Святоотеческое наследие
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Святоотеческое наслѣдiе
-
Гостевая книга
-
Новости
-
Написать письмо
-
Поискъ

Святые по вѣкамъ

Изслѣдованiя
-
I-III вѣкъ
-
IV вѣкъ
-
V вѣкъ
-
VI-X вѣкъ
-
XI-XV вѣкъ
-
Послѣ XV вѣка
-
Acta martyrum

Святые по алфавиту

Указатель
-
Свт. Іоаннъ Златоустъ
А | В | Г | Д | Е
-
З | И | І | К | Л
-
М | Н | О | П | Р
-
С | Т | Ф | Х | Э
-
Ю | Ѳ
Сборники

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 23 марта 2017 г. Сейчасъ на порталѣ посѣтителей - 9.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ПОСЛѢ XV ВѢКА

Преп. Максимъ Грекъ († 1556 г.)
Нравоучительныя сочиненія.

5. Слово о покаяніи.

Нелѣностно пребываемъ, душе, ниже безпечально, ниже аки младенцы, неискусны смысла, поругаеми бываемъ, довольну въ соблюденіе, сирѣчь во спасеніе, себѣ мняще быти мѣсту сему нешествуемому ногами женомірянолюбцовъ. Ниже бо Египта и Фараона древле избѣгшимъ, споспѣшествомъ Вышняго и наставленіемъ Моисеовымъ, удовлѣно [1] къ благовѣрію, еже не во вселенномъ мѣстѣ, сирѣчь въ пустыни, обитати 40 лѣтъ, зане къ Богу, избавльшему ихъ отъ безчисленныхъ скорбей, вѣру благоразумну не сохраниша. Не мѣстными премѣненіи угаждаемъ бываетъ, о душе, всѣхъ Владыка, ниже преоблаченіемъ худыхъ рубищъ, ихже ово сирѣчь пустынное пребываніе, убо многаго ради безмолвія взыскуется, ово же смиренія ради избирается. Аще же кто въ сихъ сый, паки плетется въ плищехъ [2] и мірскихъ печалехъ, ничтоже разликуетъ пса, обращающася на свою блевотину, по словеси верховнаго. Плача бо, душе, и мертваго житія указъ есть внѣшнее сіе черное рубище, увѣщавающе насъ всегда вѣдѣти себе мертвыхъ волею въ семъ житіи сіе избравшихъ, сирѣчь выну всѣмъ умомъ ненавидѣти всякое плотское сладкострастіе и житейскія молвы, жити же безстяжанно и преподобно своими труды веліе богатство мнящимъ нищету. Аще же паки стяжаніи славѣ, піянству, смѣхи, имиже съпряжется всяческа беззаконная похоть, себе самихъ безъ ума сплетаемъ, нѣсть лѣпо рещи, яко сугубыхъ получимъ мученій, аки волею и въ разумѣ своя обѣты солгавше Христу, сего же что можетъ быти горше? Лучше бо, рече мудрость Божія, не обѣщавшу и отдати Богу, неже обѣщавшу соглати, и: вся глаголющая лжу погубиши, такоже вопіетъ божественный пѣснопѣвецъ. Не мѣстехъ [3] убо премѣненіемъ, ни ризъ, якоже предрекохъ, душе, угажаемъ бываетъ Христось, всѣхъ Господь, но житія честнаго и всякія добродѣтели пристяжаніемъ, на вѣрѣ чистѣ твердѣ водруженныхъ. Понеже убо, благодатію Божіею поспѣшествована, избѣгла еси сѣтей чювственнаго Египта, сирѣчь міра сего, потщися всею силою ни владѣющаго имъ діавола и тебѣ выну зѣло бѣшено навѣтующаго, избѣжати благоразумною, яже къ Господу, вѣрою и божественнымъ страхомъ добрѣ огражаема. Ниже престай бѣжащи его, крѣпкою десницею Вышняго потопляема во пламеннѣй пропасти, вкупѣ съ еговыми всѣми колесницами и крѣпкими оружники, себе же увѣси покрываему облакомъ Параклитовымъ, устужающимъ варъ, иже на тя зѣло воставляемъ отъ безплотныхъ врагъ помышленіи пламенными сквернѣйшихъ похотій, и столпомъ не огня, но присносущнѣ озаряющаго свѣта наставляемъ къ земли обѣтованія, не юже израильтяномъ раздѣлили Іисусъ Наввинъ, но юже всеа твари перворожденный, иже красный добротою, паче всѣхъ сыновъ человѣчь, рожейся отъ откроковицы и святыя Дѣвы, неложный Богъ обѣща намъ Христосъ Іисусъ, въ нюже самъ первый вниде, убивъ смерть. Трезвися убо всегда, душе; гоняй бо тя безпрестани разумный Фараонъ не престаетъ, злая тебѣ умышляя. Ни чай, о душе любезна, престатіе умышляемыхъ имъ на тя всяческихъ лаяній; естествомъ бо завистливъ есть и безстужъ, ниже престаетъ отъ гнѣва, дондеже ввержетъ тя въ пламенныхъ мученіи. Ниже отступающу вѣруй; тогда бо больши уловляетъ тя зѣло злокозненнѣ; сицевымъ бо ловленіемъ тщится скверный повинути тя, ослабити многое твое и зѣльное трезвѣніе. И тако, обрѣтъ тебе лѣнящуся, уязвитъ тя внезапу единымъ отъ многихъ душегубныхъ стрѣлъ, или узою губительною киченія запнетъ отъ преспѣянія, еже къ большимъ добродѣтелемъ; умъ бо сый зѣло искусенъ, въ еже зло умышляти, вѣсть, егда прилѣжно трезвимся, елику ползу отъ нихже наноситъ намъ напастей приобрѣтаемъ, укрѣпляеми свыше Божіею благодатію. Аще бо трезвимся, нанесеніе напастей виновно свѣтлѣйшихъ вѣнецъ бываетъ намъ, якоже и доброму борцу, еже братися противу благоискусныхъ противоборцовъ. Аще убо споспѣшествомъ твоего душеспасителя избѣгнеши рукъ всегубительнаго Фараона и чермную глубину пламенныхъ стреканій прешедши сухою, а не мокрою, якоже боговѣщанное слово тайноучитъ насъ, и худою пищею, пѣшь же, а не сѣдящи на жребяти, сирѣчь присно худу и не единаго чего сущу достойну себе мниши въ мысли, а не во устѣхъ, вселишися при холмѣ горы Синайскія въ пустыни, сирѣчь пристанеши во священномъ пристанищи многопѣтаго и благоуханнаго бестрастія, емуже наиначе желаетъ всесвятый Духъ. Блюдися, да не, равнѣ неблагодарнымъ людемъ онѣмъ, и ты окаянная, избѣсившися вдаси себе объяденію и піянству и плясаніемъ, да не и ты многоцѣнная твоя и честная вся во чревѣ твоемъ погребеши и точно Богу послужиши тому, якоже и они, тельцу древне, да не и ты погрѣшиши будущихъ благъ Божіихъ, якоже и они, обѣтованныхъ земли, и ввержена будеши въ мученіихъ, томящихъ тя безконечно и горѣе всѣхъ бывшихъ преже закона безвѣрныхъ. Но аще истиною любиши Христа царя твоего вкусившаго, тебе ради, смерть на крестѣ, потщися всею силою божественныя его любве, скрыти прилѣжно въ мысли своей. Сего же получити немощно инако, аще не вся похоти своя возненавидиши до конца; сія же паки немощно возненавидѣти, аще не утвердиши божественный страхъ во сердцы своемъ; сего же паки не пристяжеши, аще не всякаго отъ себе изринеши сумнѣнія и еже чаяти мудритися, аки же простъ младенецъ вослѣдъ идеши за Господемъ твоимъ, повинующися повелѣніемъ его. Якоже убо любы совершеніе есть всего закона, такожде и вѣра основаніе есть всѣмъ вкупѣ добродѣтелемъ; вѣра страха ражаетъ, сей же паки дѣланія заповѣдей, имже умъ совокупляется божественнѣй любви. Ейже сподобившися, смиренная мудрствуй, прахъ себе вмѣняй, да выну насладишися божественными желаніи.

Примѣчанія:
[1] Довольно было.
[2] Плищъ — шумъ, крикъ, молва.
[3] мѣстъ.

Источникъ: Сочиненія преподобнаго Максима Грека, изданныя при Казанской Духовной Академіи. Часть вторая: Нравоучительныя сочиненія. —– Казань: Въ типографіи Губернскаго правленія, [1860]. — С. 148-152.

/ Къ оглавленію раздѣла /


Наверхъ / Къ титульной страницѣ

0