Святоотеческое наследие
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Святоотеческое наслѣдiе
-
Гостевая книга
-
Новости
-
Написать письмо
-
Поискъ

Святые по вѣкамъ

Изслѣдованiя
-
I-III вѣкъ
-
IV вѣкъ
-
V вѣкъ
-
VI-X вѣкъ
-
XI-XV вѣкъ
-
Послѣ XV вѣка
-
Acta martyrum

Святые по алфавиту

Указатель
-
Свт. Іоаннъ Златоустъ
А | В | Г | Д | Е
-
З | И | І | К | Л
-
М | Н | О | П | Р
-
С | Т | Ф | Х | Э
-
Ю | Ѳ
Сборники

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 24 октября 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ПОСЛѢ XV ВѢКА

Преп. Максимъ Грекъ († 1556 г.)
Слово, списано инокомъ Максимомъ Грекомъ святогорскимъ, противу льстиваго списаніа Николая нѣмчина, егоже списалъ о совокупленіи православнымъ христіяномъ и латыномъ
. [1]

Господь и Богъ и Спасъ нашь Ісусъ Христосъ, къ прочимъ многымъ спасительнымъ завѣщаніомъ и велѣніомъ своимъ, имиже и въ нихже наставляетъ насъ, вѣрующихъ въ Него, на путь всякого твердаго и неблазненаго богоразуміа, приложилъ и сіе, рекъ: внемлите отъ лживыхъ пророковъ, иже приходятъ къ вамъ въ кожахъ овчіихъ, внутрь же суть волцы хищницы [2]. Таже, учя насъ человѣколюбивый, и како ихъ познаимъ и соблюдаимся невредиміи отъ нихъ, приглаголетъ: отъ плодовъ ихъ познаете ихъ, лживыхъ пророковъ именуя, лживыхъ учителей, еже есть еретиковъ, глаголющихъ отъ чрева своего, а не по евангельскому законоположенію и богословію, иже преухыщреннымъ суесловіемъ прельщаютъ сердця простыхъ. Плоды же ихъ неточію дѣла и словеса ихъ, но и та сама сокровенная подъ черниломъ во глубинѣ развратная ученія ихъ. Согласно же Спасу вѣщаетъ и божественный апостолъ Павелъ глаголя о тѣхъ же, во второмъ посланіи, еже к Коринѳяномъ: сіцевіи же суть лживи апостоли дѣлателіе льстиви преобразуеми въ апостолѣхъ Христовыхъ, и прочая. Такова познаваю и льстиваго Николая нѣмчина, иже споживѣ лѣта доволна съ благочестивымъ языкомъ русскымъ, и всякымъ образомъ подщася прельстити ихъ отъ православныя вѣры, отцы преданныя имъ, иже къ прочимъ своимъ лукавствомъ и слово счинилъ бытто [3] о соединеніи русакомъ и латыномъ, единѣ быти тщася показати вѣрѣ обоимъ, и сіе утвержаетъ тѣмъ, еже обоимъ глаголати Христа Сына Божія и Бога истинна, и еже тѣмъ же крещеніемъ во трехъ погруженіихъ совершатися, и яко во имя Отца и Сына и Святаго Духа, и яко въ водѣ, а не во иной вещи, и яко едино исповѣданіе вѣры и обои проповѣдуютъ. Таже и лишшее тщася утвердити сіе, яко латынская Церковь во всѣхъ правѣ проповѣдуетъ таинство благочестія, глаголетъ, якоже имъже образомъ пріатъ отъ самѣхъ святыхъ апостолъ и богодохновенныхъ отецъ, тѣмже образомъ и соблюдаетъ непретворна богословна учителства, сирѣчь, догматы православныя вѣры, и ничтоже отнюдь не премѣнила. И аще по истинѣ сице латынская Церкви мудръствоваше и управляшеся, якоже Николай прелестникъ софистъ утвержаетъ, лѣпо бы убо было всяко и нужно намъ соединятися имъ братскы, всяко прѣніе и сваръ отложившимъ, и миръ и единомысліе возлюбити. Понеже убо во многихъ является лжущъ Николай, и наипаче въ нихже глаголетъ латынскую Церковь соблюдающу вся непретворна преданыя ей отъ святыхъ апостолъ и богодохновенныхъ отецъ, богословны догматы и таиньства, ихже той члены наричетъ, пріиди нынѣ, съ Богомъ помощникомъ, разсмотримъ и уразумѣимъ съ прилѣжаніемъ Николаева софистика оправданіа и изобличенна евангельскою истинною, лжива суща. Не пріимаимъ ихъ отнюдь въ мыслехъ нашыхъ, но отвергше я, акы блазняща насъ отъ правыя и неблазненыя, отцы преданныя, вѣры нашея, да пребываемъ не отступни, въ нихьже научихомся отъ самѣхъ святыхъ апостолъ и преподобныхъ и богоносныхъ отецъ нашихъ.

Но время уже начати мнѣ стязаній, яже къ нему. Начну же отънюдуже и онъ начинаетъ. Добро, о Николае! и зѣло добро и спасительно есть, еже промежу вамъ и намъ соединеніе и единомысліе; сего бо кромѣ не можемъ имѣти Спаса Христа посреди насъ. Самъ бо глаголетъ: идѣже бо аще будутъ два или три собрани во имя Мое, тамо есмь посреди ихъ [4]. Но ниже исповѣдати Всесвятую Троицу можемъ, аще не имамы другъ ко другу чисту и совершенну любовь, якоже іерей возглашаетъ намъ отъ божественнаго олтаря, во время священныа литоргіи, иже глаголетъ: возлюбимъ другъ друга, да единомысліемъ исповѣмы Отца и Сына и Святаго Духа, Троицу единосущную и нераздѣлимую. Но, о премудреишій Николае! аще весьма хощете намъ поистиннѣ соединитися съ вами, преже соединитеся сами вы съ богоглаголивыми апостолы и собравшимися во Святѣмъ Дусѣ седмыми Вселенскыми Соборы, иже изрядну апостольскую догму, глаголю же о присносущнемъ происхожденіи Божественнаго Утѣшителя, преступисте и приложисте во священномъ символѣ православныя вѣры, глаголюще: иже отъ Отца и Сына исходитъ, супротивно всѣмъ вкупѣ восточнымъ богодохновеннымъ богословцомъ и самѣмъ святымъ апостоломъ. Сіе мудръствующе и учяще, и не трепещете страшныхъ онѣхъ проклинаній священныхъ соборовъ, въ нихъже и сами блаженѣйшіи архиереи римстіи, вкупѣ съ прочими четырьми патріархи, утвержаху во Святѣмъ Дусѣ православную вѣру. Како убо глаголеши ты, яко латынская Церковь соблюдаетъ прилѣжно православную вѣру, якоже и пріятъ ю изъ начала отъ самѣхъ апостолъ и святыхъ отецъ? кый апостолъ или евангелистъ сіе предаетъ? или которіи святіи отцы, вкупѣ собравшеся, сіе приложишя во священомъ символѣ? никакоже сіе покажеши; сопротивно же паче обрящешъ сіе отречено суще, и мудръствующихъ сіе подлагаемыхъ анафемѣ. Наипаче третій Соборъ, емуже начальникъ бѣ священный Кирилъ патріархъ александрьскый, иже исполнилъ богословіе, еже о Святѣмъ Дусѣ, и запечатлѣ è съ святымъ Соборомъ, иже не точію мнѣ и тебѣ не велитъ приложити что отнюдь къ еже что отъ него запечатлѣнному священному символу, ниже премѣнити, ниже уложити ни едино реченіе, но ниже себѣ велитъ дерзнути сицево что въ священномъ символѣ, иже и глаголетъ съ святымъ Соборомъ: аще же кто послѣ насъ дерзнетъ, рече, таково что, да будетъ анафема, сирѣчь проклятъ. Что противу сихъ глаголеши, о Николае? или не вѣриши симъ, акы какъбы недобрѣ уставленымъ святымъ Соборомъ? И аще не имеши вѣры симъ, ниже пріемлеши я, что ино речемъ о тебѣ, развѣ, яко бѣснуешися? Вѣриши ли, о Николае, яко Духомъ Святымъ собрашяся богоносніи они свѣтильникы и Божественнымъ Духомъ учими богословишя и уставишя добрѣ и запечатлѣшя священный символъ непорочныя нашеа православныя вѣры? Аще убо вѣру имаши, отступися прочее латыньскаго сего преслушанія и непокорства, инъже недугуетъ съ тобою вкупѣ латынская Церковь, и исповѣдуй со всѣми древними соборы, яко отъ Отца единого происходитъ существеннѣ Всесвятый Духъ, якоже самъ собезначалный и сприсносущный Отцу Сынъ и Слово научилъ есть сіе святымъ евангеліемъ, еже отъ Іоанна, рекъ своимъ ученикомъ: егда же пріидетъ Утѣшитель, Егоже Азъ послю отъ Отца, Духъ истинный, иже отъ Отца происходитъ, и прочяа [5]. Пріими сіе тайно богословіе, произшедше отъ самѣхъ неложныхъ устъ Христа Бога нашего и вашего; пріими сіе учительство со всякою вѣрою и благоговѣинствомъ, царствіе Божіе иносказательнѣ именуемо, зане въ самый животъ вводитъ насъ; пріими сіе тайноученіе, акы дѣтищъ беззлобивъ пріимаетъ, яже учителя своего, ученіа, да сподобишися внити въ не. Аще бо, рече, не пріимѣте царствіе Божіе, якоже дѣти, не имате внити въ не [6]. Вышша себе не взыскуимъ, братіе, да удовлимся откровенными намъ отъ Духа Святаго самимъ Спасомъ и Вселенскыми Соборы. Нѣсть, рече, ученикъ вышше учителя своего, ни рабъ выше своего владыкы; довольно, рече, ученику, да будетъ якоже учитель его, и прочяя. Мы отъ сея Владычнія поклоняемыя притчи просвѣщаеми, и блаженнаго апостола Павла послушающе, заповѣдующаго намъ не мудръствовати паче, еже подобаетъ мудръствовати, сирѣчь паче писанныхъ откровенныхъ Святымъ Духомъ, но мудръствовати, яко цѣломудръствовати, сирѣчь познавающимъ худость нашихъ помыслъ пребывати внутрь уставъ смиреномудрія, да пребываимъ убо тверди и непоступни внутрь уставъ изложеныя благочестивыя вѣры отъ святыхъ апостолъ и священныхъ соборъ, и далѣе сихъ ниже возводимся, ниже возносимся. Вы же, латына, претворяюще и разстлѣвающе неточію изложенное отъ нихъ неблазненно исповѣданіе православныя вѣры, но и многа священная ихъ преданія церковная, достойни есте нарицатися неточію раскольникы, но отчасти еретикы, акы преступникы апостольскыхъ и отечьскыхъ правилъ же и преданій. Глаголютъ бо благочестивыхъ царей законъ и уставъ церковный: еретикъ есть и казнемъ, яже на еретикы, подлежитъ, иже аще и малѣйше что предвигаетъ отъ православныя вѣры. Вы же, большую тайну Живоначалныя и Пресвятыя Троицы предвигающе, и два начала проповѣдующе непостижимаго исхоженія Всесвятаго Духа, кромѣ всѣхъ восточныхъ богодохновенныхъ учителей, къ симъ же и многыя уставы церковныя и апостольская преданіа преступающе, ихже и перво и величайше прегрѣшеніе есть, еже опрѣснокы приносити въ святую службу, согласна мудръствующе проклятому Аполлинарію, отгнавшу просфоры и квасъ и соль, акы овому убо образующу душу, овѣмъ же сказующымъ умъ, ихже лишаше треклятый Господа нашего Iсуса Христа, глаголя его оболкшася въ плоть едину бездушну и безумну. Сея же хулы что можетъ быти хулнѣе? еяже и вы причястникы есте, приносящеи вы, подобнѣ оному проклятому, опрѣснокы, и тойже оному анафемѣ подлежите и вы, акы тоже ему и не хотяще и вы проповѣдующе опрѣсночнымъ приношеніемъ вашимъ.

Оставлю считати прочяа вашя преступленіа многа и странны уставы, еликы сами собою замыслили, кромѣ всякого и закона церковнаго и апостольскаго преданіа: еда не тѣмже еретическымъ епитиміамъ себе повинныхъ сотворили? Толика убо и толь веліа беззаконнующимъ вамъ, како мы сообщимся съ вами, дондеже со рвеніемъ пребываете въ нихъ неотступно? Нѣсть праведно ни на пользю душевну намъ сицевое другъ ко другу сообщеніе. И не глаголи намъ многокозненнымъ хытрословіемъ, яко тоже крещеніе, таже вѣра русакомъ и латыномъ. Слыши же внятно и разумѣй прямо: еретикы, иже отъ Навата презвитера бывша римскаго, наватіане нарицаеми, ниже о крещеніи, ниже о таинствѣ православныя вѣры, ниже о иномъ коемъ законѣ церковнѣмъ, но зане точію дарованное отъ человѣколюбія Спаса Христа грѣшникомъ покаяніе отрицаху и не пріимаху на покаяніе обращающихся, иже въ гоненіи Христа отвергошяся, за то едино отриновени бышя отъ всего Собора православныхъ и прокляти были. Павелъ же божественый апостолъ, къ Галатомъ пишà, вопіетъ не обинуяся: аще кто благовѣствуетъ вамъ паче, еже пріасте отъ насъ, аще и ангелъ есть съ небесе благовѣствуя вамъ, да будетъ проклятъ [7]. Тойже тѣмъ же объявительнѣ свидѣтелствуетъ, глаголя: аще обрѣзаетеся, Христосъ ничимъже пользуетъ васъ. Аще и вся правѣ дѣйствовахуся у нихъ и крещеніе и исповѣданіе христіянскыя вѣры и весь церковный уставъ и чинъ, но понеже пріашя, еже по Моисеову преданію обрѣзаніе и нѣкыхъ иныхъ обычаевъ іудейскыхъ, отринулъ ихъ апостолъ, рекъ: упразднистеся отъ Христа, елицы въ законѣ оправдаетеся, благодати отпадосте [8]. Разумѣеши ли, о Николае, коль естъ сильно еже богопроповѣдника о правѣй вѣрѣ прилѣжаніе? Своя ученикы отринулъ, елма слышалъ ихъ малымъ чимъ уклонившихъся отъ евангельскыя истины и свободы, рекъ: упразднистеся отъ Христа, елицы въ законѣ оправдаетеся. Сіе же: упразднистеся, что ино сказуетъ, точію отпадосте благодати Христовы и сыновленія. Ты же неточію священный символъ православныя вѣры разтливъ, но еще и иныхъ многыхъ апостольскыхъ и церковныхъ преданій преступая, влечеши насъ къ соединенію съ вами многокознеными хитрословіи и различными пестрословіи. Тому же божественому апостолу Павлу завѣщавающу намъ крѣпцѣ отлучатися неточію отъ чюжая учащихъ, но отъ всякаго брата именуемаго, по апостольскому же ученію и преданію не ходящаго, съ таковымъ, рече, ни ясти. Или не Павелъ сіа пишетъ Коринѳяномъ глаголя: нынѣ же писалъ вамъ не смѣшатися; аще нѣкый братъ именуемъ будетъ блудникъ, или лихоимецъ, или идолослужитель, или піаница, или хыщникъ, съ таковымъ ниже ясти [9]; и пакы: измѣте лукаваго отъ среды васъ. Сему свѣтильнику мы грекы и руси иверяне и болгары и сербове и волохи и иніи языцы, немало покаряющеся, и якоже дѣти беззлобиви послушающе, отлучяемся отъ васъ латынехъ, по божественой ревности и желанію вѣчныя жизни, а не по гордости фарисейстей и кыченію суетному, якоже ты, оклеветая насъ, являешися симъ многоплетеннымъ и многокозненнымъ списаніемъ своимъ, въ немъже и нѣкыя обдержатся нелѣпотныя учителскія твоя повѣсти, непросвѣщенныя мысли изобрѣтенія. Како бо нелѣпотно и отринуто и мерзко благочестивому слуху, еже глаголати сатаниньскымъ дѣйствомъ ослѣпленныхъ бывшихъ Луку и Клеопу божественыхъ апостолъ, идущихъ во Еммаусъ? Откуду имаши сіе пріемъ? или кое богодохновенно толкованіе отеческое научило тя есть сему, яко сатаниньскымъ дѣйствомъ, а не Божественнымъ строеніемъ, провосходящимъ всякого ума человѣчя, очеса ихъ удержашеся, да не познаютъ Iсуса, якоже и очи блаженныя Маріи Магдалины видѣвша Его предстояща, и не познавши глаголаше къ Нему, акы къ вертоградарю: Господи, аще ты еси взялъ Его, рцы ми, гдѣ еси положилъ Его. Еда мудръствуеши, Николае, яко и очеса ея сатана поразилъ слѣпотою? Оле твоего не наказаннаго ума, паче же хульнаго! Божественнымъ смотреніемъ, невѣдомымъ намъ, удержашася очеса учениковъ, о Николае, а не по сатанинскому дѣйству. Идѣже бо Божіе пришествіе и бесѣда Владычня, о Николае, оттуду избѣже и исчезе всяко дѣйство сатанинско и кознь. Подобно сему твоему нелѣпотному толкованію и ино нѣчто повѣствуеши чюже и невѣдомо соборнѣй и апостольстей святѣй Церкви. Глаголеши бо, яко божественніи апостоли собравшеся изложишя уставъ и исповѣданіе православныя вѣры, единому комуждо ихъ чясть нѣкую изрекшу, въ которомъ же градѣ или странѣ, и когда ея изложишя, или кая богодохновенная книга сіе предала вамъ, не изъяснилъ еси намъ, убоявся всяко якоже мнитмися обличенія, еже отъ благочестивыхъ, нигдѣже бо обрѣтается писаное у насъ правовѣрныхъ таково. Сіе же и зѣло вѣдомо есть всѣмъ вездѣ сущимъ правовѣрнымъ, яко первый, иже во Святѣмъ Дусѣ собравшійся въ Никеи священный Соборъ 318 богоносныхъ отецъ на злочестиваго Арія, создана Бога Слова глаголющаго, изложишя уставъ православныя вѣры богословивше краткыми словесы велію тайну Всесвятыя и поклоняемыя Троиця и смотреніе вочеловѣченія Бога Слова. О Святѣмъ же Дусѣ толико точію рекше: вѣруемъ и во Святый Духъ. И понеже по лѣтехъ нѣкыхъ явися духоборный Македоній, хуля на Святый Духъ, созданъ ѝ мыудръствуя, по нужи собрася вторый вселеньскый Соборъ 150 богоносныхъ отецъ въ Констянтинѣ градѣ, при великомъ цари Ѳеодосіи, приложилъ во священномъ символѣ еже о Святѣмъ Дусѣ богословіе. Третій же святый Соборъ иже во Ефесѣ, емуже бѣ начальникъ священный Кирилъ патріархъ александрьскый, запечатлѣ клятвами страшнѣйшими предизложенную вѣру бывшими преже его двоими вселенскыми Соборы, дабы никтоже къ тому дерзнулъ претворити ни единое реченіе, ниже приложити что въ предизложенный символъ, ниже уложити у него [10]. Сице мы прочитаемъ въ дѣяніихъ священныхъ Соборъ, и сице держимъ и вѣруемъ и проповѣдуемъ, желающе наслѣдницы быти со святыми седьмыми Соборы вѣчныхъ благъ и благословенія, а не съ вами, преступникы, вѣчныя клятвы и осуженія. А еже отъ тебе повѣствуемо, о Николае, ниже видѣхомъ написано отнюдъ въ книзѣ которѣй православнѣй, ниже слышахомъ сіе отъ иного коего даже и до сего. Буди же тако якоже ты утвержаеши, яко святіи апостоли преже святаго Собора никейскаго изложишя уставъ православныя вѣры, чесо ради ты, Николае, преступаеши безъума священное ихъ о Святѣмь Дусѣ богословіе, и не якоже они богословиша держиши è? Они рѣшя по твоей повѣсти Варѳоломѣемъ апостоломъ: вѣруемъ и во Святый Духъ, и далѣе сего не проидошя. Такоже послѣ ихъ священный никейскый Соборъ подобнѣ имъ изложишя, ничтоже приложше; таже третій Соборъ святыхъ отецъ приложишя во священномъ символѣ совершенное богословіе, еже о Святѣмъ Дусѣ, прирекше: и въ Святыи Духъ Господень животворящъ, отъ Отца исходящь, якоже самъ единородный Сынъ Божій Iсусъ Христосъ, богословилъ гласомъ святаго Іоанна евангелиста. Ты же, акы и самехъ святыхъ апостолъ, и священныхъ тріехъ соборъ, и самого Единороднаго вышше вознесеся крылы таинственнаго богословія, дерзнулъ еси собою приложити къ неблазненному ихъ богословію глаголя: и въ Духа Святаго отъ Отца и Сына исходящаго, и сице являешися лжущъ сугубымъ лганіемъ. Единымъ убо глаголя, яко имъже образомъ пріятъ латынская Церковь отъ самехъ святыхъ апостолъ, сице и соблюдаетъ непретворенъ священный символъ православныя вѣры, и се изобличенъ еси лжущъ, приложила бо отъ себе еже и отъ Сына, преступивши апостольскыхъ и отеческыхъ завѣщаній и клятвъ, и бысть подвинна соборнѣй анаѳемѣ. Другымъ лжеши объявленне, два начала проповѣдуя присносущнаго и непостижимаго исхоженія Святаго Духа, еже есть хульно. Аще бо два испущателя Духу Святому Отецъ и Сынъ, то убо и два начала Божеству Святаго Параклита, еже есть ложно и сопротивно евангельскымъ и отеческымъ таинственнымъ богословіемъ. Единъ бо источникъ Божеству и Сына и Духа Святаго, Отецъ есть по изящному богодохновенному богословцу Ареопагитскому Діонисію и по всѣмъ вкупѣ святыхъ отецъ. В сихъ убо изобличенъ лжущъ, престани прочее досаждая православнымъ людемъ рускымъ, глаголя не по разумію истины отлучити себе сообщенія латынскаго, не по разумію, Николае, ниже по суетному рвенію, но по послушанію глаголющаго богодохновеннаго богословца Іоанна, завѣщавающаго намъ крѣпцѣ и глаголющаго: всякъ преступаяй и не пребываяй во ученіи Христовѣ, Бога не имать, пребываяй во ученіи Христовѣ сей и Отца и Сына имать [11]. Таже приводитъ глаголя: аще кто грядетъ къ вамъ и ученія сего не приноситъ, не пріимайте его въ домъ, и радоватися ему не глаголите, глаголяй бо ему радоватися, сообѣщникъ есть дѣломъ его лукавымъ. Разумѣй, о Николае, силу евангельскыя сея рѣчи, и сложи всяко прѣніе суетно и упрямство; неточію бо просто еретика глаголетъ преступающаго и не пребывающаго во ученіи Христовѣ, но и безбожника его явѣ именуетъ. Вы же глаголеми латыня, преступающе Христово, еже о происхожденіи Святаго Духа, ученіе, и прилагающе отъ себе во священномъ символѣ вѣры еже и отъ Сына, како наречетеся прочее христіане православніи, елма богословіе Спаса Христа преступисте и безъ боязни глаголете: и въ Духа Святаго отъ Отца и Сына исходящаго. Сіе Единородному не прирекшу, но точію Отца испущателя объявилъ, а не и себе. Аще убо по истинѣ, а не по лицемѣрію желаете еже съ нами соединенія, изрините отъ среды насъ и васъ разлучающее средостѣніе оплоты, глаголю же лишнее сіе хульное приложеніе. Мечите [12] приносимыя опрѣснокы въ таинственную жертву по ереснику Аполлинарію, отступите отъ губительныя оригенскія ереси, яже огнемъ чистительнымъ во обхоженіи многыхъ лѣтъ очищаетъ душя всякыми грѣхы насыпаны, и тако оттуду препосылаетъ я; въ жизнь вѣчную. Сіе бо ученіе неточію лѣнивыхъ творитъ многыхъ на исправленіе согрѣшеній своихъ тѣмъ, еже чаяти себѣ очищеніе по смерти въ чистительномъ огни, но еще и слово, еже есть о праведнѣмъ судѣ, развращаетъ. Аще бо вси, иже во христіянстей вѣрѣ согрѣшиша лютыя грѣхы, во огни очистившеся, въ безконечную жизнь преходятъ, по Оригену и по васъ, которіи ошую праведнаго Судіи стояще, услышятъ горкый онъ отвѣтъ: идите отъ Мене проклятіи во огнь кромѣшный уготованный діяволу и аггеломъ его, и прочаа [13]. Не бо нечестивіи аки суровіи и безчеловѣчніи и немилостивіи отъ праведнаго Судіи отринутся: они бо акы беззаконно согрѣшиша, беззаконно и погыбнутъ, свидѣтельствуетъ святый Павелъ апостолъ. Явлено же пакы сіе и отъ глаголющихъ въ день судный, акы оправдающихъ себе стояще ошую страшнаго Судіи: Господи, не о имени ли Твоемъ бѣсы изгнахомъ, и о имени Твоемъ пророчествовахомъ, и о имени Твоемъ силы многы сътворихомъ, иже и противу услышятъ отъ праведнаго Судіи: отступите отъ Мене дѣлателіе беззаконію; аминь глаголю вамъ: николиже познахъ васъ. Зрите, како явьственнѣ отъ сихъ евангельскыхъ рѣчей обличается, яко лжина есть, иже по Оригенѣ и по васъ латынехъ, чистительный огнь. Аще бо вси христіяне грѣшникы очищахуся отъ своихъ грѣхъ во огни чистительномъ по смерти, никакоже бышя были невѣдоми отъ праведнаго Судіи створшеи о имени Его силы многы, сирѣчь чюдеса предивна, ни дѣлателіе беззаконію именовахуся отъ Него.

Хотѣлъ бы и прочаа вашя нова преступленіа изобличити, елика вы отъ себе умыслисте во святыхъ таиньствехъ и во священническый чинъ и въ прочій церковный уставъ, и елико вы мудръствуете и творите кромѣ апостольскыхъ правилъ и уставленій и Вселенскыхъ седми Соборъ; но волею сихъ преминую ихъ, акы вѣдомыхъ сущихъ всѣмъ православнымъ христіяномъ, отъ нихъже иніи стари списателіе изобличишя ихъ и писанію предали. Елма же убо и инъ нѣкій указъ предлагаеши преухыщренъ показателенъ подобающаго быти соединенія всѣмъ вѣрнымъ, и глаголеши, яко сего ради Спасъ всѣхъ въ хлѣбѣ и винѣ предалъ таинственную свою жертву, зане хлѣбъ отъ многыхъ зеренъ состоится, такожде и вино отъ многыхъ зеренъ гроздіихъ сътворяется. Противу сего преухыщреннаго мудрословіа твоего отвѣщаемъ: иже по насъ приносимый хлѣбъ, сирѣчь еже по Бозѣ есть соединеніе грековъ, русаковъ, иверяновъ, болгаровъ, сербовъ, волоховъ и иныхъ многыхъ языкъ — отъ пшеничьныхъ единыхъ зеренъ сотворяемъ, сирѣчь отъ правыхъ апостольскыхъ ученій и отеческыхъ правилъ и преданій, — чистѣйшій дѣлавшему его небесному Хлѣботворцу благопріатенъ есть и зѣло сладчайшъ испеченъ невещественымъ огнемъ божественаго Параклита. А иже по васъ латынехъ хлѣбъ, сирѣчь еже по васъ соединеніе, не отъ единыя пшеницы зеренъ, но отъ различныхъ сѣменъ состоится, глаголю же отъ ячмени, проса, ржы и овся. Разумѣваяй да разумѣетъ слово крыто. Не прельщай убо насъ преиспестренными многыми хитрословіи. Оно же буди вѣдый Николае, яко елицехъ реченій евангельскыхъ и апостольскыхъ приводиши въ своемъ писаніи на похвалу убо и хваленіе ваше, а намъ поносъ и осужденіе, въ сихъ васъ наипаче праведный Судія осудитъ, поелико супротивно носитеся апостольскыхъ правилъ и отеческыхъ преданій, и зане, еже добрѣ и богоугоднѣ составлено тѣло Христово, глаголю же соборную Церковь, разколисте и разтерзаете всяческыми странными и нелѣпотными новыми вашими ученіи. Но и о семъ убо толика довлѣютъ главизна нашыхъ отвѣтовъ противу списаннаго тобою на насъ со многымъ коварствомъ поученія, бытто соединительнаго, паче же развращенія. Слыши Николае и весь, иже о папѣ вашемъ священническый причетъ и многое множество сущихъ у васъ учителей и филосоѳовъ, яко мы повинующеся Господу Богу нашему, повелѣвающу: аще не обратитеся и будете якоже дѣти, не имате внити въ царствіе Божіе [14], и пакы: аще кто не пріиметъ царствіе Божіе, якоже дѣтищъ, не можетъ внити въ не, — симъ двоимъ заповѣдемъ повинующеся, мы держимъ вся благочестіа тайны и богословная догмата апостольскыхъ и отеческыхъ церковныхъ преданій, царствіе Божіе приточнѣ глаголема вся вкупѣ пріемлемъ и соблюдаемъ непремѣнна, якоже дѣти малы пріимаютъ ученія отъ своихъ учителей безъ сумнѣнія, и вышше нашея немощи не пытуимъ таинственную силу ихъ, послушающе завѣщавающаго: вышшая себе не ищи. Яко убо единъ Богъ есть безначаленъ и безконеченъ присносущенъ Святая Троиця, вѣмы и вѣруемъ, и исповѣдуемъ и сердцемъ и усты, и яко отъ Бога и Отца Сынъ раждается и Духъ Святый исходитъ, и вѣмы и вѣруемъ. Образъ же рожденію и исхожденію ниже ищемъ достигнути но ни можемъ. Сія бо отнюдь неизреченна и непостижима суть всякому созданному естеству. Благоизволите убо и вы возвратитися въ немъже имѣсте изначала съ нами правое исповѣданіе вѣры и соединеніе богоугодное, отъ негоже злѣ отпадосте, побѣждени бысте лукавымъ духомъ славолюбія и самоугодія. Аще же не хощете пріимати братскы приносимый вамъ отъ насъ по любви духовный сей совѣтъ спасительный, — мы отступити отъ преданныя намъ отъ святыхъ апостолъ и Вселенскыхъ Соборъ православныя вѣры, и соглашати съ вами, во всѣхъ безпутіихъ заблужшими, никако терпимъ. Вѣмы бо глаголющаго: изыдѣте отъ среды ихъ, и отлучитеся и нечистотѣ не коснитеся. Ельма лучши есть похвально распряженіе соединенія, отлучающаго отъ Бога. Тому слава въ вѣкы, аминь.

Примѣчанiя:
[1]
Предъ этимъ словомъ Максима Грека въ рукописяхъ помѣщается слѣдующее Сказаніе о Николаѣ нѣмчинѣ: «Сей Николай Булевъ бысть въ богоспасеномъ градѣ Москвѣ долго время, въ лѣтехъ осмыя тысящи, во дни благочестиваго государя, великого князя Василіа Ивановичя всея Росіи, и отъ государя превелію честь получилъ, врачевскыя ради хытрости. И коварственнымъ замысломъ своимъ счинилъ самъ слово и всякаго лукавства наполнилъ, о соединеніи вѣры греческой и римской. Вѣру убо нашу христіянскую хвалитъ ухыщреніемъ словесъ своихъ, ересей же латынскыхъ въ нихъже разлучаемся отъ нихъ, утаилъ лукавый, и ничтоже отъ нихъ писалъ. Максимъ же инокъ, увѣдѣвъ его прелестное списаніе, и вооружися противъ козней его благодатію Святаго Духа, и написа слово сіе».
[2]
Матѳ. 7, 15.
[3]
будто.
[4]
Матѳ. 18, 20.
[5]
Іоан. 15, 26.
[6]
Матѳ. 18, 3.
[7]
Гал. 1, 8.
[8]
Гал. 5, 4.
[9]
1 Кор. 5, 11.
[10]
отложить отъ него.
[11]
2 Іоан. 1, 9.
[12]
отбросьте.
[13]
Матѳ. 25, 41.
[14]
Матѳ. 18, 3.

Печатается по изданiю: Сочиненiя преподобнаго Максима Грека, изданныя при Казанской Духовной Академiи. Часть первая: Догматико-полемическiя сочиненiя. – Изданiе второе. Казань: Типо-литографiя Императорскаго Университета, 1894. – с. 171-186.

Наверхъ / Къ титульной страницѣ

0