Святоотеческое наследие
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Святоотеческое наслѣдiе
-
Гостевая книга
-
Новости
-
Написать письмо
-
Поискъ

Святые по вѣкамъ

Изслѣдованiя
-
I-III вѣкъ
-
IV вѣкъ
-
V вѣкъ
-
VI-X вѣкъ
-
XI-XV вѣкъ
-
Послѣ XV вѣка
-
Acta martyrum

Святые по алфавиту

Указатель
-
Свт. Іоаннъ Златоустъ
А | В | Г | Д | Е
-
З | И | І | К | Л
-
М | Н | О | П | Р
-
С | Т | Ф | Х | Э
-
Ю | Ѳ
Сборники

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 23 октября 2017 г. Сейчасъ на порталѣ посѣтителей - 10.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ПОСЛѢ XV ВѢКА

Преп. Максимъ Грекъ († 1556 г.)
Словеса супротивна противу главъ Самуила евреина.

Самуила евреина главы съ латынскихъ книгъ перевелъ на русскый языкъ Николай Нѣмчинъ, въ нихъже писано, что Самуилъ былъ послѣ Христова вознесенія лѣтъ 1040. Понеже іудеи, по Христовѣ вознесеніи, разоришася, отъ римлянъ конечно и росточени по странамъ, и нѣціи отъ нихъ предаша писаніемъ своимъ ихъ евреомъ, послѣднимъ родомъ, яко по 1000 лѣтъ паки имъ вселитися въ Іеросалимъ, и сіе у нихъ писаніе благонадежно держаху честнѣ. Егда же, по плѣненіи ихъ, исполнишася тысяща лѣтъ, тогда и Самуилъ уразумѣ, яко имъ на горшее преспѣваетъ, а не возвращеніе знаменуетъ. Тогда зазрѣ самъ себѣ и всѣмъ жидомъ, яко не за простое согрѣшеніе толико лѣтъ въ плѣненіи, но за Христово распятіе. И собра отъ пророческихъ книгъ главы о плотскомъ Христовѣ смотрѣніи и о призваніи языкъ и отверженіе ветхыя жертвы.

Глава 1.

Тогда будете люди Божіи и спасенніи будете имъ, егда, отступивше всякаго вашего зловѣрія и упрямъства и непокорства, возглаголете съ вѣрою и любовію съ ними: благословенъ грядый во имя Господне, Богъ Господь и явися намъ, и въ заповѣдехъ Его станете ходити, крестившеся во имя Отца и Сына и Святаго Духа, якоже есть писано: твой есмь азъ, спаси мя, таже приводитъ, зане рече: оправданія твоя изыскахъ. Вы, и Его Божества отмѣтающеся, рекше предъ Пилатомъ: [1] мы царя не имамы, токмо кесаря, и паки: кровь Его на ны и на чада наша; и оправданія Его не пріемлюще, еже глаголетъ: вѣровавый и крестився спасется, а не вѣровавый осудится. [2] Како глаголеши: мы убо Божіи есме во всякомъ статіи [3] нашемъ? или не слышалъ еси глаголющаго пророка: и паки отчужени быша грѣшницы отъ ложеснъ, заблудиша отъ чрева глаголаша лжу?

Глава 2.

Не Божіи къ тому есте, якоже предпоказася нами, ниже упованіе ваше твердо есть; писано бо есть: пожрите жертву правдѣ и уповайте на Господа; [4] вы же, убивше Его, врази уже есте Ему и убійця, а не сынове, ни друзи и не людіе паствы Его. Како убо уповаете нань? суетно убо упованіе ваше и богомерско.

Глава 3.

И аще въ гнѣвѣ Божіи есте, то убо и врази и богомерзцы. Како убо Его есте, писанію глаголющу: сынове чюждіи солгаша Мнѣ, сынове чюждіи охромоша отъ стезь своихъ? Онъ чуждихъ уже васъ и вѣсть и именуетъ; и ты, Самуиле, своихъ Его глаголеши васъ?

Глава 4.

И аще, по словеси истинны и твоему, отцы ваши оскудѣша и заблудиша, не познавше пришествія Христова, то убо и вы сами оскудѣли и заблудили съ ними, и сего ради погибли, по реченному: се удаляющіися отъ Тебе погибнутъ.

Глава 5.

И въ томъ неправду глаголеши, Самуиле: и Моѵсей и прочіи пророцы ходиша во всѣхъ заповѣдехъ и свидѣніихъ и оправданіихъ Божіихъ, правдою живше и цѣломудріемъ, и вѣрою несумнѣною и желаніемъ горящимъ, Месію Христа и ждаху и уповаху нань и пророчествоваху, яже о Немъ; вы же не точію не ходите во всѣхъ заповѣдехъ Божіихъ, якоже они ходили, но еще и, противящеся пророчествіямъ ихъ, убисте Христа Бога, послана къ вамъ на избавленіе вамъ же и всему роду человѣческому. Аще же и они, якоже человѣцы, согрѣшиша въ чемъ нибуди по невѣденію и забвенію, или мыслію, худымъ нѣкимъ согрѣшеніемъ единою, но абіе исправляху себе и не пребываху противляющеся заповѣдемъ Божіимъ, ниже валяхуся въ сквернахъ плотскихъ и беззаковныхъ сластехъ, якоже вы и мы. И солгалъ убо еси и хулилъ злѣ на праведныхъ онѣхъ.

Глава 6.

И то слово твое, о Самуиле, мнѣ ся кажетъ безлѣпично, да не глаголю, безумно, аще бо истинною вѣровалъ еси Христа быти Месію, о Немъ же вси пророцы писаша предивна, коея ради вины желая глаголеши: о да быхомъ загладили отъ книгы Исаины рѣчь сію: егда убихомъ Его? Лѣпо было бы тебѣ глаголати сице: о да быхомъ тогда послушали пророка и Богу ся покаяли, а пророка бы не убили, и Богъ бы насъ не отринулъ. Къ симъ же, аще бы и загладили рѣчь сію, тогда, ниже сице могли были погасити Христову славу Божествевную; писано бо есть пророкомъ Аввакумомъ: [5] покры небеса добродѣтель Его и хваленія Его исполнь земля, и паки: яже Богъ помыслилъ, кто разорити возможетъ, и руку его высокую кто отвратити возможетъ. [6]

Глава 7.

Самуиле господине, не прикладывай Христово вознесеніе преложенію Енохову и взятію аки на небесѣхъ Иліину на колесницы огненней и конехъ. Они человѣцы точію быша святіи, и праведніи и сего ради овъ убо ангела всяко имѣ преложшаго ѝ, а не собою, ни аеромъ, овому же колесница и кони огневидни послашася. Ниже на небо рече писаніе преложена бывша Еноха, ты то глаголеши, ни Илія на небо, но аки на небо взятъ бысть, рече писаніе; Христосъ же Богъ сый плотоносенъ и содѣтель всѣхъ и Господь Еноху и Иліи и Моѵсею, не аерною легкостію, но Божественною силою взыде на небо самое, а не аки на небо, якоже Илія; облакъ свѣтелъ предивнѣ приведъ отъ небытія въ бытіе ниже подъятъ Его, рече Лукино писаніе, отъ очію учениковъ Его, не аки требуя облачныя помощи на возхожденіе. Не буди мудрствовати намъ таково хульно; Онъ бо вся носитъ и держитъ въ руцѣ своей; но древнее исполняя пророчество, глаголюще о самомъ Содѣтели: [7] пропинаяй небо, яко скинію, покрываяй водами превыспренняя своя, полагаяй облаки на возхожденіе свое, ходяй на крилу вѣтреню, якоже и индѣ глаголетъ: и взыде на херувимъ и возлете, возлете на крилу вѣтреню. А еже глаголеши, яко и Мафусала взятъ бысть на небо въ плоти и Моѵсей, того святое писаніе ниже гдѣ являетъ, но яко Мафусала поживе толика и толика лѣта и умре, а не глаголетъ: преложенъ или взятъ бысть на небо, ни о Моѵсеи глаголетъ, яко взыде на небо, но яко умре и погребенъ бысть всяко архангеломъ Михаиломъ, иже и стязашеся съ діаволомъ о тѣлеси Моѵсеовѣ, егда и запрети діаволу Михаилъ, рекъ: да запретитъ ти Господь, діаволе, и тако, отступившу діаволу, погребено бысть тѣло Моѵсеово на горѣ оной, ли инде, Богъ вѣсть единъ, а писаніе того не объявило. Сіе же глаголю до Месіина, иже есть Христово, воплощенія и распятія и во адъ сошествія; тамо бо, Христу сошедшу съ душею всесвятою своею, не точію Мафусалу и Моѵсея, но вся вкупѣ, иже отъ вѣка, праведныя исхитивъ изъ руки адовы, вывелъ ихъ изъ тмы и сѣни смертныя и ввелъ ихъ въ древній божественный рай, и нынѣ суть съ Царемъ и Спасомъ своимъ и въ раю, и на небеси и вездѣ, по реченному, идеже ни будетъ трупъ, ту соберутся и орлы. [8] А еже глаголеши о прехожденіи сыновомъ израилевымъ, яко вода ношаше тѣлеса ихъ, не согласно глаголеши святому писанію; писаніе бо сице явѣ глаголетъ: водрузишася, аки стѣна, воды, водрузишася и волны посредѣ моря; отъ сего разумѣти есть, яко посредѣ обою сею водяною стѣною путь имъ бысть сухъ, маніемъ Божіимъ водящаго ихъ, якоже пониже глаголетъ: сынове же израилевы проидоша сушею посредѣ моря, а не глаголетъ: водою носими, проидоша, якоже ты глаголеши. А еже глаголеши, яко съ небесе сшедъ, ношаше тѣлеса волуя [9] и скотская на небеса, явлени бляди суть и рожденіе младенческія мысли, за неже кромѣ писанія сіе глаголеши; писаніе бо глаголетъ сице явѣ: яко огнь онъ сшедъ съ небесе, вся вкупѣ и мяса, и полена, и воду ту, и каменіе и самую землю, вся сожже, и снѣде и опепелилъ, а не глаголетъ, яко ова убо сожже, а тѣлеса волуя и скотская вознесе въ верхъ. Нѣсть лѣпо, Самуиле добрый, кромѣ святыхъ писаній глаголати что, или мудрствовати —не приложиши бо, рече Господь къ Моѵсею, къ рѣчи сей, ниже уложиши.

Глава 8.

Доколѣ не испувѣдуете Христа истиннаго Бога и не отступаете невѣрствія вашего, ни молитва ваша пріятна есть Богу, ни постъ, ни жертва, ни обрѣзаніе, ни суботы; вся бо сія возненавидитъ душа моя, рече Исаіемъ пророкомъ. [10] И аще безчисленно и уповаете и прибѣгаеге къ Нему, вся вамъ суетна и не полезна. Во гнѣвѣ Божіи есте и ходите, якоже явѣ глаголетъ пророчество: [11] да обрящется рука твоя всѣмъ врагомъ твоимъ, десница твоя обрящетъ вся, невавидящая Тебе, зане положиши я, якоже пещь огненню во время лица твоего. Чесо же ради? зане уклониша, рече, на Тя злая, помыслиша совѣты, ихъже не возмогоша составити, яко положиши я хребетъ, еже есть, побѣдиши ихъ и въ бѣгство обратиши я, во избытцѣхъ ихъ, сирѣчь, иже останутъ въ томъ же имъ безвѣріи и жестокосердіи, уготовиши лице свое, еже есть, гнѣвъ твой. Всуе убо хвалишися и глаголеши частѣ: обаче Божіи есме и къ Нему прибѣгаемъ.

Примѣчанiя:
[1]
Іоан. 19: 15.
[2]
Матѳ. 16: 16.
[3]
состояніи.
[4]
Пс. 4: 6.
[5]
Аввак. 3: 3.
[6]
Исаіи 14: 27.
[7]
Пс. 103: 2.
[8]
Матѳ. 24: 28.
[9]
воловья.
[10]
Исаіи 1: 14.
[11]
Пс. 20.

Печатается по изданiю: Сочиненiя преподобнаго Максима Грека, изданныя при Казанской Духовной Академiи. Часть первая: Догматико-полемическiя сочиненiя. – Изданiе второе. Казань: Типо-литографiя Императорскаго Университета, 1894. – с. 45-51.

Наверхъ / Къ титульной страницѣ

0