Святоотеческое наследие
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Святоотеческое наслѣдiе
-
Гостевая книга
-
Новости
-
Написать письмо
-
Поискъ

Святые по вѣкамъ

Изслѣдованiя
-
I-III вѣкъ
-
IV вѣкъ
-
V вѣкъ
-
VI-X вѣкъ
-
XI-XV вѣкъ
-
Послѣ XV вѣка
-
Acta martyrum

Святые по алфавиту

Указатель
-
Свт. Іоаннъ Златоустъ
А | В | Г | Д | Е
-
З | И | І | К | Л
-
М | Н | О | П | Р
-
С | Т | Ф | Х | Э
-
Ю | Ѳ
Сборники

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 28 апрѣля 2017 г. Сейчасъ на порталѣ посѣтителей - 13.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ПОСЛѢ XV ВѢКА

Преп. Максимъ Грекъ († 1556 г.)
Слово 2-е о томже къ благовѣрнымъ, на богоборца пса Моамеѳа, въ немже и сказаніе отъчасти о кончинѣ вѣка сего.

Но елика убо Божія благодать, свыше наставляющи, дасть глаголати противу безбожнаго сего и христоборца чювьствена бѣса, глаголю же сквернаго Моамеѳа, толика и сицева. Нынѣ же къ благовѣрнымъ слово обращу, не аки превосходя, нѣкый азъ учителъ имъ сый, или поставленъ свыше надъ ними, но и акы наименшій и худый братъ имъ, и стаинникъ въ благочестивыхъ догматехъ непорочныя и боготворительныя вѣры христіанскыя, воспоминая имъ и себѣ самому отъчасти, утвержающая убо насъ и соблюдающа въ яже о Христѣ, истиннѣмъ Бозѣ нашемъ и Спасѣ, вѣрѣ и любви и надеждѣ, и храняща насъ невредныхъ отъ достигшихъ насъ нынѣшнихъ временъ нестроеній. И да тако реку: отъ темнаго и безсвѣтнаго мрака нынѣ паче, нежели иногда когда, приличнѣе есть глаголати намъ съ блаженымъ пророкомъ и царемъ Давыдомъ: ты Господи да соблюдеши ны отъ рода сего и въ вѣкы; [1] чесо ради? зане, рече, окрестъ нечестивіи ходятъ. Идѣже бо, аще вселенныя [2] простреши мысленое око души, тамо всяко обрящеши множащуся и омрачающу тму нечестія христіаноборцовъ измаилтянъ. Наченшу убо отъ лѣтъ Ираклія царя греческаго, и простерту даже и до сего времени, ей убо и въ послѣдующее пребыти хотящу, якоже азъ отъ божественыхъ писаній учимъ бываю, даже и до явленія самого богоборца антихриста, еже не зѣло далече есть, но и при дверехъ уже стоитъ, яко же божественая писанія учатъ насъ, явьственнѣ глаголюща: на осмомъ вѣцѣ быти хотящу всѣхъ устроенію, сирѣчь и греческія области престатію, и началу мучительства богоборца антихриста, и второму страшному на земли Спаса Христа пришествію. А яко недалече стоитъ сицево чаемое благовѣрныхъ всѣхъ устроеніе, явьствено есть и отъ иныхъ многыхъ, яснѣйшихъ писанныхъ показаній и преданій, и наипаче, отъ нихже блаженый апостолъ Павелъ пишетъ въ еже къ Солуняномъ, посланіи второмъ, учя ихъ хотящая быти знаменія преже Господня втораго пришествія: и никтоже васъ, рече, да прельщаетъ ни по единому образу, аще бо не пріидетъ отступленіе прежде, и открыется человѣкъ беззаконія, сынъ погибельный, противляяйся и превозносяся надъ всякымъ глаголемымъ Богомъ и чтилищемъ, яко ему сѣсти въ Церкви Божіи, аки Богу, и прочая. [3] Отступленіе же, сирѣчь преложеніе языкъ отъ непорочныя и правыя христіаньскыя вѣры на различныя богомерскія ереси, на христоборное безвѣріе агарянъ, когда иногда, болше нынѣшняго, чаемъ видѣти или слышати? гдѣ, яже въ благовѣріи и честности боголѣпнѣй возсіавшая, красота вкупѣ и слава бывшихъ вѣрныхъ въ Iеросалимѣ, и Александріи, и Египтѣ, и Ливіи и Антиохіи? гдѣ теплота она и ревность божественная возсіавшихъ въ постѣ, въ скитѣ и въ горней Ѳиваидѣ, и въ различныхъ странахъ и горахъ, богоносныхъ и равноангельныхъ отецъ нашыхъ? гдѣ, яже въ благовѣріи возрастшая, высота пресловутая и похвала всѣхъ западныхъ языкъ, святая, глаголю, соборная и апостольская Церковь ветхаго Рима? Не сія ли вся видимъ нынѣ, ова убо обладана бывша, ова же и запустѣна, отъ безбожныхъ агарянъ, ова же охудѣна и непотребьна бывша до конца различными богомерскыми ересми, ихже началникъ есть той, иже преже пресвѣтлый и преименитый во благовѣріи и во всякомъ житіи честномъ и премудрости, древній Римъ и яже по немъ прочая Италіа? Иди мысленымъ, душе, окомъ въ Индію и Ефиопію послѣднихъ концевъ вселенныя, — и тамо обрящеши всяко безобразіе и гнушеніе всяческыхъ ересей. Есть же, гдѣ и агаряньское нечестіе узриши, тамошныя языкы прельщающе, и къ себѣ прилагающе, гдѣ различныя восточныя, вѣрныя языки, отъ нихъ же свѣтъ благовѣрія наченъ сіяти, при божественныхъ апостолехъ, и къ намъ европiяномъ разліяся. Не сія ли вся безмала, [4] агарянская нечестивая тма, ова убо къ себѣ уже преложи, ова же не потребьствова, и озлоби и растлѣла есть душевнѣ, и растлѣваетъ всегда всякымъ образомъ? Что не глаголю болшее всѣхъ бывшихь на земли пресловутыхъ слышаній и видѣній? гдѣ высота и неприкладная слава, елика въ области и премудрости и всякой добродѣтели и благозаконіи и православнѣи вѣрѣ царствія православныхъ христіанъ царей, царствовавшихъ въ всеславнѣмъ и благочастнѣмъ градѣ Констянтина великаго? гдѣ всемірный онъ свѣтъ благовѣрія, иже, подобнѣ солнцу, осіявая вселенную всю, архіереиствовавшими въ немъ, равноангельными святители? Не сія ли вся, лѣты уже довольными, работна суть и подручна измаилтяномъ? И ниоткудуже избавленія намъ нѣсть, но всегда, яже убо по насъ на горшее, а яже по нихъ въ еже славнѣе происходятъ. Уразумѣимъ мыслено, въ каково злочястіе нынѣ доидошя, яже у насъ, бѣдныхъ грековъ, вещи; како всѣхъ онѣхъ благыхъ вкупѣ лишихомся, и умалихомся паче всѣхъ языкъ, и быхомъ поношеніе сосѣдомъ нашимъ, посмѣаніе и поруганіе окрестнымъ нашимъ, по божественому рещи писанію. Гдѣ убо нынѣ, яже паче ума и слова тогда совершахуся въ немъ, отъ пречистыя Божія Матеро чюдеса, избавляющія его, паче надежа, отъ частыхъ нахоженій варьварскыхъ? Чесо ради сія вся нынѣ погасло? Чесо ради нынѣ не востаетъ градохранительница и Владычица того на заступленіе и избавленіе всяко? преже дерзнутыхъ ради въ немъ, нашими прародители, неисцѣльныхъ беззаконій. Или не тако божествоное пѣснопѣніе глаголетъ о подобнѣ намъ нечествовавшихъ іудеяхъ: обаче за льщенія ихъ положилъ имъ еси злая, низложилъ я еси, внегда разгордѣтися имъ; како бышя въ запустѣніе, внезапу изчезошя, погибошя за безаконія ихъ, якоже сонія востающаго. [5] Но плакати, яже по единому нашихъ злосчастій, оставивше, на предложеное возвратимся, и уразумѣемъ, инымъ божественымъ и неложнымъ гласомъ, не далече, но близъ стоящу всяческыхъ устроенію, сирѣчь чяемую кончину вѣка сего, и яко скверный Моамеѳъ той есть, глаголемый въ божественѣй апокалипси, псевдопрофитъ [6] и предитечя богоборнаго антихриста. Смотримъ же сице. Господь нашъ Iсусъ Христосъ, въ святыхъ евангеліяхъ, уча ученики своя, вкупѣ и утвержая ихъ и ими всѣхъ вѣрныхъ въ своей вѣрѣ и любви, и вопрошенъ бывъ отъ нихъ, рекшихъ: рци намъ, когда сія будутъ, и кое есть знаменіе твоего пришествія, и кончина вѣка сего, — и той предреклъ имъ, елика лютая и нестроенія случятся въ человѣцѣхъ, преже страшнаго пришествія своего и кончины вѣка сего, приводитъ [7] глаголя: и тогда соблазнятся мнози, и другъ друга предадятъ, и возненавидятъ другъ друга, и мнози псевдопроѳити востанутъ и прельстятъ многихъ, [8] начальникы, прозябшихъ различныхъ ересей, въ своей Церкви, знаменуя сице Владыка, яковъ же бысть Симонъ волхвъ, и Маркіонъ, и Манентъ, и Оригенъ, Арій же и Македоній и Несторій, Сергій же и богомерстіи иконоборци, иже вси, различнѣ, озлобишя соборную Церковь Спаса Христа, и бесчисленныхъ отъ православныя вѣры привлекошя въ своя ереси. Таже приводитъ, глаголя: и проповѣсться евангеліе сіе царствія во всей вселеннѣй, во свидѣтельство всѣмъ языкомъ, и тогда пріидетъ кончина. [9] Чесо же ради во свидѣтельство проповѣсться? да слышавшеи и вѣровавшеи спасутся, а не вѣровавшеи осудятся прочее праведнымъ осужденіемъ, аки не имуще ни единый извѣтъ [10] о своемъ невѣрьствіи. А яко уже проповѣдася издавна евангеліе царствія Божія во всей вселеннѣй, свидѣтель достовѣренъ божественый Павелъ апостолъ, глаголя о прочихъ апостолехъ своихъ, на осужденіе невѣрныхъ іудеевъ: но глаголю: еда не услышашя, ей услышашя, во всю бо землю изыдоша вѣщанія ихъ и въ концы вселенныя глаголы ихъ, [11] сирѣчь апостолъ Христовыхъ. Таже по еже предпроповѣдати имъ будущее омраченіе свѣтиломъ, и паденіе звѣздамъ, и силъ небесныхъ движеніе, притчею представляетъ имъ и образователнѣ [12] время кончины вѣка и своего пришествія, глаголя: [13] отъ смоковници же научитеся притчи, рекше, глаголемая вамъ нынѣ отъ мене гадателнѣ, егда уже вѣтвь ея, рече, мякька будетъ и листвія прозябнутъ, вѣдите, яко близъ есть жатва, такожде и вы, егда увидите сія вся, вѣдите, яко близъ есть, при дверехъ сирѣчь, кончина вѣку. Смоковницу Владыка глаголя, якоже мнѣ ся видитъ не садъ сей чювственный и плодоносный, — сего бо сада вѣтвь, по вся лѣта, мякка бываетъ и плодъ приноситъ, и листвія происпущаетъ, но ниже и кончину приводитъ, — но смоковницу глаголетъ, таинственнѣ простертую по всей вселеннѣй, святую соборную и апостольскую Церковь свою, вѣтвь же плодоносну — учителное слово, сирѣчь евангельскую проповѣдь, ею же и въ ней же отъ предстоящихъ Церкви Христовѣ архіереевъ просвѣщаеми и учими, иже вездѣ благочестивіи, плодоносна является своему небесному Садодѣлателю мысленная сія смоковница, и сего ради благословеніе духовно свыше пріемлетъ, и на лутчее всегда преспѣваетъ. Аще же вѣтвь ея мякька будетъ, сирѣчь учителное слово не имать твердое, и не обинительно [14] и не на лици зрящи, по апостольскому божественому словеси, глаголющему: обличи, запрети, утѣши, двигнися благовременне, безвременне, дѣло благовѣстника сотвори, — и сего ради листвія точію вѣтвь ея произноситъ, сирѣчь безплодіе благыхъ дѣлъ, приличнѣе же есть рещи презрѣніе и преслушаніе евангельскыхъ Божіихъ заповѣдей, по небреженію многому пастырей, не пріемлетъ свыше благословеніе духовное, но, отсѣцы ея, услышитъ, вьскую и упражняетъ землю, и еже да нектому истебе плодъ будетъ въ вѣкы. Когда же иногда паче, нежели нынѣ, умякчится вѣтвь таинственныя сея и божественыя смоковницы, и листвія произрастутъ ли, егда нѣсть ни единъ учай прилѣжнѣ, ни наказуя безчинныя, никтоже утѣшая малодушьныя, никтоже заступаяй и прилежа о немощныхъ, никтоже обличаяй противящихся слову благочестія, никтоже запрѣщаяй безстуднымъ, никтоже обращаяй заблуждьшихъ отъ истины и честнаго житія христіанскаго, никтоже за совершенное смиреномудріе отбѣгаетъ священническихъ санъ, ниже по божественней ревности взыщетъ ихъ, да люди безаконнующая и безьчинствующая исправитъ. Но супротивное паче обрящеши нынѣ дерзаемо: вси готови дары великими сихъ купити, да въ отрадѣ и славѣ и всякомъ покои всегда живутъ. Нынѣ время видитмися рещи глаголющую божественую рѣчь: [15] вси уклонишися, сирѣчь отъ спасителнаго пути евангельскыхъ заповѣдей и апостольскыхъ и отеческыхъ преданій, вкупѣ непотребни бышя, рекше и житіемъ и словомъ и дѣломъ, а еже по сихъ въслѣдуетъ, молчаніемъ миную, щадя негодующихь слову же и дерзновенію и ревности, яже по истинѣ. О како кто достойнѣ восплачетъ достигшую нынѣ родъ нашь тму! Окрестъ нечестивіи ходятъ, якоже скимни рыкающе и всякыми образы прельщающе, и хыщаютъ [16] отъ Бога благочестивыхъ и своему отцу діаволу приносятъ, даръ ему любезнѣйшій; наши же пастыріе, безчювьственѣйши каменій, устроишася, довольно себе въ отвѣтъ тогда непщующе, аще себе спасти возмогутъ, волею презирающе и не разумѣвающе божественый гласъ, глаголющь: азъ есмь пастырь добрый; пастыръ добрый душю свою полагаетъ за овца, а наемникъ, иже нѣсть пастырь, зритъ волка грядуща издалече, и оставляетъ овця и бѣжитъ, зане наемникъ есть, и нерадитъ о овцяхъ; волкъ же хыщаетъ овця, и расточаетъ я, ихъже кровь, рече, изыщу отъ руки пастырей. Страшно сицевое на васъ прещеніе и всякія грозы исполнено, о честнѣйшіи пастыріе! Услышите и блаженаго Павла апостола, яснѣ глаголющаго о васъ и о отвѣтѣ, егоже должи есте сотворити предъ неумытнымъ Судіею: братіе, рече, повинуйтеся наставникомъ вашимъ, — и послушайте чесо ради, — тіи бо бдятъ, рече, о душяхъ вашихъ, яко слово отдати хотяще о васъ. [17]

Возвратимжеся пакы къ предложеному. Предреченное убо божественымъ апостоломъ отступленіе языкомъ отъ евангельскія проповѣди къ различнымъ богомерскымъ ересемъ и къ богоборному нечестію агаринъ отродъ, [18] ово убо уже бывше, ово же по вся дни дѣйствуемо зряще; такожде и таинственныя смоковницы вѣтвь, мякку бывшу паче елея, по пророчеству, и листвія, а не плоды, якоже древле, происпущающу, разумѣвающе, что ино ждемъ, а не точію будущую кончину всяческыхъ, по божественымъ писаніемъ, и наипаче агарянскому мучителству, отъ лѣтъ Ираклия царя наченшу, и множайшая и лучшія страны вселенныя подъ собою покоршу, и покорити всегда попущаему, судбами Божіими непостижными, и православныхъ царей царствію на многа начальства раздѣльшуся, и довольна уже лѣта отъ агарянъ разорену бывшу, и исправленіе ниоткудуже получающу. Супротивно же паче, останкомъ западныя римскыя державы, на многа королевьства и государьства раздѣленнымъ, и безпрестани межи себе враждебне живущимъ, и другу на друга воюющимъ, западнымъ королемъ, по подобію прежнимъ нашимъ европіяномъ, царямъ же и государемъ и княземъ, грекомъ же и булгаромъ и сербомъ, ихъ же всѣхъ вкупѣ истребилъ есть, напущенный свыше на насъ, злобезбожный измаилтянинъ. И исполнися апостольскій гласъ глаголющій: аще же другъ друга снѣдаете и грызаете, блюдитеся да не другъ отъ друга истреблени будете. [19] Таяжде и Владычьный Божественый гласъ уставляетъ, глаголя: всяко царство, раздѣльшееся на ся, запустѣетъ. [20] Яко же бо, иже многыхъ другъ ко другу по Бозѣ миръ и единомысліе, сущій миръ, глаголю же самого Христа, вселяетъ и держитъ въ нихъ возрастающа и благословяща и множаща ихъ, по божественому гласу, глаголющу: идѣже бо, аще будутъ два или три собрани о имени моемъ, ту есмь посредѣ ихъ, сице пакы же, многыхъ другъ ко другу разногласіе и брань, отъ гордости, властолюбія же и сребролюбія, составлено, самого богоборца и человѣкоубійца діавола вселяетъ въ нихъ, отъ него же прочее, невидимо воеводъствуеми, не престаютъ другъ на друга, аки звѣри дивіи, сурово воююще, дондеже другъ отъ друга до конца истребятся. Симъ убо сице бывшимъ, и бываемымъ по вся дни, судьбами Божіими неислѣдованными, добро есть и спасительно намъ, и самому Вышнему благоугодно, отвергшимъ намъ отъ мыслей нашихъ всякія слабости и душегубительно отчяаніе, и наипаче прельщающія насъ надежды суетныя, яко пакы чаемъ, якоже и прежде, устроится держава царьская въ Констянтинѣ градѣ, востати намъ отъ многолѣтнаго сна премногаго нашего безпечалія и небреженія, повинующимся глаголющему проповѣднику: братіе, во всякой премудрости ходите, ко внѣшнимъ, время искупующе, понеже дніе лукави суть. [21] И пакы тойже: [22] нощь убо прейде, сирѣчь многолѣтная она тма прелести лукавыхъ бѣсовъ, овладѣвшая надъ человѣческымъ родомъ, даже и до, еже по плоти, рождества Господа и Спаса нашего Ісуса Христа прейде, и до конца изнеможе явленіемъ присносущнаго живота и свѣта, а день приближися, сирѣчь невечерній свѣтлѣйшій свѣтъ неблазненеаго богоразумія, восіявшему разумному солнцу правды, просыпася во всю вселенную и просвѣтилъ есть ю. Сего ради, рече, отложимъ дѣла тмы, яже суть блудъ, чюжеженство и всяка нечистота плотская, и студодѣяніе, не правда же и лихоиманіе, и всяко преслушаніе и преступленіе божественныхъ заповѣдей Спаса Христа, дѣла тмы сихъ нарицая, не зане тмою дѣйствуются, — и въ дни бо блудятъ и крадутъ и всяко иное беззаконуютъ человѣцы, — но зане вѣчной и преисподней тмѣ предаютъ насъ, дѣлателей ихъ. И облечемся, рече, въ оружіихъ свѣта, сирѣчь въ душевныхъ съборныхъ [23] четырехъ добродѣтелехъ, яжо суть: смыслъ прямъ, правда, мужество — не еже тѣлеса ниизлагаетъ и стѣны градскыя разоряетъ, но душевное сильное и терпѣливо противу наводимыхъ намъ отъ бѣсовъ и лукавыхъ человѣкъ, различныхъ напаствованій и обстояній, — цѣломудріе, соблюдающее насъ во всякой святынѣ и преподобьствѣ, и самѣмъ святымъ ангеломъ соединяюще насъ; такожде и въ прочихъ отродехъ сихъ, благая дѣянія: воздръжаніе, кротость, смиреномудріе, вѣру, надежу, любовь, яже есть исполневіе всему закону. Сицевыми оружіи духовными вооружившеся, противъ ополчимся нечестію безбожныхъ агарянъ, емуже начальникъ и обрѣтатель самъ добраненавистливый и богомерскый діаволъ есть, весь во всемъ вселився сквернемъ Моамеѳѣ. Ниже прельщаимся, ниже ужасаимся о добросчастіи же и пресвѣтлыхъ побѣдахъ и исправленіихъ; не въ сицевыхъ бо нѣкыхъ состоится и познавается, еже въ Христа Бога, благовѣріе. Свѣтлѣйши и чюднѣйши сихъ, много зѣло, въ благосчастіихъ и свѣтлѣйшихъ побѣдахъ, быша Александръ Макидонскый и Кесарь Августъ, иже всея вкупѣ вселенныя властель бысть, и, иже по немъ, царіе римстіи, но не сего ради [24] благочестиви были, но лукавыхъ бѣсовъ и идолъ ихъ служителе, Христу гонителе звѣреве, якоже и нынѣшній скверный Моамеѳъ, всякими образы гоня насъ и порабощая себѣ, попущающу Богу, грѣхъ ради вашыхъ многыхъ, а не за благовѣріе нѣкое его. Да не будетъ мудръствовати когда сіе намъ; како бо благочестивъ наречется, иже Бога самого, пославшаго единороднаго Сына своего, Iсуса Христа, отметается, по божественому гласу, глаголющу [25]: не почитаяй Сына, не почитаетъ Отца, пославшаго ѝ, сирѣчь отметаяйся Сына, отметается и Отца пославшаго ѝ, и спасителныя Его заповѣди развращаяй, самого Христа не Сына Божіа ни Бога исповѣдуетъ, но раба и созданіе Божіе мудръствуя его и нарицая; не за благочестіе убо кое его на толику высоту славы земскыя [26] возвысися и возвышается выну, елма ниже предреченіи еллинстіи и римстіи царіе, но неислѣдованными и непостижимыми Божіими судбами сотворъшаго въ премудрости и правящаго вся видимая и невидимая. Да не ужасаимся убо о семъ, Господа ради, ниже да скорьбимъ, о немжо толика уже лѣта работаемъ имъ, и еще ниоткуду намъ нѣсть ни едино заступленіе, ниже помощь, ниже мнимъ оставленнымъ бывшимъ себе отъ Бога Спаса нашего. Елма ниже преже насъ бывшеи христіане 300 и 18 лѣтъ обладаеми и гоними и всякимъ образомъ озлобляеми и обидими отъ христоборцовъ мучителей, еллинъ и римлянъ и іудеевъ, не скорбяху, ниже низпадаху мысльми своими, но паче радовахуся и веселяхуся за Христа и, яже въ Него, вѣру гоними и всякыми муками изнуряеми плоти своя, вѣрою, яже въ Него, и любовію и надеждею крѣпящеся и себе утвержающе, поминающе, съ твердою и несумненною вѣрою, обѣщаніе Господа Бога нашего и Iсуса Христа, глаголющаго: блажени изгнани правды ради, яко тѣхъ есть царство небесное; блажени есте, егда поносятъ васъ и ижденутъ и рекутъ всякъ золъ глаголъ на васъ, лжуще Мене ради, радуйтеся и веселитеся яко мьзда вашя многа на небесехъ [27]; такожде, понимающе и завѣщаніе блаженнаго Iякова, Аделѳоѳея [28]. глаголющаго: всяку радость возмните братія моя, егда въ напастехъ впаднете различныхъ; сихъ Божественыхъ обѣщаній держащеся, треблаженніи они воистину христіане, не скорбяху, ни опечаляхуся, гоними отъ нечестивыхъ, и всякымъ образомъ мучими и озлобляеми, и своихъ имѣній и стяжаній лишаеми, но паче славословяху Спаса Христа, яко сподобилъ ихъ таковая страдати за Божественую славу Его; тѣмже и Христосъ воспрослави ихъ, неточію на небесехъ, равныхъ ихъ святымъ ангеломъ показавъ и вѣнчавъ ихъ вѣнцы славы неувядаемыя, но еще и на земли, прослави пречестныя ихъ мощи, дарованіи всяческыхъ исцѣленій и всякыми чюдодѣяніи предивными. Сице бо Самъ, иже святыхъ Своихъ мученикъ Богъ же и Владыка, обѣща пророкомъ Своимъ, глаголя: прославляющая Мя прославлю, а обесчествующіи Мя, обезчествуются. О нихже и духовное пѣснопѣніе издалеча глаголаше: мнѣ же зѣло почтени бышя друзи твои, Боже, зѣло утвердишяся владычествія ихъ, изочту ихъ, и паче песка умножатся [29]. И мы убо, братіе, зане овѣхъ отъроды [30] блаженыхъ и наслѣдникы вѣры, яже въ Христа, истиннаго Бога нашего, такожде и тѣхъ же имъ поношеній и скорбей сопричястницы суще, да не сѣтуемъ ниже низпадаемъ мысльми, гоними отъ нечестивыхъ, и различнѣ оскорбляеми за вѣру, яже въ Христа; но, равьноангельскыхъ онѣхъ горящую вѣру, яже во Христа, и любовь теплую и желаніе вѣчныхъ благъ подражающе, всею душею да радуемся и веселимся и благодаримъ Спаса Христа о всѣхъ, ихъже стражемъ, яко благочестивіи, за славу святаго и покланяемаго имяни Его, послушающе верховнаго (изъ) апостоловъ, глаголюща: возлюбленніи, поелику сообщаетеся Христовымъ страстемъ, радуйтеся, да и въ откровеніи славы Его возрадуетеся, веселящеся [31]; и пакы: аще поношаеми бываете за имя Христово, блажени есте, яко славы Божіи Духъ на вы почиваетъ [32]. Да глаголимъ и мы, съ иже подобнѣ намъ преданными въ скорбь, судьбами праведными всѣхъ Владыкы: вся сія пріидоша на ны, и не забыхомъ Тебе, и не неправдовахомъ въ завѣтѣ Твоемъ, и не отступи вспять сердце наше, яко смирилъ еси насъ на мѣстѣ озлобленія, и покры насъ сѣнь смертная, яко Тебе ради умерщвляеми есмы весь день; вмѣнихомся, яко овця на заколеніе. Востани, Господи, воскресни и не отрини до конца; въскую лице Твое отвращаеши, забываеши нищету нашу и печаль нашу, яко смирися въ перьсть душя нашя, прильпѣ земли утроба нашя; востани, Господи, помози намъ, и избави насъ, имени ради Твоего. Прославимъ убо Его на земли всякымъ правотвореніемъ и честнымъ жительствомъ и терпѣніемъ наносимыхъ намъ скорбныхъ, да и Онъ воспрославитъ насъ на небесехъ. Не далече стоимъ мученическыхъ подвигъ и вѣнцовъ, но въ самомъ стадіи [33] исповѣданія, еже за Христа, стояще есми, аще правѣ мудрствуемъ; многыми скорбъми подобаетъ намъ внити въ царство небесное; никтоже, сѣдяй дремля, поставляетъ одолѣніе. И святый великій Василій и святый апостолъ Павелъ: никтоже вѣнчяется аще незаконно подвигнется [34]. Се время благопріатно; се нынѣ день спасеніа. Братіе, не младенцы умомъ бывайте, рече божественый апостолъ, но злобою младенствуйте, а умы совершени бывайте [35]; да и мы совершенству треблаженныхъ онѣхъ и неувядаемей славѣ и вѣнцомъ сподобимся, о Христѣ Iсусѣ Господѣ нашемъ, Емуже подобаетъ всяка слава, честь и покланяніе, съ безначальнымъ Его Отцемъ и Всесвятымъ, Преблагымъ и Животворящимъ Духомъ, нынѣ и присно, и въ вѣкы вѣкомъ. Аминь.

Примѣчанiя:
[1]
Пс. 11: 8.
[2]
во вселенной.
[3]
2 Сол. 2: 4.
[4]
почти
[5]
Пс. 72: 18-19.
[6]
лжепророкъ.
[7]
присовокупляетъ.
[8]
Матѳ. 24: 11-12.
[9]
Матѳ. 24: 14.
[10]
извиненія, оправданія.
[11]
Рим. 10: 18.
[12]
въ образахъ.
[13]
Матѳ. 24: 32.
[14]
неуклонно.
[15]
Пс. 13: 3.
[16]
похищаютъ.
[17]
Евр. 13: 17.
[18]
агарянскаго рода.
[19]
Гал. 5: 15.
[20]
Матѳ. 12: 25.
[21]
Еф. 5: 15.
[22]
Рим. 13: 12.
[23]
общихъ, главныхъ.
[24]
но по причинѣ этого не были благочестивы...
[25]
Іоан. 5, 23.
[26]
земныа.
[27]
Матѳ. 5, 10-11.
[28]
брата Господня.
[29]
Псал. 138, 17.
[30]
родъ.
[31]
1 Петр. 1, 7.
[32]
1 Петр. 4, 14.
[33]
поприщѣ.
[34]
подвизается.
[35]
1 Кор. 14, 20.

Печатается по изданiю: Сочиненiя преподобнаго Максима Грека, изданныя при Казанской Духовной Академiи. Часть первая: Догматико-полемическiя сочиненiя. – Изданiе второе. Казань: Типо-литографiя Императорскаго Университета, 1894. – с. 106-121.

Наверхъ / Къ титульной страницѣ

0