Святоотеческое наследие
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Святоотеческое наслѣдiе
-
Гостевая книга
-
Новости
-
Написать письмо
-
Поискъ

Святые по вѣкамъ

Изслѣдованiя
-
I-III вѣкъ
-
IV вѣкъ
-
V вѣкъ
-
VI-X вѣкъ
-
XI-XV вѣкъ
-
Послѣ XV вѣка
-
Acta martyrum

Святые по алфавиту

Указатель
-
Свт. Іоаннъ Златоустъ
А | В | Г | Д | Е
-
З | И | І | К | Л
-
М | Н | О | П | Р
-
С | Т | Ф | Х | Э
-
Ю | Ѳ
Сборники

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 24 iюня 2017 г. Сейчасъ на порталѣ посѣтителей - 13.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ПОСЛѢ ВѢКА

Мон. Филоѳей Псковскiй († XVI в.)
Посланіе къ великому князю Василію, въ немже о исправленіи крестнаго знаменія и о содомскомъ блудѣ.

Иже отъ вышняя и отъ всемощныя, всясодержащія десница Божія, имже царіе царствуютъ и имже велиціи величаются и силніи пишутъ правду, — тебѣ пресвѣтльйшему и высокостолнѣйшему государю великому князю, православному христіянскому царю и владыцѣ всѣхъ, браздодержателю святыхъ Божіихъ престолъ святыя вселенскія и апостолскія Церкви Пресвятыя Богородицы честнаго и славнаго Ея Успенія, иже вмѣсто римскія и константинопольскія просіявшу (просіявшей?). Стараго убо Рима Церкви падеся невѣріемъ аполлинаріевы ереси; втораго же Рима Констянтинова града Церкви агаряне внуцы сѣкирами и оскордми разсѣкоша двери. Сія же нынѣ третьяго новаго Рима державнаго твоего царствія святая соборная апостольская Церкви, иже въ концыхъ вселенныя въ православной христіянстѣй вѣрѣ во всей поднебеснѣй паче солнца свѣтится. И да вѣсть твоя держава, благочестивый царю, яко вся царства православныя христіянскія вѣры снидошася въ твое едино царство: единъ ты во всей поднебеснѣй христіяномъ царь. Подобаетъ тебѣ, царю, сіе держати со страхомъ Божіимъ; убойся Бога, давшаго ти сія: не уповай на злато и богатство и славу: вся бо сія здѣ собрана и на земли здѣ останутся. Помяни, царю, онаго блаженнаго, иже скипетръ въ руцѣ и вѣнецъ царствія на главѣ своей нося, глаголаше: богатство аще течетъ, не прилагайте сердца [1]. Премудрый же Соломонъ рече: богатство и злато не въ сокровищехъ знается, но егда помагаетъ требующимъ. Апостолъ же Павелъ, симъ послѣдуя, глаголетъ: корень есть всѣмъ злымъ сребролюбіе [2]: не не имѣти велитъ, но не прилагати упованія нижè сердца къ нему, но уповати на вседающаго Бога. — Вся убо твоя къ Богу честная [3] вѣра и любовь ко святымъ Божіимъ церквамъ. Но и еще, царю, исправи двѣ заповѣди еже во твоемъ царствіи: не возлагаютъ [4] человѣцы на себѣ право знаменія честнаго креста, о нихже издалеча провѣдый апостолъ Павелъ глаголаше: преже писахъ вамъ, нынѣ же плача глаголю о вразѣхъ креста Христова, имже конецъ пагуба [5]. Второе: да исполниши святыя соборныя церкви епископы, да не вдовствуетъ святая Божія Церкви при твоемъ царствіи. Не преступай, царю, заповѣди, еже положиша твои прадѣды великій Константинъ и блаженный Владимеръ и великій богоизбранный Ярославъ и прочіи блаженніи святіи, ихже корень и до тебе. Не обиди, царю, святыхъ Божіихъ церквей и честныхъ монастырей, еже данное Богови въ наслѣдіе вѣчныхъ благъ, на память послѣднему роду. О семъ убо святый великій пятый соборъ страшное запрещеніе положи. О третіей же пишу и плача горцѣ глаголю, яко да искорениши изъ твоего православнаго царствія сій горкій плевелъ, о немже и нынѣ свидѣтельствуетъ пламень жюпельнаго горящаго огня въ содомскихъ стогнахъ, о немже пророкъ Исаія рыдая глаголаше: слышите слово Божіе, князи содомстіи, и внушите глаголъ Божій, людіе гоморстіи! Что ми тукъ жертвъ вашихъ? Исполненъ есмь всесожженій. Аще принесете ми кадило, мерзостно ми есть, и праздниковъ вашихъ ненавидитъ душа моя [6]. Да слыши, благочестивый царю, яко пророкъ не мертвымъ погибшимъ содомляномъ таковая глаголаше, но живымъ человѣкомъ, творящимъ дѣла ихъ. Писано бо есть: преступаяй отъ своея жены раздираетъ плоть свою, а творяй содомская убиваетъ самъ плодъ чрева своего. Богъ сотворилъ человѣка и сѣмя въ немъ на чадородіе, мы же сами даемъ свои сѣмена во убійство и въ жертву діяволу. Да сія мерзость умножися не токмо въ мірскихъ, но и въ прочихъ, о нихже помолчю: чтый же да разумѣетъ. Увы мнѣ! Како долго терпитъ Милостивый о насъ? Не судя убо сія писахъ, но паче рыдая горцѣ самъ азъ окаянный о своихъ согрѣшеніихъ. Но боюся молчати, аки онъ рабъ, сокрывый талантъ. Азъ бо грѣшный и грубый во всѣхъ, и невѣжа въ премудрости, яко же Валаамово осля безсловесное, а словеснаго учаше и скотина пророка наказоваше: яко да не зазриши о сихъ, благочестивый царю, яже дерзнухъ писати твоему величеству. И нынѣ молю тя и паки премолю, еже выше писахъ: внимай, Господа ради, яко вся христіянская царства снидошася въ твое царство; по семъ чаемъ царства, емуже нѣсть конца. Сія же писахъ ти любя и взывая и моля щедротами Божіими, яко да премѣниши скупость на щедроты и немилосердіе на милость: утѣши плачющихъ и вопіющихъ день и нощь, избави обидимыхъ изъ руки обидящихъ. Не обидите, рече Господь, сихъ меншихъ вѣрующихъ въ Мя: ибо ангели ихъ видятъ всегда лице Отца Моего, иже на небесѣхъ [7]. Блаженъ, рече, разумѣваяй на нища и убога: въ день лютъ избавитъ его Господь, Господь хранитъ его и живитъ ѝ, и ублажитъ его на земли, и не предастъ его въ руки врагомъ [8]. Господь поможетъ ти, да аще добрѣ устроиши свое царство, будеши сынъ свѣта и гражданинъ вышняго Іеросалима. Якоже выше писахъ ти, и нынѣ глаголю: блюди и внемли, благочестивый царю, яко вся христіянская царства снидошася во твое едино, яко два Рима падоша, а третій стоитъ, а четвертому не быти: уже твое христіянское царство инѣмъ не останется, по великому Богослову. А христіянской Церкви исполнися блаженнаго Давыда глаголъ: се покой мой во вѣкъ вѣка, здѣ вселюся, яко изволихъ его [9]. Святый Ипполитъ рече: егда узримъ обстоимъ Римъ перьскими вои и перьси на насъ съ скиѳяны сходящася на брань, тогда неблазненно познаваемъ, яко той есть антихристъ. Богъ же мира и любви и долголѣтьства и здравія, молитвами Пречистыя Богоматере и святыхъ чюдотворцевъ и всѣхъ святыхъ, да исполнитъ твое державное царство.

Примѣчанiя:
[1] Псал. 61, 11.
[2] 1 Тим. 6, 10.
[3] № 875: чистая.
[4] Ibid: не полагаютъ.
[5] Флп. 3, 18-19.
[6] Исаіи 1, 10. 13. 14.
[7] Матѳ. 18, 10.
[8] Псал. 40, 1-3.
[9] Псал. 131, 14.

Печатается по изданiю: Памятники Древле-Русской духовной письменности: Посланіе старца Псковскаго Елеазарова монастыря Филоѳея къ великому князю Василію Іоановичу. // Журналъ «Православный собесѣдникъ», Казань. – 1863 г. – Книга I. – с. 343-348.

Наверхъ / Къ титульной страницѣ

0