Святоотеческое наследие
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Святоотеческое наслѣдiе
-
Гостевая книга
-
Новости
-
Написать письмо
-
Поискъ

Святые по вѣкамъ

Изслѣдованiя
-
I-III вѣкъ
-
IV вѣкъ
-
V вѣкъ
-
VI-X вѣкъ
-
XI-XV вѣкъ
-
Послѣ XV вѣка
-
Acta martyrum

Святые по алфавиту

Указатель
-
Свт. Іоаннъ Златоустъ
А | В | Г | Д | Е
-
З | И | І | К | Л
-
М | Н | О | П | Р
-
С | Т | Ф | Х | Э
-
Ю | Ѳ
Сборники

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 28 апрѣля 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ПОСЛѢ XV ВѢКА

Преп. Максимъ Грекъ († 1556 г.)
Пѣснь благодарственна къ Пресвятѣй Троицы, глаголема во всю Свѣтлую недѣлю Пасхи.

Слава Тебѣ, преблагій Боже Отче Вседержителю, слава Тебѣ и покланяніе и велелѣпіе отъ всея видимыя и мысленныя твари нынѣ и въ безконечныя вѣки! Како достойнѣ азъ, перстный и страстный, неблагодарное созданіе пречистыхъ рукъ Твоихъ, воспою и славословлю безчислосіянную державу божественнаго Ти величества и неизслѣдованную бездну благости и человѣколюбія Твоего, еже къ намъ неблагодарнымъ, зане отступившихъ насъ отъ Твоея благости и лютѣ нечествовавшихъ на ню и всякою злобою, преслушаніемъ же и непокорствомъ огорчевавшихъ Твоя человѣколюбныя утробы, не престалъ еси милуя насъ и промышляя о насъ и питая и обращая отъ пути прелести нашея на путь истины Твоея, чюдесы предивными, пророки же и закономъ и заповѣдми спасителными, знаменіи отъ небесъ, знаменіи отъ земли и моря, намъ же окаяннымъ безчувственнѣ пребывающимъ къ толицѣй, яже къ намъ, благости Твоея и всякимъ образомъ огорчевающимъ Тя и всякими нечестіи и неизреченными беззаконіи, ниже сице отвратился еси насъ или оставилъ, неизслѣдованна бо и безконечна есть бездна благости Твоея, еюже побѣжденъ бывъ, Иже единъ сый непобѣдимъ и всесиленъ, благоволилъ еси послати собезначальнаго и соприсносущнаго Ти Сына Господа нашего Ісуса Христа на помощь и на возвращеніе окаяннаго рода нашего неблагодарныхъ, се показаніе веліе Твоея, яже о насъ, совершенныя благости, иже не пощадѣлъ еси единороднаго и возлюбленнаго Сына своего, но выдалъ еси Его на страсти поносныя и смерть горчайшу, за спасеніе намъ неблагодарнымъ. Что веліе се и страшно таинство, что толико Твое, еже о насъ нечестивыхъ и неблагодарныхъ, человѣколюбіе и благость? Еда бо не можаше ли, Иже единъ Всесильный, инымъ которымъ образомъ спасти рода нашего единъ Всесилный? Ей, можаше, Владыко, и единымъ божественнымъ Си мановеніемъ исцѣлити насъ; что бо Тебѣ невозможно? Тебѣ всяческая работаютъ и повинуются, аки Владыцѣ и Содѣтелю. Но сице бысть благоволеніе предъ Тобою, яко да разумно будетъ, еже о насъ окаянныхъ, неисчетное Твое человѣколюбіе и пучина щедротъ Твоихъ и яко не точію мановеніе всемогущія божественныя силы Своея можеши творити превелія и предивна, но и худыми немощнѣйши, яже у насъ; что бо немощнѣйши человѣческія плоти страстей же и креста и смерти, въ нихъже и имиже посрамилъ еси начальства и власти темныя, но и самого имѣющаго державу смертную гордаго и величаваго сатану и діавола, иже многообразными нечестіи и студодѣяніи на лѣта довольна умертвилъ насъ безумныхъ, егоже нынѣ покорилъ еси попрану бывати ногами благочестивѣ служащихъ божественнѣй славѣ Твоей, попираемъ бо и поругаемъ бываетъ, якоже худая птица о отгонится непобѣдимымъ знаменіемъ креста образуемомъ нань. Такова, яже отъ Твоея благости, положена въ немъ божественна сила, бѣсы въ бѣгъство обращаетъ, недуги отгоняетъ, мертвыя, аки отъ сна, воставляетъ. Мы же немощніи и убозіи, что къ симъ противу принесемъ Твоей, яже о насъ, благости? Ни единого отъ сущихъ у насъ требуеши, вся бо Твоя и яже на небесѣхъ и яже на земли и яже въ моряхъ и безднахъ, ты бо всѣхъ сихъ и Творецъ и Господь; единаго точію у насъ отъ сущихъ ко превелицѣй благости Твоей требуеши и желаеши спасенія нашего и неложнаго обращенія и покаянія, еяже ради вины и на смерть выдалъ еси возлюбленнаго единороднаго Сына своего Ісуса Христа Господа нашего, Егоже животворною смертію мы мертвы прежде суще оживотворихомся и мрачныхъ адскихъ пропастей избыхомъ и восходъ, иже на небеса, обрѣтохомъ и затворенный древле, по преслушанію праотца нашего, райскій входъ, воспріяхомъ паки послушаніемъ втораго Адама Господа нашего Ісуса Христа, егоже божественное и живоносное воскресеніе по вся лѣта празднующе веселія божественнаго и неизглаголанныя духовныя радости по душамъ исполняемся, егоже ради и воспѣвающе возопіемъ, отъ глубины сердечныя: благословенъ еси, Господи Боже отецъ нашихъ и препѣтый и превозносимый во вѣки вѣкомъ аминь, и благословенно имя славы Твоея препѣтое и превозносимое во вѣки вѣкомъ аминь, яко благоволилъ еси посѣтити насъ Востокомъ свыше, еже есть явленіемъ мысленнаго Солнца правды Ісуса Христа Господа нашего, яко мертвыхъ сущихъ нечестіемъ оживотворилъ еси твоего благовѣрія свѣтлостію, яко враги суща прежде и сыны діяволя и чада естествомъ гнѣву, други и сыны и чада возлюбленна Твоя явилъ еси насъ, по благодати Ісуса Христа Господа нашего и дарованію Святаго Духа Твоего, измывъ насъ божественною банею пакибытія, яко омраченныхъ сущихъ насъ всяческими прелестми и лжеименнаго разума внѣшнихъ софистъ освѣтилъ еси насъ лучами богоразумія и сокровищи неблазненнаго богословія и премудрости, въ нихже и имиже преизобильно озаряеми, благословимъ неблазненно Отца и Сына и Святаго Духа, единого Бога въ тріехъ ипостасѣхъ, безначальна, несозданна, соприсносущна, безконечна, содѣтеля всѣхъ видимыхъ и невидимыхъ, преблага, человѣколюбца, всякаго блага подателя и виновна, предъ нимъ же раболѣпно припадающе и воспѣвающе возопіемъ: спаси насъ Твоею благодатію, Пресвятая Троице, содѣтелю всѣхъ и содержателю, сохрани насъ въ настоящемъ убо жітіи благовѣрно служащихъ Ти и любовная Тебѣ и угодная всегда совершающихъ, со всякимъ благодареніемъ и чистымъ житіемъ, а въ будущемъ сподоби соучинитися намъ божественному лику избранныхъ Твоихъ, идѣже шумъ чистъ празднующихъ и гласъ неизреченнаго радованія; Ты бо еси намъ Богъ возлюбленъ, вѣренъ же и праведенъ, и мы людіе Твои, по благодати Твоей, и развѣ Тебе иного не вѣмы, имя Твое имянуемъ и славословимъ Отца и Сына и Святаго Духа единого божества и царства, Емуже подобаетъ всяка слава, честь, поклоненіе, въ безконечныя вѣки. Аминь.

Печатается по изданію: Сочиненiя преподобнаго Максима Грека, изданныя при Казанской Духовной Академiи. Часть вторая: Нравоучительныя сочиненiя. – Казань: Въ типографiи Губернскаго правленiя, [1860]. – с. 440-445.

Наверхъ / Къ титульной страницѣ

0