Святоотеческое наследие
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Святоотеческое наслѣдiе
-
Гостевая книга
-
Новости
-
Написать письмо
-
Поискъ

Святые по вѣкамъ

Изслѣдованiя
-
I-III вѣкъ
-
IV вѣкъ
-
V вѣкъ
-
VI-X вѣкъ
-
XI-XV вѣкъ
-
Послѣ XV вѣка
-
Acta martyrum

Святые по алфавиту

Указатель
-
Свт. Іоаннъ Златоустъ
А | В | Г | Д | Е
-
З | И | І | К | Л
-
М | Н | О | П | Р
-
С | Т | Ф | Х | Э
-
Ю | Ѳ
Сборники

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 23 марта 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

XI-XV ВѢКЪ

Молитвы на всю седмицу св. Кирилла, епископа Туровскаго († 1183 г.)

МОЛИТВЫ ВЪ ЧЕТВЕРГЪ.

Молитва въ четвергъ по Утрени преподобнаго Кирила.

Душе моя! съгрѣщающи по вся дни, почто невъстягнешися [1], преступающи заповѣди преданныя ти. Кою отъ Бога пріимеши милость, аще не преже конца останешися сластолюбія, удаляющаго тя отъ пути, ведущаго тя въ жизнь [2]. Въспряни, убогая душе, отъ сна грѣховнаго и въсплачися о злыхъ своихъ грѣсѣхъ, имиже прогнѣва Творца своего и Владыку, живодавца и благодателя, ожидающа моего покаянія, егоже не съхранихъ всепагубный [3] азъ. Отънынѣ останися несытихъ похотей и горкыхъ тлетворныхъ уклонись сквернъ. Припадижъ вопіющи къ божественнымъ Апостоломъ, да помолятся вопіющи Христу подати ми отпустъ и оставленіе грѣховъ. Святый Петре, Богоизбранный Апостоле, твердый камень вѣрѣ, недвижимое основаніе Церкви, пастуше словеснаго стада Христова, ключарь царства небеснаго [4]: Тя молю, всечестне, да обойметъ мя божественная твоя мрежа, да мя извлечеши изъ глубины погыбелныя. Вѣмъ бо тя отъ Бога область пріимша вязати и рѣшити грѣхы: разрѣши мя, молю ти ся, связана узами грѣховными; покажи на мнѣ милость твою, убозѣмъ рабѣ твоемъ (имя рекъ). Оживи смиреную ми душю, яко и преже Тавифу въскреси отъ мертвыхъ; на теченіе благо въстави мя, якоже въ Красныхъ вратѣхъ словомъ хромаго съ одра въстави, и стѣнемъ своимъ [5] всякы недуги и болѣзни прогониши. Да осѣнитъ мя твоя благодать, исцѣляющи душевныя ми болѣзни и прогонящи телесныя недуги: все бо можеши, пресвяте, твоими молитвами, Христовою силою, Егоже ради все оставивь и Того возлюбивь, въслѣдовалъ еси Его стопамъ пречистымъ и, за имя Его святое узы поносивъ, радостію неизглаголанною [6], нынѣ на небесѣхъ у престола славы Святыя Троица веселишися, къ Нейже молися за мя, да избавлюся отъ всякаго зла твоими молитвами. Святый Павле, възлюбленниче Христовъ, небесный человѣче, земный Ангеле, проповѣдниче святыа вѣрѣ, всѣхъ языкъ учителю, церковная богогласная труба, высоколетаючый орле, небесныхъ таинъ сказателю преславующій вѣтіе, вмѣстилище духовное, въсхыщенъ бывъ до третьяго небеси [7] и многыя бѣды пострадавъ за имя Христово, некыйся всѣми Христіяны, да быша спасени были, забывая раны на тѣлеси, небо [8] промѣривый и землю обшедъ насъ избави идольскаго гнѣва. Тя молю и тебѣ въпію: не гнушайся мене сквернаго, непрезри ослѣпша душевными очима, но буди ми вождь [9], възвращая мя отъ пропасти погыбельныя. Азъ бо, аки берніе [10] грѣхы люблю; но ты яко преблагь Спасовъ ученикъ, избави мя, даже не погыбну до конца и да неречеть врагъ мой: укрѣпихся нань. Въстави мя убогаго, разслаблена суща душевною немощью [11]; ибо ты въ Лѵстрехъ отъ чрева роженнаго хромца съ Варнавою въставилъ еси и Евтиха мертва оживилъ еси: въскреси и мене отъ мертвыхъ дѣлъ, надежа моя и прибѣжище [12]: избави мя отъ всѣхъ плотскыхъ и душевныхъ сквернъ. Пріими мольбу окаяныя ми душа, юже Ти приношю отъ страстнаго ми сердца. Не имамъ бо добрыхъ дѣлъ, спасающихъ мя, ни слезъ, ни покаянія нестяжахъ, беззлобія, кротости удалихся, чужь быхъ всякаго добра, звѣрообразенъ видящимъ мя, отъ всѣхъ человѣкъ окаянъ, отъ бѣсовъ поруганъ; яко беззаконіа моя познахъ и грѣха моего непокрыхъ, егоже помысля, весь въ глубину нечаянія погружаюся и къ тебѣ руцѣ простираю: вся бо можеши отъ Бога данною ти властію. Вѣрою прошу: посѣти мене, Святе, твоею милостью [13], укрѣпи мя творити добраа дѣла, яко сый Христовъ Апостолъ. Святый Іоанне Богослове, наперстниче Христовъ, дѣвьственный сосуде, душевнаа [14] святаа Церкви, медоточный языкъ, громогласная духовная уста възгремѣвый намъ Сына Божія въчеловѣченіе [15], Ефесьская похвала, церковный свѣтильниче, надежа моя и прибѣжище, услыши молитву мою вонми моленіе мое; неотстави мене отъ твоея помощи, непрогнѣвайся на мя много съгрѣшившаго, яко имѣя утробу щедротъ. Подайже ми [16] Владычне человѣколюбіе, яко то нерадуется о погибели грѣшничи; тыжъ и бѣды отъ беззаконникъ пріемля и до крови стража, за всѣхъ Богу молишися, помолися и за мя убогаго; непомяни злобы беззаконій моихъ; но, якоже Домна въ бани въскресивъ и жива отцу его дарова, тако, Святе, и мене многыми грѣхы умерша твоимъ посѣщеніемъ оживи и чиста Отцу Небесному представи. Надѣюбося на тя и приношу ти молбу отъ устъ скверненъ и отъ сердца нечиста и колѣни преклоняю душевніи и тѣлесніи. Помощникъ ми буди на супротивника моего: да неодержить мене злокозненный змій. И дайже ми руку помощи и презри моя грѣхы, да неотвратить моя злоба твоего благодѣянія. Ты бо и узами древле обложенъ, воина въ морѣ утопшаго во мнозѣхъ часѣхъ, изъ глубины волнами жива приверже къ кораблю, плачющихъ утѣши, невѣрныхъ въ вѣру обрати: и мене такоже, Блаженне, усилена врагомъ утѣши и отъ невѣрія въ вѣру претвори, твоимъ посѣщеніемь спаси, Святе, отъ всякаго душегубнаго разоренія и отъ страстныхъ помыслъ, иже по вся дни стужаютъ окаянной ми души, яко Прокліанію отъ похотѣнія непріязненна избави и Сосипатра спасе, и мене избави отъ всякаго грѣха твоими молитвами. Святый Луко, божественный Евангелисте, духовный скорописець, богопустъный [17] врачю! Призри на мя [18] твоею милостію и, юже вѣси, тайную болѣзнь грѣховную, давну сущу въ сердцѣ моемъ, даромъ божественнымъ уврачюй. Къ тебѣ бо прибѣгаю, одержимъ душевною немощью, все тѣло язвено имѣя; но обяжи, Святе, неисцѣльныя струпы моя, не мини отъ дѣтска уязвена вражьими стрѣлами: можеши бо мя исцѣлити и отъ сего часа здрава сътворити отъ Бога данною ти благодатью. Се бо въсмердиша и съгниша раны моя, отъ лица безумія моего; но тебе молю: покаяніа масло възлѣй на мя, могущее мя отъ тѣхъ избавити и очистити, яко на тя упованіе възложихъ. Святый Марко, Господень честный арганъ [19], ибо въ всю землю изыде вѣщаніе твоего сладкаго гласа, украсивый Церковь святымя ти словесы, Христовыхъ таинъ списателю и всѣхъ чюдесь Его благовѣстниче, работавый Евангелію Христову! Моли за мя человѣколюбца Бога, да порабощу тѣло божественнымъ Его заповѣдемъ и да свобожю си душю отъ работы лукаваго твоими молитвами. Святый Матфею, оставивый мытницу и все грѣховное имѣніе [20] разсыпавь, въспріялъ еси на небесахъ неизготоваемо жилище [21] и сказавый намъ второе Христово пришествіе, егда явится съ небесе во множествѣ Ангелъ, врагы страша и вѣрныхъ веселя: тогда и вы сядете на престолѣхъ, судяще языкомъ. Увы мнѣ! Како явлюся тогда азъ акаанный, всякаго зла исполнень? Но буди [22] ми помощникъ и укрѣпи мя на теченіа благая, да избавиши мя отъ вѣчныя горкыа мукы. И вси прочіи избранніи Апостоли Андрѣе, Якове, Фомо, Варфоломію, Симоне, Филиппе, Христови угодницы, льсти искоренители, вѣрѣ насадители! Услыште мя грѣшнаго, на вы надѣющася. Уже бо отъ дѣлъ нѣсть ми спасенія, аще непокрыете мя отъ всякаго кова льстиваго зміа безстуднаго. Се бо яко левъ рыкаа ходить, хотя мя пожрети; но съкрушите ему лукавую главу, расторгните челюсти его и мене избавите Вашими молитвами, да быхъ еще да семь свѣтѣ моихъ грѣховъ покаялся, еликоже сътворихъ на убогую мою душю. Ей, Владыко мой Господи Ісусе Христе! Умилосердися на мя окааннаго: Молитвами Апостолъ Твоихъ отъ тайныхъ моихъ очисти, даждь благодать разума моему недостоинству. Ты бо еси Христосъ Сынъ Божій, дая молитву молящемуся, пріемля покаяніе кающихся. Пріими Владыко мое покаяніе и отпусти нечестіе сердца моего. Спаси мя по милости Твоей, яко азъ рабъ Твой Владыко, и Сынъ рабы Твоея. Не дажь, Господи, въ смятеніе ногы моея, ни да въздремлеть храняй меня Ангелъ; но вразуми мя, Боже, очисти и освяти смиреную ми душу: да не възвращуся уничиженъ, скорбенъ, посрамленъ, но да получу, ихъ же желаю безконечныхъ Твоихъ благъ. Не сниди съ мною въ судъ [23]: азъ бо вѣдаю своя безаконія, глаголющая на мя; того ради, молю Ти ся, Владыко, отъ сердца и отъ души: не остави, Господи, до конца погыбнути въ тинѣ дѣлъ моихъ, но дайждь ми руку помощи. Съвѣдый немощь мою, презря грѣхы моя и ожидая покаянія, яко благь и долготерпѣливъ, насъ ради на землю съшедъ и Апостолы избравъ и тѣми призываеши вся языкы въ вѣчную жизнь. Тѣхъ молитвами, Христе Боже, посли намъ Твою милость и волны укроти нестройныхъ ми помыслъ, и падшую душу мою вьстави и отъ всякаго зла избави и настоящаго суда свободи: Яко Ты еси Богъ мой и Тебѣ славу въсылаю со Отцемъ и Святымъ Духомъ и нынѣ и присно, и въ вѣкы вѣкомъ. Аминь.

Молитва святаго Кирила въ четвергъ по часѣхъ.

Владыко Господи! Твой есть день и Твоя есть нощь, Тебѣ вся тварь работаетъ и всяко дыханіе славить Тя: азъ же окаянный все житье мое сконцавъ блудно, страхомъ одержимь есмь, яко помянухъ дни первыя [24], въ няже вся злая не чувъственно створихъ. И того ради не имѣю дерзновенія къ Тебѣ, яко безаконія моя велика и пристрашни грѣси мои; врази же мои тружають мя [25]. Но Ты, Господи мой Господи, отверзый уста нѣмому, отверзи уста моя, да глаголю въ молитвѣ угодная Тебѣ. Се бо душа моя, яко земля несѣянна [26], не можетъ о себѣ принести плода; но дайжь ми отъ сѣмяни святаго Твоего, и напой росою благодати Твоея, да принесу Ти плодъ покаянія. Господи Ісусе Христе! Хотяй всѣмъ человѣкомъ спастися, услыши молитву мою молитвами Святыхъ Апостолъ Твоихъ, яко тіи молятъ за ны. — И азъ тѣми у Тебе прошенія прошу, яко тѣхъ молитвы присно послушаеши, и моленіемь ихъ спаси мя грѣшнаго, исцѣли болѣзнь сердца моего; уврачуй струпы душа моея; просвѣти очи ума моего; очисти помыслы чувьства моего; разжи утробу мою пламенемь страха Твоего, да поястъ терніе грѣховъ моихъ и душю мою прохлади любовію. Къ Тебѣ бо желаю истинному свѣту и подателю свѣта и у Тебе единаго спасенія прошю [27], насыти алчьбу мою отъ милости Твоея, напой жажю [28] мою отъ безчисленнаго человѣколюбія Твоего. И да покрыеть мя благодать Твоя отъ всякаго зла, да Тобою хранимь избавляюся многыхъ сѣтей лукаваго, по вся дни препинаемыхъ [29], и да не похвалятся врази мои на раба Твоего, уповающаго на Тя; но спаси мя по милости Твоей: да воздамъ Ти обѣты моихъ молитвъ, и до послѣдняго издыханія каяся о моихъ прегрѣшеніихъ, прославляю Пресвятое имя Твое, Отца и Сына и Святаго Духа, нынѣ и присно и въ вѣкы вѣкомъ, Аминь.

Молитва въ четвергъ по Вечерни преподобнаго Кирила [30].

Крестъ души возстаніе и животъ вѣчный: свѣтъ Сынъ Божій [31]: крестъ слава Господня: крестъ супостатомъ побѣдитель и избавитель человѣкомъ. Господи Христе Боже нашь, Иже, нашего ради спасенія, отъ безначальнаго Ти Отца пришедъ отъ вышняго круга горняго небеси въ нижная страны земля, Богъ сый непремѣненъ, въ наше естество оболкся и весь бысть человѣкъ за многое и неисповѣдимое Твое милосердіе, да данное Ти достояніе языкы къ себѣ приведеши, иземъ отъ стараго врага мучителя діявола, емуже поработихомся грѣхомъ, часть [32] Твоя сущи и жребій вожделенный [33], о нихъ же рече: иныя овцы имамъ. И нынѣ непопусти Господи сконцатимися во грѣсѣхъ, яко къ Тебѣ прибѣгохъ [34] отъ юности моея и отъ утробы матере моея. Богъ мой еси Ты: недайжь о мнѣ радостнику [35] быти бѣсу: ты съвѣси удобь прелстимое человѣческое естество; но, ими же вѣси, судьбами спаси мя. Нѣсть бо во мнѣ ни единаго нрава, спасающаго мя, но весь нищь, весь убогъ безъ Твоея помощи, напраснивъ [36] родомъ и свирѣпъ естествомъ, похотникъ грѣху, злу волю имый, поминатель злу, забытникъ добру, преступникъ клятвѣ, обидливъ паче всѣхъ, скоръ на сварь и на смиреніе разслабленъ, ревнивь на блудъ и на молитву лѣнивъ, изообилуяй въ яденіи и питіи, и несытый немилосердіемъ, все благодѣяніе отвергъ отъ себе и вся неподобная вселишася въ мя. Но ты, Господи Господи, туне милуяй [37] человѣческый родъ, туне спаси мя. Вѣмь бо Тя решаго: пріидѣте ко Мнѣ вси тружающіися и обремененіи, Азъ покою вы. Не презри мене, Господи, утружшася въ дѣлехъ неподобныхъ, порѣвающагося тяготою безаконія, но возьми бремя грѣховное отъ мене, яко имѣя множество щедротъ и сподобивый мя недостойваго раба Твоего варити предѣлы дне сего и въ послѣдній часъ поклонитися славѣ Твоей и вечернюю молитву приносити, юже пріимъ, Милостиве, отъ устъ грѣшенъ, не раскайся о дарѣхъ [38], яже обѣща рабомъ Твоимъ, въ молитвѣ просящимъ у Тебе. Ты съвѣси, Владыко, тайная сердецъ нашихъ, егоже наиболѣ требуемь. Даждь ми, Господи, убѣжати всякаго діяволя искушенія и прости мя отъ прежъ сътворенныхъ многыхъ ми грѣховъ. Събери мой умъ отъ плотьскыхъ похотей; уклони сердце мое отъ тщая льсти человѣческыя похвалы: да о съгрѣшеніихь моихъ покаюся и о паденіихъ моихъ умилюся и о безаконіихъ прослезю; да и нъ пріидущую нощь необъятъ буду грѣховнымъ мракомъ и тяжкымъ сномъ, но укрѣпи мя на полунощное [39] пѣніе, силою Твоего неизреченнаго Божества. И дажь очима моима легокъ сонъ, безъ мечтанія, безъ смущенія и къ утреннему въстави мя хваленію, свѣтомъ заповѣдей Твоихъ просвѣщая разумнѣи мои очи; отврати нозѣ мои отъ всякаго пути зла и постави мя въ слѣдъ заповѣдей Твоихъ ходити и предзрѣти [40] Тебе въ душевнѣй ми церкви и въ словеснѣй храминѣ тѣла моего: да и прочее время непорочно скончавъ десныя Ти страны причястникъ буду со всѣми отъ вѣка угождшими Ти, съ ними же и введи мя въ духовный онъ [41] дворъ и причти мя избраннемъ твоемъ стадѣ словесныхъ Твоихъ овець, ихъже ради кровь проліа. Ты бо еси Богъ мой и азъ рабъ Твой и Тебѣ славу всылаемъ Отцу и Сыну и Святому Духу, нынѣ и присно, въ вѣкы вѣкомъ. Аминь.

Примѣчанiя:
При изданіи молитвъ св. Кирилла, были использованы:

Три рукописи Соловецкой библіотеки
а)
сборникъ подъ № 802, состоящій изъ статей разнаго содержанія, написанныхъ въ XV и XVI в., въ 4-ю долю, на 202 стр; здѣсь помѣщены 21 молитва св. Кирилла на л. 171-201: всѣ молитвы названы именемъ Кирилла Туровскаго, или Кирилла преподобнаго, Кирилла священноинока;
б)
Большой Требникъ дачи Новгор. Митроп. Макарія подъ № 1085, написаный въ 1505 г., въ листъ, на 712 листахъ: молитвы св. Кирилла, въ числѣ 21, занимаютъ здѣсь 684-712 стр;
в)
Слѣдованная Псалтырь, принадлежавшая св. Филиппу Митрополиту, написанная въ XVI в. въ 4 долю на 547 стр: здѣсь помѣщены четыре молитвы св. Кирилла: по одной молитвѣ послѣ каждаго молебнаго канона Святой Троицѣ, св. Крестителю, св. Апостоламъ и всѣмъ Святымъ;

Двѣ рукописи Волоколамскаго Монастыря
г)
Сборникъ подъ № 109, состоящій изъ разныхъ молитвъ и написанный въ концѣ XV или началѣ XVI в., въ 4 долю, на 258 стр: здѣсь, на стр. 46-138, находится 50 молитвъ, которыя названы именемъ Кирилла грѣшнаго, мниха недостойнаго, кромѣ 8 молитвъ, не означенныхъ ни чьимъ именемъ;
д)
Сборникъ подъ № 413, написанный въ XVI в, въ 4-ю долю, на 788 стр: здѣсь помѣщено 12 молитвъ съ именемъ преподобнаго Кирилла или Кирилла священноинока, на стр. 648-686. За основанiе текста молитвъ мы принимаемъ списокъ ихъ въ сборн. Солов. № 802, какъ болѣе исправный сравнительно съ другими списками и будемъ указывать на замѣчательныя разности, заключающіяся какъ въ этихъ спискахъ, такъ и въ печатномъ изданіи (см. статью «Отъ издателя»). Молитвы же, не находящіяся въ этомъ спискѣ, будутъ напечатаны по рукописи Волокол. № 109.

[1]
Въстягнуться — удержаться, воздержаться.
[2]
Въ печатномъ изданіи: сластолюбиваго хотѣнія, удаляющаго тя отъ жизни.
[3]
Въ рукописи Волоколамской № 109 и 413: погыбельный.
[4]
Въ печатномъ изданіи рукописи Соловецкой № 1085 послѣ этого прибавлено: ловче глубины неразумія.
[5]
Тѣнію своею.
[6]
Въ печатномъ изданіи начиная съ словъ: радостію неизглаголанною до словъ: помолися за мя, пропущено.
[7]
Словъ: въсхищенъ бывъ до третьяго небеси, въ печатномъ изданіи нѣтъ.
[8]
Въ печатномъ изданіи и рукописи Волок. № 109: море.
[9]
Въ печатн. изданіи начиная съ словъ: но буди ми вождь, до словъ: въстави мя убогаго... пропущено.
[10]
Берніе — бреніе, тина.
[11]
Въ печатномъ изданіи: грѣховною лѣностію.
[12]
Въ печатномъ изданiи начиная со словъ: надежа моя, до словъ: вся бо можеши данною ти властію, пропущено.
[13]
Въ печатномъ изданіи вмѣсто: посѣти мя твоею милостію, поставлено: исторгни мя отъ сѣти вражія...
[14]
Въ печатномъ изданіи: одушевленная.
[15]
Въ печатн. изд. словъ: възгремѣвый намъ Сына Божія въ человѣченіе, нѣтъ...
[16]
Въ печатномъ изданіи это воззваніе къ Евангелисту Іоанну: подайже ми, до словъ: Святый Луко, пропущено, а вмѣсто его напечатано совершенно другое.
[17]
Въ печатномъ изданіи: Богомудрый...
[18]
Въ печатн. изданіи все это воззваніе къ Евангелисту Лукѣ, начиная съ словъ: призри на мя, до словъ: Святый Марко, Господень честный арганъ, пропущено, а вмѣсто его напечатано: услыши молитву мою, уврачуй страсти душа моея и непрезри меня уязвленнаго вражьими стрѣлами: можеши бо исцѣлити меня и отъ сего часа здрава сотворити.
[19]
Въ печатномъ изданіи вмѣсто: Господень честный арганъ напечатано: Александрійскій и Егѵпетскій свѣтильниче, а дальнѣйшія слова до словъ: Христовыхъ тайнъ списателю, пропущены.
[20]
Въ печат. и рукоп. Вол. № 413: собраніе. Въ рукописи Солов. № 1085: бремя.
[21]
Въ печатномъ изданіи и рукоп. Волок. № 413: неиждиваемое богатство.
[22]
Въ печат. изд. это слово поставлено во множественномъ числѣ: будите, и отнесено уже къ слѣдующему далѣе воззванію ко всѣмъ Апостоламъ.
[23]
Въ печатномъ взданіи начиная со словъ: не вниди со мною въ судъ и до конца молитвы напечатано совершенно иное.
[24]
Въ печатномъ изданіи прибавлено: и донынѣ...
[25]
Въ печатномъ изданіи и рукоп. Волок. № 109: стужаютъ ми.
[26]
Въ печатномъ изданіи: земля безводна оста, не можетъ...
[27]
Въ печатномъ изданіи: у Тебе единаго прошу милости и спаси мя, а дальнѣйшія слова: насыти алчьбу мою отъ милости Твоея, пропущены.
[28]
Въ печатномъ изданіи: жаждушую душу мою...
[29]
Вѣроятно — препинающихъ.
[30]
Похвала Святому кресту, которою начинается эта молитва, находится только въ печатномъ изданіи и Волоколамскомъ спискѣ подъ № 109; въ другихъ же спискахъ она начинается уже слѣдующими за нею словами: Господи Боже нашъ, иже отъ безначальнаго Ти Отца... Впрочемъ въ Волоколамскомъ спискѣ эта похвала написана въ видѣ отдѣльной молитвы и съ особымъ заглавіемъ: «Молитва въ четвергъ по Вечерни». Въ такомъ же видѣ, можетъ быть, находилась она и въ другихъ спискахъ, послужившихъ основаніемъ для печатнаго изданія молитвъ; но древніе издатели соединили ее съ слѣдующею за ней вечернею молитвою, вѣроятно по причинѣ ея краткости.
[31]
Такъ и въ печатномъ изданіи.
[32]
Въ печатномъ изданіи: чада Твоя суще...
[33]
Въ печатн. изд. желанный...
[34]
Въ печатн. изд. и рукоп. Солов. № 1085: приверженъ.
[35]
Въ печатномъ изданіи: радости.
[36]
Въ Словарѣ Миклошича: Напрасьнивъ, напрасьливъ, iracundus, severus, гнѣвный, жестокій.
[37]
Въ печатномъ изданіи: поминаяй человѣки.
[38]
Словъ: юже пріимъ, Милостиве, отъ устъ грѣшенъ нераскайся о дарѣхъ, въ печатномъ изданін нѣтъ.
[39]
Въ печатномъ изданіи: всенощное...
[40]
Въ печатн. издан.: поминати...
[41]
Въ печатномъ изданіи: Твой...

Печатается по изданiю: Молитвы на всю седмицу святаго Кирилла Туровскаго. // Журналъ «Православный собесѣдникъ», Казань. – 1857 г. – Книга II. – с. 298-313.

Наверхъ / Къ титульной страницѣ

0