъ изданіи: отъ нечувствія...
[25]
Такъ въ печатномъ изданіи и рукописи Волокол. № 109; въ друг. рукоп.: озлобихъ.
[26]
Удобнаго.
[27]
Въ печатномъ изданіи и рукописи Волок. № 109 начиная съ этого мѣста и до конца молитвы совершенно другой текстъ; во всѣхъ же другихъ рукописяхъ такъ, какъ здѣсь напечатано.
[28]
Напечатана по рукописи Волок. № 109; она не означена именемъ Святаго Кирилла.
[29]
Къ связи рѣчи, очевидно, болѣе идетъ слово: «сътри», т. е. сотри.

Печатается по изданiю: Молитвы на всю седмицу святаго Кирилла Туровскаго. // Журналъ «Православный собесѣдникъ», Казань. – 1857 г. – Книга II. – с. 273-285.

Наверхъ / Къ титульной страницѣ

0