Святоотеческое наследие
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Святоотеческое наслѣдiе
-
Гостевая книга
-
Новости
-
Написать письмо
-
Поискъ

Святые по вѣкамъ

Изслѣдованiя
-
I-III вѣкъ
-
IV вѣкъ
-
V вѣкъ
-
VI-X вѣкъ
-
XI-XV вѣкъ
-
Послѣ XV вѣка
-
Acta martyrum

Святые по алфавиту

Указатель
-
Свт. Іоаннъ Златоустъ
А | В | Г | Д | Е
-
З | И | І | К | Л
-
М | Н | О | П | Р
-
С | Т | Ф | Х | Э
-
Ю | Ѳ
Сборники

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 24 iюня 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ПОСЛѢ XV ВѢКА

Преп. Максимъ Грекъ († 1556 г.)
Предисловіе житію чюдотворцевъ соловецкихъ.

Обновленія почитати древній законъ есть и добрѣ уставленъ, глаголетъ преизобильный въ богословіи Григоріе. И како убо не добрѣ уставленъ, идѣже имъ два великая сотворяются, ибо и промыслъ и еже о насъ прилежаніе всѣхъ Содѣтеля и Владыки явлена бываютъ выну всѣмъ человѣкомъ, имиже едиными и вся яже о насъ исправляются и къ нашей пользѣ устрояются. Такоже и дѣянія и достохвальная житіа преподобныхъ и богоносныхъ отецъ посничества рекý и зѣлная томленія и еже съ самѣмъ тымъ діяволомъ повсядневная боренія и еже отъ добрыхъ, сирѣчь, елика во славу и честь Владыки всѣхъ тщаніе же и попеченіе ихъ пѣваемо бываетъ и незабытно присно отъ рода къ роду всегда препосылаема и на подражаніе добрыхъ иже исправленіи воставляюща послѣднеродныхъ. Симъ убо сице ся имущимъ, праведно и мнѣ неключимому, понуженіа ради твоего, показася не предати забвенію, но краткимъ писаніемъ явлено сотворити послѣднимъ родомъ содѣянное неизслѣдованными судьбами Владыки всѣхъ и Бога; азъ же убо, аще и недостоинъ сый таковаго начинанія, но надѣюся на великіа щедроты Господа моего и воспоминаю реченная святыми Его неложными усты: Азъ есмь, рече Сый при купинѣ и нынѣ той же, той же и во вѣки, не усумнюся глаголати, яко гугнивъ еси, лѣпо бо ми есть дати тебѣ языкъ многорѣчивъ, да проповѣси великую мою благодать и похвалиши угождьшихъ ми и потрудившихся добрѣ; азъ же окаянный, надѣяся тому словеси, понудихся тому прострѣти грубую мою десницу, молюжеся и милъ ся дѣю, да не зазоръ ми будетъ отъ васъ, о боголюбивіи: прямо бо простертъ кипарисъ на высоту востече, но очесемъ единемъ дарова наслаженіе свое, смоковница же нижними и стропотными вѣтвьми оградися, но медоточными плоды наслаждаетъ гортань. Сице убо и философскихъ словесъ суетное поученіе, не божественная бо глаголютъ ниже мудръствуютъ, но о иныхъ упражняются, ихъ же намъ нелѣпо есть и глаголати, наполняютъ бо воздухъ словесы, и ни едино же отъ нихъ Богу угодно, ниже святымъ похвально, ни человѣкомъ на пользу и спасеніе, но вся суетна и развращенна, наши же христіянскіа похвалы Богу приносимыя и святымъ Его, аще и проста бываютъ неухищренными глаголы, но благодарна и нескрыта и явствена всѣмъ на пользу слышащимъ, якоже бо и сіи творцы житіа блаженыхъ онѣхъ отецъ Зосима и Савватíа, Досифей глаголю ученикъ преподобнаго Зосима написа убо потонку и неухищренно и якоже бы возможно тамо живущимъ человѣкомъ глаголати же и прочитати, понеже убо тамо пребывающiи человѣцы близь моря и кругъ острова того мало свѣдяху россійскаго языка близь живущіи ижера, чюдь, лопь, вдалѣе же каяне и мурмане и иніи мнози языцы, мнозіи бо отъ тѣхъ прихожаху во обитель преподобныхъ отецъ Зосимы и Савватíа и остригаху главы своя, бывающе мниси. Того ради Досифей неухищренно ниже добрословіемъ писаше, но яко воспоминаніа ради трудолюбнаго житіа преподобныхъ онѣхъ отецъ, да слышащіи ревнуютъ по нихъ добродѣтелемъ ихъ. По сихъ случися быти Спиридону митрополиту во обители Пречастыя Богородицы завомо Ферапонтовъ, якоже напреди слово скажетъ въ житіи блаженныхъ отецъ, умолену и ему бывшу еже подробну преписати и удобрити достохвальное пребываніе; онъ же отчасти убо исправи и добрословіемъ украси, но не все, понеже убо, якоже выше рекохъ, тамо ради живущихъ человѣкъ, еще бо въ то время отъ иныхъ градовъ немнози прихождаху во еже постригати главы своя, но близь живущіи человѣцы, якоже выше назнаменахъ, мало свѣдуще россійскаго языка. Нынѣ же, по божественному апостолу, явися благодать спасительная всѣмъ человѣкомъ, не токмо бо округъ острова того истинніи богочетцы и Христови поклонницы, но благодатію его мнози языцы иновѣрніи превратишася въ православную и благочестивую христіянскую нашю вѣру и крестишася во имя Отца и Сына и Святаго Духа съ отрицаніемъ первыя ихъ вѣры и проклятіемъ своея имъ ереси, первѣе бо быша яко звѣри дивіи живуще въ пустыняхъ непроходныхъ и въ пещерахъ и въ разсѣлинахъ земныхъ, не имуще ни храма ни инаго потребнаго къ жительству человѣку, токмо животными пищу пріимаху звѣрми и птицами и морскими рыбами, и елико кто нахожаше, тѣмъ куплю творяху, языцы же иновѣрніи, глаголю, якоже и выше, каяне, и мурмане, нынѣ же быша православніи христіяне и толико благодатію Христовою вдалѣ распространишася болѣ трею тысящу отъ Соловецкаго острова даже и до варяжскаго нѣкоего града зовомаго Варгавъ, идѣже живяше капитонъ, сирѣчь князь, идѣже нынѣ благоволеніемъ Отца, изволеніемъ Сына и съ дѣйствомъ Святаго Духа устроися монастырь честенъ и совокупися многа чета иноческаго пребываніа отъ града оного варяжскаго тако шестьдесятъ поприщъ отстоящъ, на рѣцѣ, глаголемой Печенга, близь моря. Все же устроися, Богу поспѣшествующу, молитвами святыхъ онѣхъ и богоносныхъ отецъ Зосимы и Савватíа, къ нему восходящими, донелиже они нынѣ вселишася въ пустый онъ отокъ, дотолѣ тамо потонку слышашеся имя Христово; егда же благоволи Богъ прославитися святому Своему имени угодники Своими, тогда въ пустыни яко градъ сотворися. Аще бо они не въ едино время, но единодушни быша, колико отъ бѣсовъ пострадаша пакости два мужа неискусна, мужеубійства, брани, худости, и нищетѣ, и помощи подлежавша, въ божественую же силу, свыше сшедшую, вооружившеся зѣльною ревностію, съ самѣмъ діяволомъ сплетшеся и того удавивше, подъ ногама попраша, вмѣсто всякаго инаго оружіа вземше непобѣдимое оружіе православнаго креста, имъ же защищаеми, изгнаста отъ вселеніа своего всяку злокозненую прелесть бѣсовскихъ ловленій и человѣкъ злыхъ нахоженіа, прожде бо прихожаху къ великому оному первовсельнику и прещеніемъ претяху изыти изъ мѣста того, да не зло что постражетъ, иже убо жена нѣкоего отъ живущихъ ту отъ ангела богоранную язву пріимши и своимъ повѣдавши вскорѣ оттуду изыдоша; оттолѣ даже и донынѣ никоеяже пакости сотворити смѣяху. Оле чудо! преже бывый отокъ пустъ и никимъ же вѣдомъ, нынѣ же превооруженъ оружствомъ Святаго Духа, крѣпкими возбранными воины небеснаго Царя, иже не къ крови и плоти ополчахуся, но къ началомъ и властемъ и къ міродержителемъ тмы вѣка сего, къ духовомъ злобѣ небеснымъ, по божественному и велегласному Павлу. И сей хвалится великій онъ островъ веледушевными всельники, паче же рекý, гражаны, иже безчислеными побѣдами и одолѣніи свѣтлѣйшими на высоту аерскую зѣло превознесены и бѣсовскіа прегордыя лаяніа подъ нозѣ повергоша и ни во чтоже сотвориша, Христа же вышняго Царя великаго Бога на земли прославиша и отъ Него велію славу на небесѣхъ пріяша и нынѣ предстоятъ Святѣй Троицѣ со всѣми святыми о насъ молящеся. Азъ же окаянный и грубый, понуженіа ради твоего, честный отче, надежду возложихъ на всемилостиваго Бога, дающаго и безсловеснымъ ясно провѣщавати, якоже при Валаамѣ древле, призывая же святыхъ онѣхъ отецъ на помощь, яко да поспѣшествуютъ ми еже къ похвалѣ добродѣтелемъ ихъ и чюдному исправленію, начахъ еже ко древнему и новая прикладавати къ иже древле водруженному твердо каменному столпу и оныя новыя принфотворныя, яко да и новая о твердѣмъ ономъ крѣпко утвердятся. Небеси убо высота неиспытаема, земли же широта и догота не осяжаема, морю же глубина неизмѣрима, святыхъ же чюдеса неисчетна и недоумѣваема. Сихъ же святыхъ пречюдному житію начало сице, якоже и древле речеся.

Печатается по изданiю: Сочиненiя преподобнаго Максима Грека, изданныя при Казанской Духовной Академiи. Часть третiя: Разныя сочиненiя Максима Грека. – Изданiе второе. Казань: Типо-литографiя Императорскаго Университета, 1897. – с. 213-218.

Наверхъ / Къ титульной страницѣ

0