Святоотеческое наследие
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Святоотеческое наслѣдiе
-
Гостевая книга
-
Новости
-
Написать письмо
-
Поискъ

Святые по вѣкамъ

Изслѣдованiя
-
I-III вѣкъ
-
IV вѣкъ
-
V вѣкъ
-
VI-X вѣкъ
-
XI-XV вѣкъ
-
Послѣ XV вѣка
-
Acta martyrum

Святые по алфавиту

Указатель
-
Свт. Іоаннъ Златоустъ
А | В | Г | Д | Е
-
З | И | І | К | Л
-
М | Н | О | П | Р
-
С | Т | Ф | Х | Э
-
Ю | Ѳ
Сборники

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 28 апрѣля 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ПОСЛѢ XV ВѢКА

Преп. Максимъ Грекъ († 1556 г.)
Слово о Рождествѣ Господа и Бога и Спаса нашего Ісуса Христа, въ томъ же и на іудея.
[1]

Се и вертепъ, и ясли, и новороженъ Младенецъ въ нихъ, восклоненъ [2] Матерію своею неискусомужною, и волсви, дарми честными чествующе, и звѣздою чрезъ естественною наставляеми свыше и чинъ ангельскый, вопіюще: слава царствующему въ вышнихъ, и миръ живущымъ на земли, и пастыріе, слышаще свыше: родися вамъ въ Виѳліемѣ веси Христосъ надежда вашя? Воистину предивна вся и явственнѣ возвѣщающа сему Младенцу быти Богу, всѣмъ Царю; но можетъ бо никтоже глаголати симъ бывшимъ по прилучаю; издавна бо сія прорекошяся о Немъ, и о сихъ неложни свѣдѣтели богодухновенныя книги священныхъ будущихъ [3] глаголивыхъ мужъ. Да посрамляется убо непокоривый жидовскый языкъ, пререкуя дерзостно толь явленѣйшимъ [4] вещемъ! Да или яко Бога поютъ вкупѣ съ нами Ісуса, зряще вся, елика прорекошся о Немъ священными пророкы преже многыхъ лѣтъ и сбышася о Немъ неложно, прокаженныхъ очищающу, а слѣпымъ зрѣніе подающу и мертвыя изъ гробъ воставляющу, словомъ, или въ своей злобѣ злохотно пребывающе, ни тѣмъ прочее священнымъ пророкомъ да повинуются, аки такова солгавшымъ на Христа, ниже да чяютъ иного пріити, аки предуставленному времени явленія Его, издавна уже трищи прешедшу. Аще убо неложенъ есть глаголяй желающему пророку навыкати разрѣшеніе злымъ своего языка: [5] седмижды, вѣждь, десять седмицы прекратишася о людехъ твоихъ и о градѣ святѣмъ, яко запечатлѣти прочее и видѣніе мудраго пророка, и да пріидетъ Святый святыхъ; [6] сіе же пророчество явѣ бысть, понеже прочее по Христѣ никто въ нихъ воста будущая предвозвѣщая. Ащели же аки истиннымъ и Божіимъ другомъ пророкомъ вѣры имутъ, и ухо свое тѣмъ приклоняютъ, Христа Бога нашего да поютъ несумнѣнно, зане о Семъ единомъ събытіе неблазнено пріимшымъ всѣмъ вкупѣ, яже о Немъ, пророчествамъ, имиже крѣпкый Богъ и великь самодержецъ поется, и миру и великому совѣту ангелъ и князь, якоже вопіетъ Исаія. [7] Ащели же страсть претерпѣ, что то? не Божествомъ бо пострада, но плотію, юже воспріятъ за милосердіе веліе; и се волею и по благоволенію Отца безначяльнаго, тако спасти изволившу весь родъ человѣческый, прежде убо многихъ лѣтъ и сіе предрекшимъ образовательнѣ о Немъ богодухновеннымъ пророкомъ. Поклонитеся убо достоитъ Благодати, яко Божественному дару, а не отвращатися чина исцѣленія [8] и, идѣже и егда и како велитъ Богъ, вослѣдовати Ему, аки своимъ родителемъ незлобивыя дѣти, оно мыслящымъ, яко всепремудръ сый и всепреблагый и сама Правда, ничто беззаконно, ниже нелѣпотно, ниже вышше силы нашея намъ отнюдь повелѣваетъ, и сіе да, отмывъ насъ всякія вкупѣ злобы, богоподобныя славы добротами украситъ. Или убо иными грядущаго Мессію пророчествіи покажутъ безъ страстей и смерти и единымъ человѣческымь естествомъ и славою и богатствомъ и высотою не кончяемаго царствія, якоже имъ ся мнитъ, сѣдяща на царскыхъ престолехъ всѣми концы владѣти, или сіе не могуще показати, да покланяются съ нами вкупѣ Ему и священными пророки, въ двою естеству Бога вкупѣ и человѣка совершенна того же глаголющими явѣ, и плотію своею смерть претерпѣвша, и въ третій пакы день воскресша изъ мертвыхъ, и явльшася другомъ своимъ, и на десныхъ престолехъ безначальнаго Родителя своего сѣдяща яко Бога и Господа всѣмь. Но что къ симъ стропотный и непокоривый родъ? Ниже благохвально, ниже пригодно отнюдь, рѣче, еже такова мудрствовати о Сущемъ выше всякыя видимыя и невидимыя твари. Но о, исполнени паче всѣхъ человѣкъ непокоренія и всякаго безумія и гордости! Аще сице вамъ сія видится, ниже по Его нетлѣнному образу да глаголите Его, ниже отъ земли создавша Адама, ниже ногу омываема человѣческимъ образомъ и худою кущею объемлема, ниже мясо и соли инима вкусити и предъглаголюща [9] чадо состарѣвшися супружницѣ, ниже борбы составляюща [10] и стегно противоборца своего ногою сляцающа хытростію, ниже въ неопаляемой убо, осіяваемой же огнемъ купинѣ, глаголюща съ Моисеомъ, ниже въ образѣ ангельстѣ сошедша прелагати преподобнымъ отрокомъ въ росу пещный пламень. Ащели же сія вся пріяти изволилъ есть, якоже есть писано, спасти желая свое созданіе, егоже ради вся созда и егоже, яко же слышимь, господина показа всѣмъ, иже на земли; почто безъ ума, о несмысленіи, укаряете и отметаетеся толь неизреченнаго и милости исполнена человѣколюбія Его о человѣческомъ родѣ, яко Ему изволити и страсть и гробъ? [11] Аще бы не была зѣло любима и пречестна Царю всѣмъ вещь, сложный отъ персти и души, [12] ниже создалъ бы его по Божественному образу своему и подобію, ниже пакы согрѣшша пощадѣлъ бы его всяко, но, или истребилъ бы его абіе, или затворилъ бы въ нерѣшимыхъ узахъ преисподнихъ мукъ, ниже его ради очищаше всю землю бесчислеными водами, и потопляше убо весь родъ вкупѣ человѣковъ и скотовъ безсловесныхъ, оставивъ имъ мало сѣмя въ кивотѣ древянѣ , ниже бы Египта казнилъ губительными ранами и потопляше убо Фараона со всѣмъ его воинствомъ, ниже безчислена и предивна чюдеса о насъ сотворилъ бы убо, елика показа въ родѣхъ древнихъ, имиже явѣ показа, елико промышленіе имать и Божественно любленіе къ созданію своему. Зѣло убо лѣпо бѣ и нужно всѣмъ Царю о толь благороднемъ созданіи своемъ, бѣсы же губительными прельщеннѣмъ бывшемъ, терпѣти вся, елика въ человѣчестѣй плоти своей пострада волею, не да точію покажеть свою, юже изъначала имѣяше, неисчетную любовь къ человѣкомъ, но да и, понеже пресущное Божественное существо неприступно есть отнюдъ и невидимо, веселіе довольно преподобніи стяжаваютъ зряще въ человѣческомъ образѣ Господа своего блестяща имъ испущаемыми непрестанно молніи отъ Божественнаго и присносущнаго свѣта, егоже ради наипаче воспріятъ человѣческый зракъ; быти убо хотяше воистину несовершено даемое тогда праведнымъ даяніе благъ вѣчныхъ, якоже и обѣдующимъ у нѣкоего великаго царя и предобрѣйшихъ убо вкушающымъ снѣдей, лишеннымъ же царскаго зрѣнія и вѣщанія, уметы вся имъ и плевы являются, аще и сладчяйша суть снѣдаемая и піемая, и исполнени суть печяли мысли ихъ. Но сія убо, елико возможе человѣческый немощный разумъ, предложилъ есть вамъ на увѣреніе истины; а неложно виновно есть [13] толикому человѣколюбію Его, якоже Ему изволити и страсть и смерть и гробъ, [14] Той самъ совершенно вѣсть; понеже никтоже позна умъ Вышняго, Божественное слово вопіетъ. Но ниже хульное, якоже вы глаголете, но и зѣло достохвально и есть и судится отъ всѣхъ благоразумныхъ, еже согласно мудрствовати вкупѣ съ богодухновенными пророчествіи о крайнѣшей Божіей любви, ейже познаніе извѣстно [15] и всемудрое дѣло есть смерть, юже волею пріятъ на крестѣ, смертію убо человѣческое, а воскресеніемъ изъ мертвыхъ увѣряя [16] свое Божественное естество. Неправедно убо есть отнюдь мудрствовати оно о Немъ, Егоже всесильному мановенію всяческая повинуются, яко за еже не имѣти Ему инъ образъ исцѣленія, [17] за то потребова таковаго худаго исцѣленія, егоже худое и несильное явися мудрѣйшее всякоя премудрости и всякыя силы сильнѣйшее. Но хотя дѣломь увѣщевати насъ смирена мудрствовати и о самѣй жизни удобь нерадѣти и Божественныя любве ничтоже ино мнѣти выше и лучшее, изволилъ есть и страдати на крестѣ, и погребенъ быти, всѣмъ желающымъ яже въ будущемъ благая предложивъ Себе [18] образъ и указъ житія совершеннаго; пресвѣтлыхъ бо вѣнець и предивныхъ почестей трудомъ величайшимъ, глаголютъ, подобаетъ стяжавати. Кыя же больши почести могутъ быти мыслящимъ добрѣ паче жизни вѣчныя и некончяемаго Божія царствія, ихже получити не возможно инако, но точію многыми поты и труды зельнѣйшими? Но сія убо сице. Васъ же, понеже ничтоже ино не повинуетъ славити Христа Бога Царя, поне [19] многолѣтный сей, иже на вы Божій гнѣвъ, иже послѣдними лютыми и всякымъ безчестіемъ разсѣянныхъ во всѣхъ языцѣхъ озлобляетъ васъ, да увѣщеваетъ неразумныя вашя мысли, не лестца, якоже вы хулите, о богомерзстіи, ниже злодѣя, ниже Божіимъ заповѣдемъ противящася, но самого преславнаго Божія Сына возлюбленнаго безчестною смертію сея жизни извести, Егоже пролитая неповинная кровь, юже взясте на главахъ вашихъ и на чядахъ вашихъ, всегда гонитъ вы. Аще бо лестьца и злодѣя, якоже вы хулите, убили бысте, воистину возвысилъ бы убо васъ Богъ зѣло велелѣпнѣ, и множайши пророки паче, нежели преже, послалъ бы вамъ, и вашея державы наибольше утвердилъ бы; неложно бо обѣтовавіе Его, еже глаголетъ: прославляющая Мя и Азъ прославлю, а безчествующіи Мя прімутъ безчестіе; [20] егоже искуство [21] уже пріясте на многа лѣта всѣхъ вкупѣ и отечества, и державы, и пресловутаго храма вашего лишени бывше, и самыя свыше на вы посылаемыя Божія пророческія благодате, еяже прегрѣшивше, жилища прочее явистеся всякыя злобы и бѣсовскыя прелести. Къ симъ же и оно подобаетъ трезвенымъ разумомъ разсуждати и богомудренымъ мѣриломъ прилежнѣ разсмотрити, яко аще не сей бы былъ предпроповѣданный Мессія, и аще, якоже вы хулите, льстець, а не Богъ крѣпкый бы былъ, ниже о Немъ богодохновенная пророчества вся имѣшя были неблазнено сбытіе свое, ниже разорити храмъ и градъ вашъ, якоже прореклъ есть, возмоглъ бы и васъ самѣхъ злѣ погубити, ниже во благовѣріе разногласная колѣна человѣковъ призывати и мглу истуканныхъ [22] отгнати. Сія же единому Богу возможна точію, отъ человѣкъ же ни единому. Колицы бо многажды всякыя премудрости исполненіи, еще же и высотою царскою обложени, тщашяся своихъ единоплеменникъ подъ своимъ закономъ, ихъже сами умыслишя своею мудростію, подвести, и едва возмогошя единъ языкъ на мало лѣтъ число подвести подъ игомъ своихъ законовъ; Христосъ же Царь мой, гонимь отъ всѣхъ, бѣжа, умирая и осужаемь, съ двѣма-надѣсять точію мужи безкнижными, ничтоже ино вѣдущими, точію ловъ рыбный, не единъ языкъ, ни два, но елику землю обтекаетъ огнеобразное солнце и океянъ окружаетъ, въ свѣтъ благовѣрія и дѣла правды приведе, отстави отъ идолослуженія и всякыя злобы, ни мечь, ни копіе, ни щитъ, ни броня вземъ ниже ухыщренными дѣйствовавъ лестьми, но глаголы нехитростными и чюдесы предивными всѣмъ предлагая слово благовѣрія. И еже есть достойно великаго удивленія, яко совершеннаго цѣломудрія крайнѣйшія правды [23] тѣмъ дая, и соблюдающымъ убо сія непорочно жизнь обѣщавая и царство небесное, а преступающымъ пакы претя огнемъ, выну палящимъ, и преисподними различными муками, не точію не ужасилъ есть ихъ , но и толь благопокоривыхъ имѣлъ ихъ къ своимъ заповѣдемъ, яко и горчяйшимъ мукамъ онемъ тѣлеса своя мощно предати. И бѣ тогда видѣти умиленое вкупѣ нѣкое и предивное зрѣніе, христоборцевъ убо аки звѣрей сыроядцевъ вѣрнымъ [24] нападающихъ, вѣрныхъ же паки мечемь умилено закалаемыхъ и огнемь жегомыхъ, возрастъ всякъ и родъ за Христа, якоже и младыя дѣти и дѣвы дерзати на горыя мукы и самыя смерти, теплѣйшимъ Христовымъ одержимыя раченіемъ. Како же сія, аще не всесиленъ Богъ бѣ Христосъ, удобь сотворилъ бы вскоре по всей вселеннѣй? Како же ся разорила бы и изчезла, искоренився вкупѣ отвсюду идольская прелесть? Како, еже преже гнушаемое и проклятое и ненавидимое, аки смертное орудіе, крестообразное древо, нынѣ многожелаемо и всечестно есть покланяніе и почитаніе? Зане жизни подательно и безчисленыхъ благъ; мертвыя бо абіе возставляетъ образуемо, [25] и болѣзни исцѣлѣваетъ и недугы всякія, и полки губительныхъ бѣсовъ далече прогоняетъ, и оружіе во бранѣхъ крѣпчайше есть. Кто же укрѣпивый сіе сицѣвыыи крѣпчайшими силами и всѣмъ вкупѣ вѣрнымъ многожелаемо показа, яко и самѣмъ царемъ съ желаніемъ многымъ на своихъ главахъ пріимати то, начертаемо рукою Божіихъ служителей? точію Той самъ всесильный Божій Сынъ Ісусъ Христосъ, иже на томъ плотію издше, яко человѣкъ, имя же Его страшное призываемо абіе отгонитъ вся злое крестообразнымъ знаменіемъ. Да поется убо и покланяемъ да бываетъ Той, иже яко Богъ царствуя надо всѣми и человѣкъ совершенъ, виже естеству человѣческому въ Божество преложившуся, виже паки въ онь Божественному естеству, во отъ обоихъ едивъ составъ, едино не смѣсно раствореніе, истиненъ же человѣкъ и Богъ, въ вышнихъ царствуя, равенъ сый по всему ражающу же Его Уму, иже выше всякаго ума и слова есть, судія же грядый страшнѣйшій да чаемъ есть дѣломъ и умышленіемъ и словесемь нашимь. Да отвержемъ убо отъ сердецъ нашихъ всякое безумеое ослушаніе и плотолюбивую похоть! Судію да умолимъ истинымъ покаяніемъ, отступивше всяческая злобы нашея; священныя же любве, милости же и правды и цѣломудрія добраго крѣпко да держимся всегда, понеже вѣра, не причястна благыхъ дѣлъ, мертва есть [26] якоже слышимъ, якоже и тѣло, разлучившееся души.

Примѣчанiя:
[1]
Слово это и слѣдующія за нимъ два сочиненія противъ іудеевъ написаны преп. Максимомъ прежде 1525 г.
[2]
положенъ.
[3]
Вмѣсто: сущихъ.
[4]
Въ друг. рукоп.: явльшимся.
[5]
Т.- е. узнать о прекращеніи бѣдствій своего народа.
[6]
У пророка Даніила 9: 24, это мѣсто читается такъ: семьдесятъ седминъ сократишася о людехъ твоихъ и о градѣ твоемъ святѣмъ... и запечатается и видѣніе, и пророкъ, и помажется Святый святыхъ.
[7]
Исаіи 9: 6.
[8]
порядка въ совершеніи нашего спасенія.
[9]
предсказывающаго.
[10]
Разумѣется борьба Іакова съ Богомъ. Быт. 32: 24-31.
[11]
т. е. претерпѣть.
[12]
т. е. человѣкъ.
[13]
а точную причину столь великаго человѣколюбія.
[14]
т. е. претерпѣть.
[15]
которая ясно познается изъ смерти...
[16]
доказывая.
[17]
спасенія міра.
[18]
показавъ въ Себѣ.
[19]
по крайней мѣрѣ.
[20]
Ис. 53, 5.
[21]
исполненіе.
[22]
идоловъ.
[23]
крайне строгія заповѣди.
[24]
на вѣрныхь.
[25]
изображеніемь креста.
[26]
Iак. 2: 20.

Печатается по изданiю: Сочиненiя преподобнаго Максима Грека, изданныя при Казанской Духовной Академiи. Часть первая: Догматико-полемическiя сочиненiя. – Изданiе второе. Казань: Типо-литографiя Императорскаго Университета, 1894. – с. 32-42.

Наверхъ / Къ титульной страницѣ

0